Read Yimchungru Naga 2 Kiuthsü 20 Bible Online

2 Kiuthsü 20 - Yimchungru Naga bible

2 Kiuthsü 20

¹Ha dunglim Moabrü le Amonrü, tüsho arü lung Meunrü khürünü Jehoshaphat bede keochihpü arü.

²Yunithsürübo arü tüsho Jehoshaphat ki tha, “Nü azhihde boto ato khülang ke thripkhüh lim, Edom chingnü arüchoh; arübo Hazazon-tamar ching arüabahdo (ju, Engedi.)

³Jehoshaphatnü trede alakheah; apinü ATUNGPUH yimpü thsakham, tüsho Juda alala ching, khümkeak thsüpü zhiyuk.

⁴Judanü ATUNGPUH kilimnü arung yimpü mukhung; Juda kiuto alala chingnü arünü ATUNGPUH yimpü arü.”

⁵Jehoshaphatnü ATUNGPUH yam ching, khikzhakpung aso müngüh Juda tüsho Jirusalem mukhungkhi ching zhip,

⁶tüsho tha, “O ATUNGPUH , isa jipürü Thrünpuh, nü yinmi ching Thrünpuh yung de? Nünü trükshihbo yo kiulongthsübo alala kurungkheak yakzan mushuh de? Nü khah ching wu tüsho sühmüh lah, junangde shenü nü mazhihkhuk.

⁷O isa Thrünpuh, nünü ha lomi ching larü nü mihtsürü Israel müngühnü yankhit, tüsho ju nü müyambuh Abraham tsühsoniusobo kilim lün thsungkheak jihkhi yung de?

⁸Arü ha ching lakheah, tüsho ha ching nü mung thsungkheaknü amüsüh dangpung khülang thsüde tha,

⁹‘ Mürangkhüh isa kheak thsümütsü, nukshang, mahkhap, yungsho mihshe, yungsho khümzung arüsho, isanü ha yam müngüh tüsho nü müngüh zhipbah, tümüde nü mung ha yam ching lah, tüsho isa lümthsünü ching nü ki zhibah, tüsho nünü asobah tüsho khümkhitbah.’

¹⁰Kheakü kheahang, Amon, Moab, tüsho Seir awung mihtsürübo, küpü ching Israelrü Ijip chingnü akhiukchoki nünü müyüzahshihkhea, tüsho küpü chingnü arünü rholokhea tüsho müthsümünimkhea —

¹¹nünü isa kilim yamrüplurüp jihkhi nü yo alakukruk chingnü isa yankhitde athrihloshih.

¹²O isa Thrünpuh, nünü arü kheak mahmükhapba de? Tümüde ha bonungrü boto isa azhihde arükhi kheak isa wu-sühmüh müla. Tümü thsübanü isanü mümükheah, tüshe isa mükbo nü kheak lah.”

¹³Judüki Judarü alalanü arü khungarübo, arü niuberübo, tüsho arü tsührübo bebah ATUNGPUH miki zhip.

¹⁴Judüki ATUNGPUH me amukhungrü phulung chingnü Jahaziel, Zekaria tsührü, Benaia tsührü, Jeiel tsührü, Mattania tsührü, Asaph tsühsoniuso Levibuh kheak akih.

¹⁵Apinü tha, “Aniang, Juda le Jirusalem ching larü alala, tüsho kiulongthsüpuh Jehoshaphat: ATUNGPUHNÜ nüsa ki ha thachoh: ‘ Ha bonungrü boto kheak dütre yungsho mulong dünini; tümüde keochihpü ju nüsa yo yung tüshe Thrünpuh yo.

¹⁶Shido arü azhihde yükiang; arübo Ziz hode atubah; nüsanü arübo Jeruel sunglo müngüh, jindükhün akheam ching ngübah.

¹⁷Ha keochihpü ju nüsanü akeochihbe yung; nüsa zhippung thsakhamang, zhikde zhipang, tüsho nüsa thsung thsüde ATUNGPUHNÜ akukkhi kheahang, O Juda tüsho Jirusalem.’ Dütre yungsho mulong dünini; shido arü azhihde wukhiukang, tüsho A TUN GPU H nüsa lung labah.”

¹⁸Judüki Jehoshaphatnü amiro alo lim kheahde mükhüm, tüsho Judarü tüsho Jirusalem ching larü alala ATUNGPUH miki kingaünde mükhüm.

¹⁹Tüsho Levirü, Kohathrü le Korarünü düsheak khide achangnü ATUNGPUH , Israel Thrünpuh shipü zhip.

