Read Yimchungru Naga 2 Kiuthsü 26 Bible Online

2 Kiuthsü 26 - Yimchungru Naga bible

2 Kiuthsü 26

¹Judüki Juda mihtsürü alalanü kam 16 azorü lakhi Uzzia bea lu, tüsho abuh Amazia müthri kiulongthsürü thsüshih.

²Kiulongthsüpuh nihbuh jipürü lung yapshu, apinü Eloth thsülo tüsho Juda kilim jihlo.

³Uzzia kiulongthsüpü tankihchoki kam 16 azorü lakheah, tüsho apinü Jirusalem ching kam thünim kiulongthsü. Abe mung ju Jirusalemrü Jekolia lakheah.

⁴Abuh Amazianü arhimokhi nangde apinü ATUNGPUH miki alungki rhimo.

⁵ATUNGPUH trekhi ching api thsangdanbuh Zekaria nimungbo ching apinü Thrünpuh yimpü thsakham; tüsho apinü ATUNGPUH yimkhi amuyung, Thrünpuhnü api müngühjih.

⁶Apinü wukhiuk tüsho Filistiarü bede thirithsü, tüsho Gath chipi le Jabne chipi tüsho Ashdod chipi kingkheam; apinü Ashdod lomi ching tüsho Filistiarü bolung kiutobo thsü.

⁷Thrünpuhnü Filistiarü azhihde, Gur-baal ching lakhi Arabrü azhihde, tüsho Meunrü azhihde api rung.

⁸Amonrünü Uzzia kilim ruk jih tüsho api mungthukhi Ijip aredung khiungde yü, tümüde api khide reangzahde kam.

⁹Uzzianü Jirusalem ching aheangsadambo Amühit Ripit ching, Jindükhün Ripit ching, tüsho Akiklo ching thsü, tüsho chipinü ayündo.

¹⁰Apinü sunglo ching aheangsadam thsü tüsho kekungbo ahihdo kiu, tümüde Shephela tüsho adükhün ane chido ching moshibo hihde alakheah, tüsho api yo thulu-thsürü le kurungasolu wochakrü awungbo ching tüsho atsü lobo ching lakheah, tümütüsho apinü alo muzhode alakheah.

¹¹Kheaküshe Uzzia thirithsü bonungrü, athrütbuh Jeiel tüsho atobuh Maaseianü bemukhungbah achamnakkhi khekhi yande, kiulongthsüpuh yo limthorü bolung khülang, Hananianü khuhlangahuhkhi khüp lakheah.

¹²Jipürü guk akubo alalanü thirithsürü athrungrü 2600 lakheah.

¹³Arü yukhüm khüp wu lade kiulongthsüpuh rungde thiriri bede keochihpü bonungrü 307,500 lakheah.

¹⁴Uzzianü bonungrü alala thsungkheak tsungbo, thsühbo, yinchi kuthranbo, zülu pangkhümpübo, sanglühbo, tüsho ahitpü thsungkheak lungbo jih.

¹⁵Jirusalem ching apinü ayeanzam rhimosorübonü athsükhitkhi külüp-yinchibo, hühzobo, tüsho lung atotobo kippü aheangsadambo tüsho amühitbo kheak zo. Tüsho api mungthu limshude yü, tümüde api reangzahde mükamyi khiungde tode rung.

¹⁶Tüshe küyimki api reangzahde akamkhea, anihbuh thsümünimpü api kükheangde kam. Tümüde apinü ATUNGPUH api Thrünpuh azhihde amülim thsü, tüsho rhümthüneabe kingaün sadam kheak kingaünpü ATUNGPUH arüngyam ching yüzah.

¹⁷Tüshe api dunglim amükeambuh Azaria lung ATUNGPUH yo amükeamrübo amüzhak mihtsürübo 80 yüzah;

¹⁸arünü kiulongthsüpuh Uzzia azhihde zhip, tüsho api ki tha, “Uzzia, ATUNGPUH kilim nünü kingaünpü yung, tüshe kingaün jihpü müsühkhitkhi Aron tsühsoniusobo amükeamrübo thsungkheak ah. Arüngakopung chingnü wukhiukang; tümüde nünü amülim rhimodo, tüsho ATUNGPUH Thrünpuh kilimnü nü kilim tümü akinashu lude marü.”

¹⁹Judüki Uzzianü bukakhiuk. Kheakü kingaünpü thsüde api khah ching rhümthüneabe-takpung lakheah, tüsho küyimki apinü amükeamrübo kheak bukakhiukkhea, ATUNGPUH yam ching rhümthüneabe kingaün sadam ki amükeamrübo mikinü akingkang kheak apham akhiuk.

²⁰Küyimki amükeam putungpuh Azaria, tüsho amükeamrübo alalanü api kheak kheahkhea, api kingkang kheak apham akhiuka lakheah. Arünü api niokheamde bekhit, tüsho anihbuh langzü wukhiukpü niokheam, tümütüsho ATUNGPUHNÜ anihbuh shik.

²¹Kiulongthsüpuh Uzzia ju anihbuh shekhi nimung khiungde apham kih, tüsho apham kihkhinü thüyam büthsüde la, tümüde api ATUNGPUH yam chingnü chamchitabah. Api tsührü Jotham ju kiulongthsüpuh yam ching aberü thsüde, lomi mihtsürü yakzan shuhde alakheah.

²²Kheakü aningkhi Uzzia rhimobo, atankihnü akheam khiungde, Amoz tsührü Isaianü thrüt.

²³Uzzia nihbuh jipürü lung yap; arünü api kiulongthsürübo mibahpung arü phünide kiuyukabah tümüde arünü tha, “Api apham kihlah.” Api tsührü Jothamnü anihbuh müthri.