Read Yimchungru Naga 1 Kiuthsü 18 Bible Online

1 Kiuthsü 18 - Yimchungru Naga bible

1 Kiuthsü 18

¹Kim anükhüh dunglim, Davidnü Filistiarü yan tüsho arü kuk; apinü Gath tüsho ju kiulongbo Filistiarü kheaknü lu.

²Apinü Moab kuk, tüsho Moabrü David mihtsürü kambah ruk handarü.

³Kheaküshe Davidnü Hamath lim lakhi, Zoba kiulongthsüpuh Hadadezer, Euphra ayung ching mümih-lung khimpü yüchoki yankhit.

⁴Davidnü api kheaknü khora-lolungbe 1000, khora-bonungrü 7000, tüsho jing-bonungrü 20,000 lu. Davidnü khora le lolungbebo alala lipshak, tüshe 100 aningshih.

⁵Küyimki Damaska ching lakhi Siriarünü Zoba kiulongthsüpuh Hadadezer rungpü arükhea, Davidnü Siriarü 22,000 laksah.

⁶Judüki Davidnü Damaska ching lakhi Siria ching bonungrü binpung thsüjih; tüsho Siriarü ju David mihtsürü kamabah, tüsho ruk handarü. Api yüpungbo ching ATUNGPUHNÜ David kilim akuk ngüshih.

⁷Hadadezer yamlarübonü ashuhkhi suna tsungbo Davidnü lu, tüsho Jirusalem ching handarü.

⁸Hadadezer kiutobo Tibhath tüsho Kun chingnü Davidnü müwayinchi ahihdo lu; junü Solomonnü müwayinchi kekung, dungjingbo tüsho müwayinchi pungphurubo thsü.

⁹Küyimki Zoba kiulongthsüpuh Hadadezer bonungrü alala Davidnü kukdo de Hamath kiulongthsüpuh Tounü asokhea,

¹⁰apinü atsührü Hadoram, David kiulongthsüpuh ki asühde makshe jihpü yüshih, tümütüsho apinü Hadadezer bede keochih tüsho api kuk. Kheakü Hadadezernü Tou kheak kim abande thirithsüde alakheah; tüsho Hadoramnü suna, shotoyinchi, tüsho müwayinchi kukruk mungjibo alala handarü;

¹¹kiulongthsüpuh Davidnü Edom, Moab, Amonrü, Filistiarü tüsho Amalek trükshihbo kheaknü lude arükhi shotoyinchi tüsho suna she ATUNGPUH kilim müsühkhit.

¹²Zeruia tsührü Abishainü Edomrü 18,000 thimi jindükhün chingnü laksah.

¹³Apinü Edom ching bonungrü binpung thsü; tüsho Edomrü alala David mihtsürü kam. Tüsho api yüpung alala ching ATUNGPUHNÜ David kilim akuk ngüshih.

¹⁴Jumonü Davidnü Israel kurungkheak kiulongthsü; tüsho apinü anihbuh mihtsürü alala ki thiyuro tüsho alungki rhimo.

¹⁵Zeruia tsührü Joab ju bonungrü kurungkheak lakheah; Ahilud tsührü Jehoshaphat athrütyukrü lakheah;

¹⁶Ahitub tsührü Zadok tüsho Abiathar tsührü Ahimelek amükeamrübo lakheah; Shavsha athrütbuh lakheah;

¹⁷Jehoiada tsührü Benania ju Kereth tüsho Peleth kurungkheak lakheah; tüsho David tsührübo ju kiulongthsüpuh tankihpü ching atorübo lakheah.