Read Yimchungru Naga 2 Kiuthsü 32 Bible Online

2 Kiuthsü 32 - Yimchungru Naga bible

2 Kiuthsü 32

¹Harü thülünde arhimoshu, Asiria kiulongthsüpuh Sennakeribnü arübah Juda ching yüzah tüsho anihbuh thsungkheak jurü kukpü lümde chipi ayünkhi kiuto yanpü thsakham.

²Sennakeribnü Jirusalem bede keochihpü lümkhi küyimki Hezekianü asokhea,

³kiuto aleanglim ke bukkhibo yihdopü apinü anihbuh torübo tüsho thirithsürübo bebah lümkhi thsü; tüsho arünü api rung.

⁴Mihtsürübo ahihdo mukhung, tüsho arünü lomi bukhokhi kenü tüsho ayung alala yihdode tha, “Tümüde Asiria kiulongthsürübo arübah ke suhdahde angüshihpü?”

⁵Hezekianü müküpde rhimo tüsho keama lakhi chipi thsü; tüsho apinü ju kheak aheangsadambo thsü, tüsho wungdo chipi püpü thsü; apinü David kiuto ching düthrüt she thsakhamlo tüsho thsühnuk le tsungbo suhdahde thsü.

⁶Apinü thirithsürü wühkenorübo ju mihtsürübo kurungkheak mokhit, tüsho arübo kiuto ripit ki wungdo ching rukhüh bemukhung tüsho arü ki mulongtoyu asuk,

⁷“Reangzahang tüsho mulong toang. Asiria kiulongthsüpuh tüsho api lung bekhi boto miki dütre yungsho mulong dünini; tümüde api lung lakhi kheaknü atobe isa lung lah.

⁸Api lung bekhi ju shih yo bonungrü ah; isa lung bekhi a ATUNGPUH isa Thrünpuh, isa rungpü tüsho isa thsung thsüde keochihjihpü lah.” Juda kiulongthsüpuh Hezekianü athakhi yubo hode mihtsürübo mulong tode kam.

⁹Ha dunglim, Asiria kiulongthsüpuh Sennakerib lung api bonungrü alala bebah Lakish ching lachoki, Juda kiulongthsüpuh Hezekia tüsho Jirusalem ching larü Juda mihtsürü alala kilim api yamlarübo Jirusalem ching yüshihde tha,

¹⁰“Asiria kiulongthsüpuh Sennakeribnü ha thachoh: Nüsa tümü kheak mulong ramde, nüsa zündoa lakhi Jirusalem ching la?

¹¹Nüsa khümzung tüsho kethürinü asheshihpü, Hezekianü nüsa ki, ‘ATUNGPUH isa Thrünpuhnü Asiria kiulongthsüpuh khah chingnü isa khümkhitbah?’ de thade bemüchihchoh yung de?

¹²Ha Juda tüsho Jirusalem ki, ‘Nüsanü kingaün sadam khülang miki kingaünbah, tüsho nüsanü ju kheak rhümthüneabe takbah’ de thade api achang dangpungbo tüsho kingaün sadambo hande atsokhi Hezekia yung de?

¹³I tüsho I jirüpürünü püpürü lomi mihtsürübo ki tümü rhimokheanü nüsanü mümükheah de? Jurü lomi trükshih thrünpuhbonü arü mihtsürü I khah chingnü bekhitkhukkhea de?

¹⁴I jirüpürünü shahde adükheakshihkhi trükshihbo thrünpuhbo bolung shepünü api mihtsürü I khah chingnü khümkhitkhukkhi, nüsa Thrünpuhnü I khah chingnü nüsa khümkhitkhukba?

¹⁵Kheakü jumonü, Hezekianü hanangde nüsa dümülapyukshih yungsho dübemüchihshih, tüsho api kheak dükin; tümüde tümü trükshih yungsho kiulongthsü thrünpuhnü api mihtsürü I yungsho I jirüpürü khah chingnü bekhitkhukde mülakheah. Nüsa Thrünpuhnü nüsa I khah chingnü dükde mübekhitkhuk!”

¹⁶Api yamlarübonü alübe thsüde ATUNGPUH , Thrünpuh tüsho api yamlarü Hezekia azhihde tha.

