Read Yimchungru Naga 2 Kiuthsü 15 Bible Online

2 Kiuthsü 15 - Yimchungru Naga bible

2 Kiuthsü 15

¹Oded tsührü Azaria kheak Thrünpuh me arü.

²Apinü Asa shorupü wukhiuk, tüsho api ki tha, “I ki aniang, Asa, tüsho Juda alala tüsho Benjamin: ATUNGPUH nüsa lung lah, nüsa api lung lah. Nüsanü api yimsho, nüsanü api ngübah, tüshe nüsanü api bahyuksho, apinü nüsa bahyukbah.

³Kim ashangkhüh Israel a thiyuro Thrünpuh mübede, thsangyurü amükeamrü mübede, tüsho yakzan mübede alakheah;

⁴tüshe arü lümthsünükhi ching küyimki arünü ATUNGPUH , Israel Thrünpuh kilim rholokhea, tüsho api yimkhea, api ju arünü ngü.

⁵Ju kimbo ching she thsungkheak she ayüpü yungsho arüpü mukukde alakheah, tümüde küpkhuk atonü lomi ching larü alala thsünü.

⁶Arübo adütre kamde yihthünak, trükshihnü trükshih azhih tüsho kiutonü kiuto azhih, tümüde Thrünpuhnü arü lümthsünü aphuaphunü küpkhuk jih.

⁷Tüshe nüsa, mulong toang! nüsa khahbo dükeakeashih, tümüde nüsa rhimokhi ching thsambah ngübah.”

⁸Küyimki Asanü harü yubo, Oded tsührü Azarianü müchitkhi sokhea, apinü mulong tode kam, tüsho Juda le Benjamin lomi tüsho apinü Ephraim wungbo chingnü ayankhikhi kiutobo alala chingnü athraneanbe sangthsübo yihkhita bah. Apinü ATUNGPUH yam mükü müngüh lakhi ATUNGPUH kingaün sadam thsülo.

⁹Apinü Juda le Benjamin alala, tüsho arü lung hanrü thsüde alakhi Ephraim, Manase tüsho Simeon chingnü bemukhung, tümüde küyimki arünü api lung ATUNGPUH api Thrünpuh lah de angükhea, Israel ching ahihdonü api kilim arüabah.

¹⁰Arübo Asa kiulongthsü kam thürükheak phüngü khinu asampü ching Jirusalem ching mukhung.

¹¹Ju nimung arünü ayankhikhi moshipung 700 tüsho namfimihnu 7000nü ATUNGPUH kilim laksah-a kingaün.

¹²Arünü arü mulong athrünkhinü tüsho arü me athrünkhinü ATUNGPUH , arü jipürü Thrünpuh yimpü tangzüng khülang ching yüzah.

¹³Athunu yungsho ashinkhi, athrürü yungsho aliberü thsüthsü, shepünü ATUNGPUH , Israel Thrünpuh müyimbanü asheshihpü thsü.

¹⁴Arünü düsheak atonü zhide, hulipungpung tüsho shihjuhbo mütde ATUNGPUH kilim thiyuchihchim khülang lu.

¹⁵Juda alalanü thiyuchihchimkhi ching asühachih; tümüde arü mulong athrünkhinü thiyuchihchim, tüsho arü me alalanü api yim, tüsho arünü api ngü, tüsho ATUNGPUHNÜ alala mükamde arü kilim sühakhim jih.

¹⁶Kiulongthsüpuh Asanü abe Maaka she kiulongthsüberü chingnü yihkhita bah tümütüsho alibenü Ashera thsungkheaknü athraneanbe sangthsü khülang thsü. Asanü anihbe sangthsü kiukheam, züthünak, tüsho Kidron ayung chingnü takabah.

¹⁷Tüshe achang dangpungbo Israel chingnü müyihkhit. Judüalalashe Asanü api nimungbo alala ching ATUNGPUH ki thiyuro lakheah.

¹⁸Apinü abuh tüsho anihbuhnü müsühkhitkhi kukrukbo Thrünpuh yam ching hande yüzah — shotoyinchi, suna tüsho pungphurubo.

¹⁹Tüsho Asa kiulongthsü kam samrükheak phüngüpü khiungde thirithsü müladebah.