Read Yimchungru Naga 2 Kiuthsü 28 Bible Online

2 Kiuthsü 28 - Yimchungru Naga bible

2 Kiuthsü 28

¹Ahaz kiulongthsüpü tankihchoki kam 20 azorü lakheah; apinü Jirusalem ching kam thürükheak thuruk kiulongthsü. Api jipürü Davidnü arhimokhi nangde apinü ATUNGPUH miki alungki mürhimo,

²tüshe apinü Israel kiulongthsürü limrobo ching tsah. Apinü Baalbo thsungkheak azünkhi sangthsübo she thsü;

³tüsho apinü Hinnom jindükhün ching kingaün jih, tüsho ATUNGPUHNÜ Israel müngühnü yankhita bahkhi trükshihbonü athraneanbe rhimokhibo yande apinü atsührübo mo ching taka kingaün.

⁴Apinü achang dangpungbo, awungbo kheak tüsho sangdung phüyak aban khüp laksah-a taka kingaünkhibo jih.

⁵Jumonü ATUNGPUH api Thrünpuhnü anihbuh Siria kiulongthsüpuh khah ching jih, apinü anihbuh kuk tüsho api mihtsürü ahihdo rama lubah Damaska ching arü. Api ju Israel kiulongthsüpuh khah ching she jih, apinü ahihdo laksahde api kuk.

⁶Remalia tsührü Pekanü nimung khülang chingnü Juda ching athrungrü bonungrü 120,000 laksah, tümütüsho arünü ATUNGPUH arü jipürü Thrünpuh bahyuk.

⁷Tüsho Ephraimrü athrungrü thirithsübuh Zikrinü kiulongthsüpuh tsührü Maaseia, kiulongthsürü-yam limthobuh Azrikam, tüsho kiulongthsüpuh khin atorü Elkana laksah.

⁸Israel mihtsürünü arü buhtsührü, azoberü, tsührübo tüsho tsührübebo 200,000 rama lu; arünü kukruk ahihdo arü kheaknü yankhia lubah Samaria ching arü.

⁹Tüshe ju ching ATUNGPUH yo wukihrü khülang lakheah, api mung Oded; apinü Samaria ching arükhi bonungrü shorupü wukhiuk, tüsho arü ki tha, “Nüsa jipürü Thrünpuh, ATUNGPUHNÜ Juda kheak bukakhiukmonü, apinü arübo nüsa khah ching jih, tüshe nüsanü bukakhiukde arü laksahkhinü yinmi khiung.

¹⁰Kheakü nüsanü Juda mihtsürü tüsho Jirusalem athrürü tüsho aliberü nüsa yo azhorü nangde ajunopü lümlah. Tüshe ATUNGPUH nüsa Thrünpuh kheak azhihde neak yihbeakkhi hode nüsa tümü la?

¹¹Kheakü I ki aniang, tüsho nüsa keoniorü bolungnü rama lukhi alode yüshang, tümüde ATUNGPUH bukakhiukkhi amüzhak nüsa kheak lah.”

¹²Kheaküshe, Ephraimrü torübo, Johanan tsührü Azaria, Meshillemoth tsührü Berekia, Shallum tsührü Jehizkia, tüsho Hadlai tsührü Amasanü thirithsü chingnü alungrü azhihde zhip,

¹³tüsho arü ki tha, “Nüsanü aramrü ha ching bede marübeah, tümüde kheakü isa kheak neakbo tüsho amülim lakhi kheak khiode ATUNGPUH azhihde isa kheak amülim hande arüpü lümlah. Tümüde isa amülim lakhi ato kamdo, tüsho Israel azhihde bukakhiukkhi amüshak lah.”

¹⁴Jumonü thirithsürübonü aramrübo tüsho ayankhikhi kukruk atorübo tüsho amukhungrü alala miki zojih.

¹⁵Judüki mung tamde ajirübonü wusu tüsho aramrübo ju bea lubah ayankhikhi kukruk chingnü arü bolung bünkeangbo alala kheak khim phuyukihjih; jingkhümpübo jih, jim tüsho ayungbe jih, tüsho arübo kheak müdangke mujujih; tüsho arü bolung mütsahkhukrübo donkibo kheaknü bede ashidungbo lakhi kiuto Jirikho ching arü buhtsührü kilim yü. Jushu arübo Samaria lim alode yü.

¹⁶Ju kim ching kiulongthsüpuh Ahaznü arung thsungkheak Asiria kiulongthsüpuh ki yüshih.

¹⁷Tümüde Edomrünü kheaküshe azahbah Judarü yan, tüsho aramrübo lubah tso.

¹⁸Tüsho Filistiarünü she Phela ching kiutobo tüsho Juda yo Negeb kheak thirithsü, tüsho Beth-shemesh, Aijalon, Gederoth, kiulongbo bede Soko, kiulongbo bede Timna, tüsho kiulongbo bede Gimzo lu; tüsho arübo ju ching laabah.

¹⁹Tümüde Israel kiulongthsüpuh Ahaz dünkheaknü ATUNGPUHNÜ Juda abobe kamshih, tümütüsho apinü marümkheamde Juda ching yakli amütsü huh tüsho ATUNGPUH ki akin mülade kam.

²⁰Jumonü Asiria kiulongthsüpuh Tiglath-pilesernü api azhihde arü, tüsho arungpü müthri api junoabah.

²¹Tümüde Ahaznü ATUNGPUH yam tüsho kiulongthsüpuh le atorübo yam chingnü kukruk khürü lu tüsho Asiria kiulongthsüpuh kilim ruk jih; tüshe junü api murung.

²²Kiulongthsüpuh Ahaznü anihbuh lümthsünü ching lachoki ATUNGPUH kilim alübe thiyuro mülakhi kam.

²³Tümüde apinü Damaska thrünpuhbo kilim kingaün jih, küpünü anihbuh kukkhea, tüsho tha, “Tümütüsho Asiria kiulongthsürübo thrünpuhbonü arü rung, inü arü ki kingaünbah, junangde arünü I rungbah.” Tüshe arü ju anihbuh tüsho Israel alala thsümünimrü lakheah.

²⁴Ahaznü Thrünpuh yam pungphurubo hanmukhung tüsho ju adütre kamde kiuthünak. Apinü ATUNGPUH yam khimdopübo rihkham tüsho anihbuhnü Jirusalem mühit aban ching kingaün sadambo thsü.

²⁵Juda kiuto aban ching apinü jipürü Thrünpuh, ATUNGPUH bukakhiukshih.

²⁶Kheakü aningkhi api rhimobo tüsho api limrobo alala, atankihnü akheam khiungde, Juda tüsho Israel kiulongthsürübo hüm ching thrüta lah.

²⁷Ahaz nihbuh jipürü lung yap, tüsho arünü api Jirusalem ching, kiuto ching kiuyukabah; tüshe arünü api Israel kiulongthsürübo kiuyukbo ching hande müyüzah. Api tsührü Hezekianü anihbuh müthri.