Read Yimchungru Naga 1 Kiuthsü 22 Bible Online

1 Kiuthsü 22 - Yimchungru Naga bible

1 Kiuthsü 22

¹Judüki Davidnü tha, “Ha kheak ATUNGPUH Thrünpuh yam labah tüsho ha kheak Israel thsungkheak taka kingaünpü kingaün sadam labah.”

²Davidnü Israel lomi ching larü khiungkerübo mukhungpü thiyukhüm jih, tüsho Thrünpuh yam thsüpü thsungkheaknü lung sümshihpü lung kheanrübo rhimoshih.

³Kheaküshe Davidnü yinchi ahihdo ripitbo thsungkheak müzam-nini, atholobe yinchi, tüsho müwayinchi she madünbinde jih,

⁴tüsho mükhebinkhi cedar sangthulungbo — tümüde Sidonrü le Tairrünü cedar hihdakde David kilim handarü jih.

⁵Kheakü Davidnü tha, “I tsührü Solomon azürü ah tüsho mürhimoakheah, tüsho ATUNGPUH thsungkheak thsüpü thüyam ju khide atsüdakbe, athukhi tüsho lomi alala ching müretahkhi labeah; inü ju thsungkheak tsanglungbah.” Jumonü Davidnü api müsheyide kukrukbo hihdakde tsanglunga zojih.

⁶Judüki apinü atsührü Solomon ji tüsho Israel Thrünpuh, ATUNGPUH yam thsüpü api ki thiyukhüm jih.

⁷Davidnü Solomon ki tha, “I tsah-a, inü ATUNGPUH I Thrünpuh mung ching thüyam khülang thsüpü lümkheah.

⁸Tüshe ATUNGPUH yu I ki arü, ‘Nünü thiyih hihde bukdo tüsho hihde thirithsüdo; nünü I mung ching thüyam müthsü, tümütüsho alomi ching I miki nünü hihde thiyih bukdo.

⁹Kheahang, tsührü khülang nü kilim zübejihbah; api mungtsü mihtsürü labah. Inü thrip abande api riribo kheaknü api kilim mungtsü jihbah; tümüde api mung Solomon labah, tüsho inü api nimungbo ching Israel kilim mungtsü tüsho keamram jihbah.

¹⁰Apinü I mung thsungkheaknü thüyam khülang thsübah. Api I tsührü thsübah, tüsho I anihbuh abuh thsübah, tüsho inü api kiulongthsü-binkiu Israel ching lünnü alashihbah.’

¹¹Kheakü, I tsah-a, ATUNGPUH nü lung lashang, junangde apinü nü ki thakhi nangde, ATUNGPUH nü Thrünpuh yam akuk ngüde thsang.

¹²ATUNGPUHNÜ lang nü kilim mükheahmudu tüsho lümlung jihshang, junangde apinü nü Israel kurungkheak limberü thsüshihchoki nünü ATUNGPUH nü Thrünpuh yakzan anibah.

¹³Judüki Israel thsungkheak ATUNGPUHNÜ Mosa ki thiyukhüm jihkhi yakzan thsükhibo tüsho thiyuzüngbo kümkangde yansho nü akuk ngübah. Reangzahang tüsho mulong toang. Dütre yungsho mulong dünini.

¹⁴Khide küpkhukde ATUNGPUH yam thsungkheak inü suna khahngak chithürü 3400, shotoyinchi khahngak chithürü 34,000, tüsho müwayinchi le yinchi madünbinde jihdo, tümüde ju hihdakde lah; sangrhütkhi tüsho lung she inü jihdo. Ha ching nünü yimajakbeah.

¹⁵Nü lung rhimorü suhdahde lah: lungkheanrü, lungzünrü, sangrhimosorü, tüsho mükhekhamkhi mungji alala kizükidorü, rhimopü ching athsüso

¹⁶suna, shotoyinchi, müwayinchi, tüsho yinchi thsungkheak lah. Kheakü rhimo tankihang, tüsho ATUNGPUH nü lung lashang.”

¹⁷Davidnü api tsührü Solomon rungpü Israel limberü alala ki thiyukhüm jihde tha,

¹⁸“ATUNGPUH nüsa Thrünpuh nüsa lung müla de? Apinü thrip abande nüsa kilim mungtsü müjih de? Tümüde apinü lomi ching larübo I khah ching jihdo; tüsho lomi ju ATUNGPUH le api mihtsürü müngüh khenoa lah.

¹⁹Kheakü nüsa lümkhi tüsho mulong ATUNGPUH nüsa Thrünpuh yimpü zoang. Junangde ATUNGPUH Thrünpuh arüngyam thsümusuang, tüsho ATUNGPUH tangzüng sangdan tüsho Thrünpuh yo amüsüh kukrukbo ATUNGPUH mung ching thsükhi yam ching hande yüzahbah.”