Read Yimchungru Naga 1 Kiuthsü 26 Bible Online

1 Kiuthsü 26 - Yimchungru Naga bible

1 Kiuthsü 26

¹Ripit neakrü chamnakkhi: Korarü, Asaph kheak yo Kore tsührü Meshelemia.

²Meshelemia tsührübo: adüjibuh Zekaria, mahnepü Jediael, asampü Zebadia, aphüyipü Jathniel,

³aphüngüpü Elam, athurukpü Jehohanan, athünepü Eliehoenai.

⁴Obed-edom tsührübo: adüjibuh Shemaia, mahnepü Jehozabad, asampü Joa, aphüyipü Sakar, aphüngüpü Nethanel,

⁵athurukpü Ammiel, athünepü Issakar, atizheahpü Peullethai; tümüde Thrünpuhnü api müngühjih.

⁶Api tsührü Shemaia kilim she tsührübo zübejihbah arünü arü jipürü yamkhünbo ching thiyuzüng shuh, tümüde arübo tode athsükhukrü mihtsürübo lakheah.

⁷Shemaia tsührübo: Othni, Rephael, Obed, tüsho Elzabad, arü keoniorü Elihu tüsho Semakia ane athsükhuk mihtsürü lakheah.

⁸Harü alala, Obed-edom tsührübo lung arü tsührübo tüsho keoniorübo tankihpü ching athülünkhi mihtsürübo lakheah; Obed-edom tsühsoniusobo 62.

⁹Meshelemia tsührübo keoniorübo lakheah, athsükhuk mihtsürübo 18.

¹⁰Merarirü Hosa tsührübo: Shimri adüjibuh (tümüde api adüjibuh yungyung she, abuhnü api adüjibuh kamshih),

¹¹mahnepü Hilkia, asampü Tebalia, aphüyipü Zekaria: Hosa tsührübo tüsho keoniorübo alalanü 13.

¹²Harü ripit neakrübo arü limberübo ayannü achamnakkhi ha arü keoniorübonü arhimokhi nangde ATUNGPUH yam ching tankihpü lakheah;

¹³tüsho arünü arü ripitbo thsungkheak anini tüsho ato chido, jipürü yamkhün ayannü azan thsü.

¹⁴Aniakhiuklim thsungkheak zan ju Shelemia kheak akhiuk. Arünü api tsührü Zekaria, ayiukdak lümthiyan jihrü thsungkheak she azan thsü, tüsho api zan ju dukulim thsungkheak akhiuk.

¹⁵Obed-edom düjinglim thsungkheak akhiuk tüsho atsührübo kukruk zowupung aheangshih.

¹⁶Shuppim tüsho Hosa thsungkheak Shalleketh ripit kheak awutu limro aniyüzahlim thsungkheak akhiuk. Aheangrü kim ju khindungachihde chamjih.

¹⁷Aniakhiuklim nimung abande Levirü 6 lakheah, dukulim nimung aban 4, düjinglim nimung aban 4, kheaküshe, kim khülang ching kukruk zowupung mahnene;

¹⁸aniyüzahlim ripit ching nimung abande aheangrü limro ching 4, tüsho limyün ching 2.

¹⁹Harü ha Korarü tüsho Merari tsührü bolung ching ripit neakrü chamnakkhi lakheah.

²⁰Tüsho Levirü bolung, Ahija a Thrünpuh rahpung-yam tüsho amüsühkhitkhi thsambahbo rahpung neakrü lakheah.

²¹Gershonrü tsühsoniusobo Ladan tsührübo, Gershonrü Ladan guk ching akubo: Jehieli.

²²Jehieli tsührübo, Zetham tüsho aniurü Joel ane ATUNGPUH yam rahpungbo neakde alakheah.

²³Amramrü, Izharrü, Hebronrü, tüsho Uzzielrü:

²⁴Mosa tsührü Gershom tsührü Shebuel ju rahpung neakpü ching atobuh lakheah.

²⁵Api keoniorübo: Eliezer kheaknü atsührü Rehabia, atsührü Jeshaia, atsührü Joram, atsührü Zikri, tüsho atsührü Shelomith.

²⁶Ha buh Shelomith tüsho akeoniorübo ju kiulongthsüpuh David guk ching akubo, chithürübo tüsho chibo torübo, tüsho bonungrü wühkenorübo amüsühkhit thsambahbo rahpung alala aheangrü lakheah.

²⁷Arünü thirithsükhi ching yankhikhi kukruk lubah ATUNGPUH yam ching yihnüpü thsungkheak müsühkhit.

²⁸Kheaküshe angürü Samuel, Kish tsührü Saul, Ner tsührü Abner, tüsho Zeruia tsührü Joab arünü müsühkhitkhi thsambahbo alala Shelomith tüsho api keoniorünü kümde alakheah.

²⁹Izharrü, Kenania tüsho api tsührübo Israel thsungkheaknü atorübo tüsho mahkhaprübo nangde mokhita wungdo aheangshih.

³⁰Hebronrü, Hashabia tüsho api keoniorübo athsükhuk mihtsürü 1700 ATUNGPUH rhimo tüsho kiulongthsüpuh tankih rhimo alala thsungkheak Jordan aniyüzahlim Israel thsungkheak aheangpü lakheah.

³¹Hebronrü lung, Jerija Hebronrü yo limbebuh lakheah. (David kiulongthsükhi kam yirüpü ching tsühsoniuso guk yande yimakheah, tüsho arü bolung tode athsükhuk mihtsürübo Gilead ching lakhi Jazer ching yimkhit.)

³²Kiulongthsüpuh Davidnü api le akeoniorübo athsükhuk mihtsürü 2700, guk ching akubo Thrünpuh yo alala tüsho kiulongthsüpuh yihnübe thsungkheak, Reubenrü, Gadrü tüsho Manase trük chamkhüh kheahshihpü mokhit.