Read Yimchungru Naga 2 Kiuthsü 18 Bible Online

2 Kiuthsü 18 - Yimchungru Naga bible

2 Kiuthsü 18

¹Kheakü Jehoshaphat lakhit ato tüsho akinashu lakheah; tüsho apinü Ahab kheak yihluachihde arihako.

²Kam anükhüh dunglim api Samaria ching Ahab kilim yüki. Ahabnü namfimihnu tüsho moshipung suhdahde api le api lung bekhi mihtsürübo thsungkheak laksah, tüsho Ramoth-gilead azhihde awutupü api ki thaa huh.

³Israel kiulongthsüpuh Ahabnü Juda kiulongthsüpuh Jehoshaphat ki tha, “Nü I lung Ramoth-gilead azhihde yünahnü?” Apinü anihbuh ki alo, “I nü lung lah, I mihtsürübo ju nü mihtsürübo ah. Isa nü lung thirithsü ching labah.”

⁴Tüshe Jehoshaphatnü she Israel kiulongthsüpuh ki tha, “ATUNGPUH yu thsungkheak akhuhde keoa kheahang.”

⁵Judüki Israel kiulongthsüpuhnü wukihrübo 400 bemukhung, tüsho arü ki tha, “Isa Ramoth-gilead bede keochihpü yüba shi, dashi I müyüba?” Arünü tha, “Wutuang; tümüde Thrünpuhnü ju kiulongthsüpuh khah ching jihbah.”

⁶Tüshe Jehoshaphatnü tha, “Isanü keoa kheahpü thsüde ha ching ATUNGPUH wukihrü püpü müla de?”

⁷Israel kiulongthsüpuhnü Jehoshaphat ki tha, “Isanü api hode ATUNGPUH ki keoakheahpü thsüde kheaküshe Imla tsührü Mikaia lah; tüshe inü api thraneanlah, tümüde apinü küyimkishe I dünkheak tümü she alube mümüchit tüshe thsümütsü lang ah.” Jehoshaphatnü tha, “ Kiulongthsüpuhnü hadürü dütha shi.”

⁸Judüki Israel kiulongthsüpuhnü atorü khülang ji tüsho tha, “Imla tsührü Mikaia nahde bedarang.”

⁹Kheakü Israel kiulongthsüpuh le Juda kiulongthsüpuh Jehoshaphat ane shulünkhim phuyubah kiulongthsübinkiu kheak binde alakheah; tüsho ane Samaria ching yüzah limro ripit ki hinitpung kheak binde alakheah; tüsho wukihrü alalanü ane miki müchitde alakheah.

¹⁰Kenaana tsührü Zedekianü anihbuh thsungkheak yinchi juhbo thsü tüsho apinü tha, “ATUNGPUHNÜ ha thachoh: Arü müdükheakkhamyi khiungde harünü nünü Siriarü khubah.”

¹¹Wukihrübo alalanü rukhüh lang müchit tüsho tha, “Ramoth-gilead ching wutuang tüsho kukang; ATUNGPUHNÜ ju kiulongthsüpuh khah ching jihbah.”

¹²Mikaia jipü yübuh yunithsürünü api ki tha, “ Kheahang, wukihrübo yu rukhühnü kiulongthsüpuh kilim alube thsüde lah; nü yu ju arü yubo nangde thsang, tüsho alübe thsüde asukang.”

¹³Tüshe Mikaianü tha, “ATUNGPUH lale, tümüpürü I Thrünpuhnü thacho, ju inü asukbah.”

¹⁴Küyimki api kiulongthsüpuh ki arükhea, kiulongthsüpuhnü api ki tha, “Mikaia, isa Ramoth-gilead ching keochihpü yüba shi, dashi I müyüba?” Apinü alo, “Wutuang tüsho kukang; arübo nü khah ching jihbah.”

¹⁵Tüshe kiulongthsüpuhnü api ki tha, “Tümü she yung tüshe ATUNGPUH mung chingnü thiyuro I ki thapü küdükhüh ki inü nü ki thiyuchihchimshihba?”

¹⁶Judüki Mikaianü tha, “Namfimihnubo aneakrü mülakhi ruk, Israel alala awungbo kheak hiumüzütkhi inü ngü; tüsho ATUNGPUHNÜ tha, ‘ Harübo aputungrü müla; mihbüm aban mungtsü chingnü thüyam lim yüshang.’”