²⁰Arünü yapsu mükikde asürü tüsho Tekoa sunglo ching wukhiuk; tüsho arü wukhiukchoki, Jehoshaphatnü zhip tüsho tha, “I ki aniang, O Juda tüsho Jirusalem ching larübo! ATUNGPUH nüsa Thrünpuh kheak kinang tüsho nüsa dübiuopung labah, api yo wukihrübo kheak kinang tüsho nüsanü akuk ngübah.”

²¹Küyimki apinü mihtsürübo kheak lümkhi jihkhea, ATUNGPUH ki khün thsüpü tüsho amüsühdakkhi ching api shipü mokhit, arübonü bonungrü müngüh tha, “ATUNGPUH kilim makshe jihang, tümüde api muzhodakkhi lünnü lah.”

²²Arünü khün thsüpü tüsho mung shipü tankihchoki, ATUNGPUHNÜ Amonrü, Moab, Seir awung, Juda azhihde arürübo yanpü thüram yuk, junangde arübo kukabah.

²³Tümüde Amon le Moab mihtsürünü Seir awung shahde dükheakshihde yan; tüsho küyimki arünü Seir ching larü akheam thsüshihkhea, arünü adükheakshihpü rungachih.

²⁴Küyimki Judarü sunglo ching chinzhinpung arükhea, arünü boto kilim peang kheah; alo kheak ashemibo yapde alakheah; she lang she mutsokhit.

²⁵Küyimki Jehoshaphat tüsho api mihtsürübo arü kheaknü ayankhikhi kukruk lupü arükhea, arünü akam-shiwüh ahihdo, kukrukbo, khimmih tüsho shoto kukrukbo ngü, ju arünü mühankhukpü thsüde mükamyi khiungde arü thsungkheaknü lu; arünü ayankhikhi-kukruk lukhi ching, khide ahihdakkhi hode nimung mahsam bah.

²⁶Nimung phüyi nipü arünü Beraka jindükhün ching mukhung, tümüde ju ching arünü ATUNGPUH shijih; jumonü ju dangpung ki khihni khiungde Beraka jindükhün de ajikheah.

²⁷Jushu Judarü tüsho Jirusalem mihtsürü alala Jehoshaphatnü akuthsübah Jirusalem lim asühde alode yü, tümüde ATUNGPUHNÜ arübo arü riri kurungkheak asühachihshih.

²⁸Arünü bingshang le bingkhung tüsho hulipungpungbo shuhbah Jirusalem ching ATUNGPUH yam lim arü.

²⁹Küyimki arünü Israel riri kheak ATUNGPUHNÜ keochihkhi sokhea, Thrünpuh trekhi lomibo kiulongthsü alala kheak lakheah.

³⁰Tüsho Jehoshaphat kiulongthsü keamramde kam, tümüde api Thrünpuhnü anihbuh kilim mühi alala ching sühakhim jih.

³¹Jumonü Jehoshaphatnü Juda kurungkheak kiulongthsü. Api kiulongthsüpü tankihchoki kam 35 azorü lakheah; apinü Jirusalem ching kam mukukheak phüngü kiulongthsü. Abe mung ju Shilhi tsührübe Azuba lakheah.

³²Apinü abuh Asa limrobo ching tsah tüsho ATUNGPUH miki alungki rhimode, ju chingnü manguh.

³³Achang dangpungbo yihkhita mübah; mihtsürübonü arü jipürü Thrünpuh kheak arü mulong müjihyide alakheah.

³⁴Kheakü aningkhi Jehoshaphat rhimobo, atankihnü akheam khiungde, Israel kiulongthsürübo hüm ching thrütyuka lakhi, Hanani tsührü Jehu yukheanbo ching thrüta lah.

³⁵Ju dunglim Juda kiulongthsüpuh Jehoshaphatnü mihbukmuyuk rhimobuh, Israel kiulongthsüpuh Ahazia lung berung.

³⁶Apinü api lung Tarshish ching yüpü sangkung thsüpü ching berung; arünü sangkungbo ju Ezion-geber ching thsü.

³⁷Judüki Meresharü Dodava tsührü Eliezernü Jehoshaphat azhihde müchitde tha, “Tümütüsho nünü Ahazia lung berungdo, nünü tümü rhimoa lanü ATUNGPUHNÜ thsümünimbah.” Judüki sangkungbo thsümünimabah tüsho Tarshish ching müyükhukde kam.