Read Yimchungru Naga 1 Kiuthsü 5 Bible Online

1 Kiuthsü 5 - Yimchungru Naga bible

1 Kiuthsü 5

¹Jakob tsührü adüjibuh Reuben tsührübo. ( Api adüjibuh lakheah, tüshe apinü abuh yapkiu müneanjihkhi hode anihbuh azopü yamrüplurüp ju Jakob tsührü Josep tsührübo kilim jih, junangde tsühsoniuso yukhean ching azopü yamrüplurüp ayannü api müthrütyuk;

²api keoniorü bolung Juda adungto kamkam she tüsho yakzanshuhrü api kheaknü arürü she, adüjibuh yamrüplurüp ju Josep yo.)

³Jakob tsührü adüjibuh Reuben tsührübo: Hanok, Pallu, Hezron, tüsho Karmi.

⁴Joel tsührübo: Shemaia, atsührü Gog, atsührü Shimei,

⁵atsührü Mika, atsührü Reaia, atsührü Baal,

⁶atsührü Beera, shepü Tiglath-pileser Asiria kiulongthsüpuhnü ramtso ching bede ayükhea; api Reubenrü lung akubuh lakheah.

⁷Tüsho arü tsühsoniuso lünbo yukhean khekhi ching api buhtsührü yamkhünbo: akubuh Jeiel, tüsho Zekaria,

⁸tüsho Joel tsührü, Shema tsührü, Azaz tsührü Bela, api Nebo tüsho Baalmeon khiungde Aroer ching lakheah.

⁹Api Euphra limpeang loshelo atankihpung khiungde aniakhiuklim she la, tümütüsho arü akamshiwühbo Gilead lo ching bua lakheah.

¹⁰Tüsho Saul nimungbo ching arünü Hagrü kheak thirithsüde, arübo arü khahnü keamabahshih; tüsho Gilead kewung aniakhiuklim alala ching arübonü arü khimyambo ching la.

¹¹Arü khinpü Saleka khiungde Bashan lo ching Gad tsührübo la:

¹²Joel akubuh, Shaphan mahnepü, jushu Janai tüsho Shaphat Bashan ching la.

¹³Tüsho arü gukbo ayannü arü buhtsührübo: Maikel, Meshullam, Sheba, Jorai, Jakan, Zia, tüsho Eber, arü 7.

¹⁴Harü ha Buz tsührü, Jado tsührü, Jeshishai tsührü, Maikel tsührü, Gilead tsührü, Jaroa tsührü, Huri tsührü Abihail tsührübo lakheah;

¹⁵Guni tsührü, Abdiel tsührü Ahi ju arü guk ching akubuh;

¹⁶tüsho arübo Gilead, Bashan tüsho ju kiutobo tüsho Sharon lobo ching arü are rünnü rimlopung alala ching la.

¹⁷Harü alala Juda kiulongthsüpuh Jotham, tüsho Israel kiulongthsüpuh Jeroboam nimungbo ching tsühsoniuso yukhean yande thrüta zo.

¹⁸Reuben, Gad, tüsho aniakhiuklim Manase trükbo ching tsung, thsühnuk, sanglüh shuhsorü athrungrü 44,760 lakheah.

¹⁹Arünü Hagrü, Jetur, Naphish, tüsho Nodab kheak thirithsü;

²⁰arü azhihpü ching arübo rung, tüsho Hagrü le arü lung berü alala arü khah ching jih, tümüde thirithsü ching arünü Thrünpuh ki zhi. Apinü arü tamkhüntamnükhi sojih, tümütüsho arünü api kheak thiyuro lakheah.

²¹Arübonü arü akam-shiwühbo yankhia lu: kemel 50,000, namfimihnu 250,000, donki 2000, aramrü 100,000.

²²Ahihdo laksah, tümütüsho thirithsü ju Thrünpuh lümkhi lakheah. Tüsho ramtsokhi khiungde arübo arü lomi ching la.

²³Aniakhiuklim Manase trük mihtsürübo lomi ching la; arübo Bashan chingnü Baal-hermon, Senir, tüsho Hermon wung khiungde khide mihhihde alakheah.

²⁴Harü ha arü gukbo ching akubo: Epher, Ishi, Eliel, Azariel, Jeremia, Hodavia, tüsho Jadiel, arü gukbo ching athrungrü tüsho mungkhung mihtsürübo lakheah.

²⁵Tüshe arünü arü jipürü Thrünpuh azhihde neak yihbeak, tüsho Thrünpuhnü arü müngüh yankhita bahkhi lomi ching larü mihtsürü thrünpuhbo kheak müzammüram thsü.

²⁶Jumonü Israel Thrünpuhnü Asiria kiulongthsüpuh me ( Tiglath-pileser) thurumusujih, tüsho apinü Reubenrü, Gadrü, tüsho Manase trük chamkhüh Hala, Habor, Hara, tüsho Gozan ayung ching hande yünü kamruhroro laabahshih.