Read Yimchungru Naga 1 Kiuthsü 28 Bible Online

1 Kiuthsü 28 - Yimchungru Naga bible

1 Kiuthsü 28

¹Davidnü Israel torübo alala, trükbo torübo, kiulongthsüpuh tankihpü chamnakkhi torübo, chithürübo tüsho chibo kurungkheak wühkenorübo, lakhit-kukruk alala tüsho kiulongthsüpuh le api tsührübo moshibo atoathüprü, ju lung kiulongthsüpuh yam torübo, athrungrü thirithsürübo, tüsho thirithsürü alala Jirusalem ching bemukhung.

²Judüki kiulongthsüpuh Davidnü wusubah arü miki zhip tüsho tha: “I ki aniang, I keoniorübo tüsho I mihtsürübo. ATUNGPUH tangzüng sangdan zopü, isa Thrünpuh jing dubopung thsungkheak inü thüyam khülang thsüpü lümkhi thsüdo; tüsho athsüpü thsungkheak inü tsanglungdo.

³Tüshe Thrünpuhnü I ki tha, ‘Nünü I mung thsungkheak thüyam müthsü, tümüde nü a thirithsürü ah tüsho thiyih bukdo.’

⁴Tütüshe Israel kurungkheak lünnü kiulongthsürü thsüpü ATUNGPUH Israel Thrünpuhnü isa jipürü yamkhün alala chingnü I mokhit; tümüde apinü Juda limberü mokhit, tüsho I buh Juda yamkhün ching, I buh tsührü bolung ching apinü I Israel alala kurungkheak kiulongthsürü thsüshihpü kün.

⁵Tüsho I tsührübo lungnü (tümüde ATUNGPUHNÜ I kilim tsührü ahihdo jih) apinü I tsührü Solomon Israel kurungkheak A TUN GPU H kiulongthsü-binkiu kheak binpü mokhit.

⁶Apinü I ki tha, ‘Nü tsührü Solomonnü I yam tüsho I khikzhakpungbo thsübah, tümüde api I tsührü khülang thsüpü inü mokhit, tüsho I api abuh thsübah.

⁷Apinü khihni rhimokhi nangde, apinü I yakzanbo tüsho I yukhümbo kümkangde anisho, inü api kiulongthsü lünnü alashihbah.’

⁸Kheakü jumonü Israel alala mikinü, ATUNGPUH yo amukhungrü, tüsho isa Thrünpuhnü sode, ATUNGPUH nüsa Thrünpuh yukhüm alala leangkhiang tüsho kümkangde yimang; junangde ha lo atsü nüsanü alubah, tüsho nüsa dunglim lünnü nüsa tsührübo yamrüplurüp thsungkheak zojihbah.

⁹“Tüsho nü, I tsührü Solomon, nü buh Thrünpuh mükheahang, tüsho lümkhi khülang tüsho akünkhi mulongnü api tankihang; tümüde ATUNGPUHNÜ sulüm aban yimchoh, lümkhi tüsho lümzülümdo aban mükheahchoh. Nünü api yimsho, api nünü angübah; tüshe nünü api bahyuksho, apinü lünnü nü bahyukbah.

¹⁰Kheakü aniang, tümüde amüsüh dangpung yam khülang thsüpü ATUNGPUHNÜ nü mokhitdo; reangzahang, tüsho rhimoang.”

¹¹Judüki Davidnü api tsührü Solomon kilim arüngyam mükü, thüyambo, rahpungbo, akube khiungshakbo, alungbe khiungshakbo, tüsho mihmüthsüm binkiu thsungkheak lümkhi jih;

¹²tüsho api lüm ching lakhi lümkhi alala: ATUNGPUH yam ching khikzhakpungbo thsungkheak, khiungshakbo mühi alala, Thrünpuh yam rahpungbo, tüsho amüsühkhitkhi thsambahbo thsungkheak rahpungbo;

¹³amükeamrübo le Levirü chamnak, tüsho ATUNGPUH yam ching arüngako rhimo alala thsungkheak; ATUNGPUH yam ching arüngakobe pungphuru alala,

¹⁴arüngako abande pungphuru alala thsungkheak suna adünkhi, arüngako aban thsungkheak shotoyinchi pungphurubo adünkhi,

¹⁵suna tsünpung dubopungbo tüsho tsünpungbo adünkhi, tsünpung dubopung tüsho tsünpung aban thsungkheak suna adünkhi, arüngako ching yihnüpü lakhi yande, tsünpung dubopung tüsho tsünpung thsungkheak shotoyinchi adünkhi,

¹⁶yikhap rubo ching dükhüm thsungkheak suna adünkhi, shotoyinchi dükhümbo thsungkheak shotoyinchi,

¹⁷tüsho tsapdüthreang, müsühmüra-phuru, tüsho pungbo thsungkheak suna müthsün; suna phurusükbo thsungkheak tüsho ju aban adünkhi; shotoyinchi phurusükbo thsungkheak tüsho ju aban adünkhi;

¹⁸suna tsangkhitkhinü athsükhi rhümthüneabe kingaün sadam thsungkheak, tüsho ju adünkhi; kheaküshe arü ghidükeangbo chutreakbah ATUNGPUH tangzüng sangdan lüpdokhi cherubim thsungkheak suna lolungbe thsüpü lakheah.

¹⁹“Ha alala ATUNGPUH khahnü thrütde, rhimobo lümkhi alala apinü I kilim mükheahshih.”

²⁰Davidnü kheaküshe api tsührü Solomon ki tha, “Reangzahang, tüsho tsüde mulong toang, tüsho rhimoang. Dütre yungsho mulong dünini: tümüde ATUNGPUH Thrünpuh, I Thrünpuh, nü lung lah. ATUNGPUH yam ching arüngako rhimo alala mübanyi khiungde apinü nü müdükhe yungsho nü mübahyuk.

²¹Thrünpuh yam ching arüngako rhimo alala thsungkheaknü amükeamrü tüsho Levirü chamnakbo ha ching lah; tüsho arüngako rhimo amungthürü thsungkheak ayeanzamnü rhimo alala ching nü lung rungbah; kheaküshe atorübo tüsho mihtsürü alala nü yukhüm ching lang alabah.”