Read Yimchungru Naga 2 Kiuthsü 11 Bible Online

2 Kiuthsü 11 - Yimchungru Naga bible

2 Kiuthsü 11

¹Küyimki Rehoboam Jirusalem ching arükhea, apinü kiulongthsü ngülopü Israel trük bede thirithsüpü Juda yamkhün tüsho Benjamin trük alala trüngmukhung.

²Tüshe Thrünpuh mihtsürü Shemaia kilim ATUNGPUH yu arü:

³Solomon tsührü Juda kiulongthsüpuh Rehoboam tüsho Juda le Benjamin ching Israel alala ki thaang,

⁴“ATUNGPUHNÜ ha thachoh: Nüsa keoniorü azhihde keochihpü duwutu. Mihbüm abannü thüyam lim alode yüang, tümüde hadürü ha I kilimnü ah.” Jumonü arünü ATUNGPUH yu ani tüsho Jeroboam azhihde ayükhi chingnü alode yü.

⁵Rehoboamnü Jirusalem ching la, tüsho apinü thüram thsungkheak Juda ching kiutobo thsü:

⁶Apinü athsükhibo ju Bethlehem, Etam, Tekoa,

⁷Bethzur, Soko, Adullam,

⁸Gath, Maresha, Ziph,

⁹Adoraim, Lakish, Azeka,

¹⁰Zora, Aijalon, tüsho Hebron, harü ha Juda tüsho Benjamin ching chipi ayünkhi kiutobo lakheah.

¹¹Apinü chipi düküngde ayün, tüsho jurü ching wühkenorübo, tsühyungbe zowupung, müdangke, tüsho yukhu ahiuhpü zojih.

¹²Apinü kiuto alala ching tsungbo le thsühbo zojih, tüsho jurübo khide düküngde kamshih. Junangde Juda tüsho Benjamin api bukkhüp lakheah.

¹³Israel alala ching amükeamrü tüsho Levirü arü lomi alala chingnü api kilim arü.

¹⁴Levirünü rimlopungbo tüsho arü lo püpübo zojihbah Juda tüsho Jirusalem ching arü, tümütüsho Jeroboam le atsührübonü ATUNGPUH amükeamrü thsüde tankihkhi chingnü arü tukloshih,

¹⁵tüsho achang dangpungbo, mihnurimri, tüsho apinü athsükhi moshi nunubo thsungkheak anihbuh yo amükeamrübo moyuk.

¹⁶Israel Thrünpuh, ATUNGPUH yimpü mulongrü arü jipürü Thrünpuh, ATUNGPUH kilim laksah-a kingaünpü Israel trük alala chingnü arü dunglim Jirusalem ching arü.

¹⁷Arünü Juda kiulongthsü düküngshih, tüsho kam mahsam thsungkheak Solomon tsührü Rehoboam rung, tümüde arünü kam mahsam thsungkheak David tüsho Solomon limro ching tsah.

¹⁸David tsührü Jerimoth tsührü Mahalath ju Rehoboamnü aniube thsüpü lu, tüsho abe ju Jesse tsührü Eliab tsührübe Abihail.

¹⁹Alibenü api kilim tsührübo zübejih: Jeush, Shemaria, tüsho Zaham.

²⁰Anihbe dunglim apinü Absalom tsührübe Maaka lu, anihbenü api kilim Abija, Attai, Ziza, tüsho Shelomith zübejih.

²¹Rehoboamnü aniube tüsho hanniube püpü alala kheaknü Absalom tsührübe Maaka muzho (apinü aniube 18 tüsho hanniube 60 lu, tüsho tsührü 28 le tsührübe 60 abuh kam.)

²²Rehoboamnü Maaka tsührü Abija api keoniorü bolung akubeatobuh yakzanshuhrü kamshih, tümüde apinü anihbuh kiulongthsürü thsüshihpü lüm.

²³Apinü lüm lade rhimo, tüsho Juda le Benjamin lomibo alala, chipi ayünkhi kiutobo ching api tsührü khürü chama jih; apinü arü kilim suhdahde jih, tüsho arü thsungkheak niuberü ahihdo yimjih.