Read Yimchungru Naga 1 Kiuthsü 20 Bible Online

1 Kiuthsü 20 - Yimchungru Naga bible

1 Kiuthsü 20

¹Kiulongthsürübo thirithsü yükhi kim, mumükin ching, Joabnü bonungrü bebah Amonrü lomi thsümünimjih, tüsho arübah Rabba yan. Tüshe David a Jirusalem ching lakheah. Joabnü Rabba zündo tüsho yanabah.

²Davidnü arü kiulongthsüpuh kuthran anihbuh ku kheaknü lu; apinü ju suna khahngak 34 bande adünkhit, tüsho ju ching shotolungbo lakheah; tüsho ju David ku kheak thranjih. Apinü kiuto chingnü ayankhikhi she khide hihde lubah arü.

³Apinü ju ching lakhi mihtsürübo bekhit, tüsho sangrhütbe le thuwuh müzhean tüsho awübo shuhbah rhimoshih. Hanangde Davidnü Amonrü kiutobo alala kheak rhimo. Jushu David tüsho mihtsürü alala Jirusalem lim alodarü.

⁴Ha dunglim, Gezer ching Filistiarü kheak thirithsü akhiuk; judüki Husharü Sibbekainü atoshang tsühsoniuso bolungnü Sippai laksah; tüsho Filistiarü khenoabah.

⁵Kheaküshe Filistiarü kheak thirithsü lakheah; tüsho Jair tsührü Elhanannü Gitrü Goliath niurü Lami laksah, api thsühphi ju khim-keakrü khümku nangde alakheah.

⁶Kheaküshe Gath ching thirithsü lakheah, ju ching atoshang mihtsürü khah abande yingkhing 6, tüsho müphü abande yingmünüpü 6, thsürubah 24 lakheah; api she atoshang chingnü trükkhitde arükheah.

⁷Küyimki apinü Israel müneahkhea, David niurü Shimea tsührü Jonathannü api laksah.

⁸Harü ha Gath ching atoshang kheaknü atrükkhitkheah; arübo David tüsho api yamlarübo khah hode keamabah.