Read Yimchungru Naga 2 Kiuthsü 14 Bible Online

2 Kiuthsü 14 - Yimchungru Naga bible

2 Kiuthsü 14

¹Jumonü Abija api jipürü lung yap, tüsho arünü api David kiuto ching kiuyukabah. Api tsührü Asanü api müthri. Api nimungbo ching kam thürü mungtsü lakheah.

²Asanü ATUNGPUH api Thrünpuh miki atsü tüsho alungki rhimo.

³Apinü khiungkerü kingaün sadambo tüsho achang dangpungbo lude tso, dungjingbo kingkheam, Ashera thrünbebo kiukheam,

⁴tüsho Judarü ki arü jipürü Thrünpuh, ATUNGPUH yimpü, tüsho yakzan le thiyukhüm zopü thiyukhüm jih.

⁵Apinü Juda kiutobo alala chingnü achang dangpungbo tüsho rhümthüneabe kingaün sadambo yihkhita bah. Tüsho api bukkhüp kiulongthsü mungtsü lakheah.

⁶Lomi sühakhimde alachoki kiutobo thsü. Ju nimungbo ching apinü thiri müthsü, tümüde ATUNGPUHNÜ api kilim mungtsü jih.

⁷Apinü Judarü ki tha, “Isanü harü kiutobo thsanü, tüsho ju rhübo, aheangsadambo, ripitbo tüsho akhrihbebonü mükamdoanü; alomi ju kheaküshe isa yo ah tümütüsho isanü ATUNGPUH isa Thrünpuh yimdo; isanü api yim, tüsho apinü isa kilim thrip abande mungtsü jih.” Jumonü arünü thsü tüsho akuk ngü.

⁸Asa lung atoto tsungbo tüsho thsühbo shuhrü bonungrü 300,000, tüsho tsungbo le sanglüh shuhrü Benjamin chingnü bonungrü 280,000 lakheah; harü alala athrungrü thirithsürübo lakheah.

⁹Sudanrü Zeranü bonungrü chiwung khülang tüsho khoralolungbe 300 bebah arü azhihde akhiuk, tüsho Maresha khiungde arü.

¹⁰Asanü api shorupü wukhiuk, tüsho Maresha ching Zephatha jindükhün ching arünü keochihpü thsakham.

¹¹Asanü ATUNGPUH , api Thrünpuh ki zhi, “O ATUNGPUH , nü thsungkheaknü amürang tüsho ayiuhyiuh dükeak büthsükhi müla. Isa rungang, O ATUNGPUH isa Thrünpuh, tümüde isanü nü kheak düthsün angülah, tüsho nü mung chingnü ha boto azhihde isa arüdo. O ATUNGPUH , nü isa Thrünpuh; mihtsürü shenü nü azhihde dükukshih.”

¹²Jumonü ATUNGPUHNÜ Asa tüsho Judarü müngüh Sudanrü kuk, tüsho arü tsoabah.

¹³Asa tüsho api lung bonungrünü arübo Gerar khiungde müsham, tüsho Sudanrü she lang she rhangdung aninga müla khiungde keamabah; tümüde arübo ATUNGPUH tüsho api bonungrü müngüh thsümünima lakheah. Juda mihtsürübonü ayankhikhi kukruk ato hanbah yü.

¹⁴Arünü Gerar mühi kiutobo alala kuk, tümüde ATUNGPUH trekhi arü kheak lakheah. Arünü kiutobo alala yankhi tüsho ayankhikhi kukruk tode lu.

¹⁵Arünü shiwüh larü khimyambo she yankhi tüsho namfimihnubo, mihnubo tüsho kemelbo suhdahde hanbah tso. Jushu arünü Jirusalem lim alode arü.