Read Yimchungru Naga 2 Kiuthsü 19 Bible Online

2 Kiuthsü 19 - Yimchungru Naga bible

2 Kiuthsü 19

¹Juda kiulongthsüpuh Jehoshaphat Jirusalem ching anihbuh yam lim tsüdü lang alode arü.

²Hanani tsührü wukihbuh Jehunü api shorupü wukhiuk tüsho kiulongthsüpuh Jehoshaphat ki tha, “Nünü mihbukmuyuk rungba shi tüsho ATUNGPUH thraneanrü muzhoba shi? Ha dünkheaknü, nü azhihde bukakhiukkhi ATUNGPUH kheaknü wukhiukdo.

³Judüalalashe, atsü khürü nü kheak ngüdo, tümüde nünü Ashera thrünbebo lomi chingnü thsümünimabah, tüsho Thrünpuh yimpü nü mulong zo.”

⁴Jehoshaphat Jirusalem ching lakheah; judüki api Beersheba chingnü Ephraim awung lomi lim mihtsürü bolung alode wukhiuk, tüsho arübo arü jipürü Thrünpuh, ATUNGPUH kilim belode arü.

⁵Apinü chipi ayünkhi Juda kiuto alala abande lomi ching mahkhaprü zojih,

⁶tüsho mahkhaprübo ki tha, “Nüsanü tümü rhimochonü lümakheahang, tümüde nüsanü mihtsürübo thsung thsüde mahmükhap tüshe ATUNGPUH thsung thsüde ah; mahkhap jihkhi ching api nüsa lung lah.

⁷Kheakü ATUNGPUH trekhi nüsa kheak lashang; nüsanü tümü rhimochonü kümkangang, tümüde ATUNGPUH isa Thrünpuh kheak thiyuro azhihkhi yungsho jakkheahkhi, yungsho buknimbo lukhi müla.”

⁸Kheaküshe Jehoshaphatnü ATUNGPUH thsungkheak mahkhapshihpü tüsho neamneamruru mütsanmükhishihpü, Jirusalem ching Levirü le amükeamrübo tüsho Israel guk ching akubo khürü zojih. Tüsho arübo Jirusalem ching lakheah.

⁹Apinü arü ki thiyukhüm jihde tha: “Nüsanü hanangde ATUNGPUH trekhi ching, thiyuro ching, tüsho nü mulong athrünkhinü arhimobah:

¹⁰küyimki kiutobo ching lakhi nü keoniorü kilimnü, thiyih bukkhi, yakzan yungsho thiyukhüm, yakzan thsükhi yungsho thiyuzüng dünkheak nü kilim mahkhappü lude arübanü, nüsanü arü ki thsangdangang, junangde arünü ATUNGPUH miki amülim müthsü tüsho nüsa le nüsa keoniorü kheak bukakhiukkhi marü. Rhimoang, tüsho nüsanü amülim müthsü.

¹¹Kheahang, Amaria amükeam putungpuh ATUNGPUH dünkheak alala ching nüsa kurungkheak lah; tüsho kiulongthsüpuh dünkheak alala ching Israel tsührü Zebadia, Juda yamkhün yo kovünor lah; tüsho Levirünü nüsa ki atorübo thsüde tankihbah. Mulong tode rhimoang, tüsho tsüde arhimorü lung ATUNGPUH lashang!”