¹⁷Israel kiulongthsüpuhnü Jehoshaphat ki tha, “Apinü I dünkheak alube tümü she mümüchit, tüshe thsümütsü lang ah de inü nü ki mütha de?”

¹⁸Judüki Mikaianü tha, “Jumonü ATUNGPUH yu aniang; Inü ATUNGPUH lung api yunirübo tsülim tüsho huzulim zhipbah api kiulongthsübinkiu kheak binde ngü.

¹⁹Tüsho ATUNGPUHNÜ tha, ‘ Api wutubah Ramoth-gilead ching keampü thsüde shepünü Israel kiulongthsüpuh Ahab mülapyukba?’ Jushu khülangnü khülang tha, tüsho püpürünü püpü tha.

²⁰Me khülang mikhuh ching arünü ATUNGPUH miki zhipbah tha khiungde, ‘Inü api mülapyukbah.’ ATUNGPUHNÜ api ki keokhi, ‘ Küde thsah?’

²¹Apinü alo, ‘Inü awukhiukbah tüsho api yo wukihrübo alala mün ching akeangyu me thsübah.’ Jushu ATUNGPUHNÜ tha, ‘Nünü api mülapyukbah, tüsho nünü akukbah; wukhiukang tüsho ju rhimoang.’

²²Jumonü nünü kheahang, ATUNGPUHNÜ akeangyu me harü nü yo wukihrübo mün ching yukjihdo; ATUNGPUHNÜ nü thsungkheak thsümütsü thiyukhüm jihdo.”

²³Judüki Kenaana tsührü Zedekianü Mikaia kilim atubah api müchip kheak dam, tüsho tha, “Nü ki asukpü küpü limronü ATUNGPUH me I kheaknü hode?”

²⁴Mikaianü alo, “Nü alungbe khiungshak ching jikpü yükhi nimung ching nünü ayimkhitbah.”

²⁵Judüki Israel kiulongthsüpuhnü thiyukhüm jih, “Mikaia bea lung, tüsho kiuto yo kovünor Amon tüsho kiulongthsüpuh tsührü Joash kilim belobah yüang;

²⁶tüsho thaang, ‘ Kiulongthsüpuhnü ha thachoh: Ha buh ha rihyam ching yukang, tüsho I mungtsü ching malodarüchoki yikhap tüsho ke anüknük kipduhang.’”

²⁷Mikaianü tha, “Mürangkhüh nü mungtsü ching alode arüa lasho, ATUNGPUHNÜ I hode masuk.” Tüsho apinü tha, “Aniang, nüsa mihtsürübo alala!”

²⁸Jumonü Israel kiulongthsüpuh tüsho Juda kiulongthsüpuh Jehoshaphat anenü Ramoth-gilead ching wutu.

²⁹Israel kiulongthsüpuhnü Jehoshaphat ki tha, “Inü I jak müthribah tüsho keochih ching yübah, tüshe nü a nü yo shulünkhimbo phuyuang.” Jumonü Israel kiulongthsüpuh ajak müthri, tüsho arü keochih ching yü.

³⁰Kheakü Siria kiulongthsüpuhnü api yo khora-lolungbe wühkenorübo ki thiyukhüm jih, “Anini yungsho atoto she kheak dükeochih, tüshe Israel kiulongthsüpuh kheak lang.”

³¹Küyimki khora-lolungbe wühkenorübonü Jehoshaphat ngükhea, arünü tha, “Ha Israel kiulongthsüpuh ah.” Jumonü arünü api bede keochihpü rholo; tüsho Jehoshaphatnü zhi, ATUNGPUHNÜ api rung. Thrünpuhnü arübo api kheaknü bede tso,

³²tümüde küyimki khora-lolungbe wühkenorübonü ju Israel kiulongthsüpuh yung de angükhea, arünü api müshamkhi chingnü tuklo.

³³Kheakü mihtsürü khürünü sanglüh hünkih tüsho mümükheahde Israel kiulongthsüpuh thsühnuk thürüngkhi le treangkhümbe dükeak kipyuk; jumonü apinü anihbuh khoralolungbe bebuh ki tha, “Mükamloang, tüsho keochihpung chingnü I bekhitang, tümüde I yurido.”

³⁴Ju nimung keochihkhi takde kam, tüsho Israel kiulongthsüpuhnü arelim khiungde Siriarü kilim peang anguhbah anihbuh khora-lolungbe kheak angükih; jushu ani yüzah dunglim api sheabah.