Read Yimchungru Naga 1 Kiuthsü 21 Bible Online

1 Kiuthsü 21 - Yimchungru Naga bible

1 Kiuthsü 21

¹Arimrinü Israel azhihde wusu, tüsho Israel mihtsürü kheshihpü David ki athsung.

²Jumonü Davidnü Joab tüsho bonungrü wühkenorübo ki tha, “Yüang, Beersheba chingnü Dan khiungde Israel kheang, tüsho I kilim thiyusheak lubah arang, junangde inü arü khekhi mükheahbah.”

³Tüshe Joabnü tha, “ATUNGPUHNÜ api mihtsürü khekhi chinü alübe kamshang! I tungpuh kiulongthsüpuh, arü alala I tungpuh yamlarübo yung de? Dale küde thsah I tungpuhnü ha lunela? Tümüde apinü Israel kheak amülim hande arüpü?”

⁴Tüshe kiulongthsüpuh yunü Joab azhihde kukabah. Jumonü Joabnü chamachih tüsho Israel alala ching yü, tüsho Jirusalem ching alode arü.

⁵Joabnü mihtsürü khekhi alala David kilim jih. Israel mihtsürü alalanü nuk shuhrü 1,100,000, tüsho Juda ching 470,000.

⁶Tüshe apinü akhekhi ching Levi tüsho Benjamin müthsüru, tümüde kiulongthsüpuh yukhümnü Joab kilim mümülü.

⁷Tüshe hadürü ching Thrünpuhnü masühde alakheah, tüsho apinü Israel shik.

⁸Davidnü Thrünpuh ki tha, “Inü ha rhimokhinü tode neak yihbeakdo. Tüshe kheakü, inü nü ki tamkhüntamnüchoh, nü yamlarü mülimkhi lude tsoang; tümüde inü khide makhade rhimodo.”

⁹ATUNGPUHNÜ David yo wukihbuh Gad ki asuk,

¹⁰“Yüang tüsho David ki thaang, ‘ATUNGPUHNÜ ha thachoh: Inü nü kilim mahsam jihchoh; arü bolung khülang mokhitang, junangde inü nü kilim rhimobah.’ ”

¹¹Jumonü Gadnü David kilim arü tüsho api ki tha, “ATUNGPUHNÜ ha thachoh, ‘Nünü mokhitang:

¹²kam mahsam khümzung a shi; yungsho nü riri nukshangnü khinu mahsam nü yanpü; yungsho ATUNGPUH nukshangnü nimung mahsam ATUNGPUH yunirünü Israel lomi alala thsümünimde arüm arüpü.’ I thiyibuh kilim tümü lulobah ayübanü kheakü alokhiang.”

¹³Judüki Davidnü Gad ki tha, “I lümthsünü ato ching lah; I ATUNGPUH khah ching keamshang, tümüde api amüthsüm khide tolah; tüshe I mihtsürü khah ching mükeamnü.”

¹⁴Jumonü ATUNGPUHNÜ Israel kheak tukthsü khülang yüshih; tüsho Israel ching mihtsürü 70,000 keamabah.

¹⁵Tüsho Jirusalem thsümünimshihpü Thrünpuhnü yunirü khülang yüshih; tüshe küyimki apinü athsümünimpü thsükhea, ATUNGPUHNÜ thsümütsü dünkheak lümalo; apinü athsümünimrü yunirü ki tha, “Suhdo! Nü khah tukloang.” Judüki ATUNGPUH yunirü ju Jebusrü Arauna hinitpung ki zhipde alakheah.

¹⁶Davidnü abinkih-a kheah tüsho thüning le alo dükeak ATUNGPUH yunirü zhipa ngü, tüsho nukshang khülang Jirusalem kumung dünkih-a api khah ching shuh. Judüki David tüsho azothsürübonü shungliukhim phuyubah khukning.

¹⁷Tüsho Davidnü Thrünpuh ki tha, “Mihtsürü kheshihpü thiyukhüm jihkhi I yung de? Neak yihbeakkhi tüsho khide amütsü rhimobuh I. Tüshe harü namfimihnubo, arünü tümü rhimoa la? O ATUNGPUH I Thrünpuh, inü tamkhüntamnüchoh, nü khahnü I tüsho I buh yamkhün kheak azhihang; tüshe nü mihtsürübo dürümshih!”

¹⁸Judüki Davidnü wutubah Jebusrü Arauna hinitpung kheak ATUNGPUH kilim kingaün sadam khülang thsüpü thsüde api ki thashihpü ATUNGPUHNÜ Gad ki thiyukhüm jih.

¹⁹Jumonü Gadnü ATUNGPUH mung chingnü asukde athakhi yande Davidnü wutu.

²⁰Araunanü rholo tüsho yunirü ngü; tüsho api lung lakhi atsührü 4 jikabah, Araunanü mutuklode wheat hi nit.

²¹David ju Arauna kilim arübah Araunanü kheah tüsho David ngü; apinü hinitpung chingnü wukhiuk, tüsho api miro alo lim mükhümde David kheak akin jih.

²²Davidnü Arauna ki tha, “I kilim hinitpung lopung jihang, junangde inü ju kheak ATUNGPUH kilim kingaün sadam khülang thsüanü — ju I kilim adün mokhi chingnü jihang — junangde arüm ju mihtsürübo kheaknü atuklobah.”

²³Judüki Araunanü David ki tha, “Luang; tüsho I tungpuh kiulongthsüpuhnü api tsükhi rhimoang; kheahang, taka kingaünpü inü moshipung tüsho rhimopung khimkhi atakbe-sang thsüpü, tüsho hi kingaünpü wheat hi, inü ha alala jihchoh.”

²⁴Tüshe kiulongthsüpuh Davidnü Arauna ki tha, “Yung, inü jurübo adün khiukde jihbah athulobah. I ki amo mulude ATUNGPUH thsungkheak nü yo, yungsho taka kingaünbe mulu.”

²⁵Jumonü Davidnü suna shonakbo 600 adünbah alopung thsungkheaknü Arauna kilim jih.

²⁶Davidnü ju ching ATUNGPUH kilim kingaün sadam khülang thsü tüsho taka kingaünkhi le mungtsü kingaünbo jih. Apinü ATUNGPUH ki ji, tüsho apinü taka kingaünkhi kingaün sadam kheak thüning chingnü mo akishihde api ki alojih.

²⁷Jushu ATUNGPUHNÜ yunirü ki thiyukhüm jih, tüsho apinü anihbuh nukshang nuktrüp ching yuklo.

²⁸Ju kim ching, küyimki Jebusrü Arauna hinitpung ching ATUNGPUHNÜ api ki alojihkhi Davidnü angükhea, apinü ju ching laksah-a kingaün.

²⁹Tümüde sunglo ching Mosanü athsükhi ATUNGPUH arüngkhimyam, tüsho taka kingaünbe kingaün sadam ju kim ching Gibeon ching achang dangpungbo kheak lakheah;

³⁰tüshe Davidnü ATUNGPUH ki keokhipü ju miki müyükhuk, tümüde apinü ATUNGPUH yunirü nukshang trede alakheah.