¹⁷Kheaküshe apinü ATUNGPUH Israel Thrünpuh bahyukshihpü tüsho api azhihde kihüm thrütde tha, “Püpürü lomi ching trükshih thrünpuhbonü arü mihtsürü I khah chingnü mübekhitkhi nangde, Hezekia Thrünpuhnü api mihtsürü I khah chingnü mübekhit.”

¹⁸Arünü kiuto lupü thsungkheaknü arü müzünde treshihde, Jirusalem mihtsürü chipi kheak larü ki Ibri yutha chingnü düsheak atonü zhi.

¹⁹Arünü Jirusalem Thrünpuh dünkheak mihtsürü khahnü athsükhi lomi mihtsürü thrünpuhbo nangde asuk.

²⁰Judüki kiulongthsüpuh Hezekia tüsho Amoz tsührü wukihbuh Isaianü ha dünkheaknü tamkhüntamnü tüsho yinmi lim zhi.

²¹Tüsho Asiria kiulongthsüpuh binkheampung ching athrungrü thirithsürü alala tüsho limthorü le atorübo dükheakshihpü ATUNGPUHNÜ yunirü khülang thiyi. Jumonü api mihmuzho mülakhi ching anihbuh lomi lim alode yü. Küyimki apinü anihbuh thrünpuh yam ching arükhea, api tsührübo khürünü ju kheak nukshangnü api kiumülün.

²²Jumonü ATUNGPUHNÜ Hezekia tüsho Jirusalem ching larübo Asiria kiulongthsüpuh Sennakerib tüsho api riri alala khah chingnü khümkhit; apinü thrip abande arü ki mungtsü jih.

²³Ahihdonü Jirusalem ching ATUNGPUH kilim thsambahbo tüsho Juda kiulongthsüpuh Hezekia kilim shoto kukrukbo lude arü, junangde ju kimnü rünbah trükshih alala miki api shuhkih.

²⁴Ju nimungbo ching Hezekia tukthsüde kam tüsho ashepü thsüde alakheah. Apinü ATUNGPUH ki tamkhüntamnü, apinü anihbuh ki alo tüsho amütsan khülang jih.

²⁵Tüshe Hezekianü anihbuh kheak yihnüpü rhimokhi yande malo, tümüde api mulong kükheangde alakheah. Jumonü bukakhiukkhi api le Juda tüsho Jirusalem kheak arü.

²⁶Judüki Hezekianü api mulong kükheangkhi, api tüsho Jirusalem ching larünü mulong rholode kam, junangde Hezekia nimungbo ching ATUNGPUH bukakhiukkhi arü kheak marü.

²⁷Hezekia lakhit ato tüsho wüntrepü lakheah; tüsho apinü anihbuh yo shotoyinchi, suna, shotolungbo, thüneathürabebo, tsungbo, tüsho amo achak kukruk alala thsungkheak rahpung-yam thsü;

²⁸kheaküshe hi, yukhu, tüsho müdangke thsungkheak jakambo tüsho moshi mungji le mihnubo thsungkheak thüyambo thsü.

²⁹Junangde api thsungkheak kiutobo, mihnu tüsho moshi boto suhdahde alakheah; tümüde Thrünpuhnü api kilim lakhit ato jih.

³⁰Ha buh Hezekianü Gihon ke bukkhi akulim yihdo tüsho David kiuto aniyüzahlim yükishih. Hezekianü arhimokhi alala ching akuk ngü.

³¹Kheaküshe, Babilonrü limburü, lomi ching amütsan rhimokhi dünkheak keokhikeorashihpü arünü athiyikhi she, api mulong ching lakhi alala apinü mükheahpü thsüde rükakiakheahpü Thrünpuhnü api kheaknü akhin.

³²Kheakü aningkhi Hezekia rhimobo, tüsho api rhimo atsübo, Amoz tsührü wukihbuh Isaia michih ching, Juda tüsho Israel kiulongthsürü hüm ching thrüta lah.

³³Hezekia nihbuh jipürü lung yap, tüsho arünü api David tsühsoniuso kiuyukbo wung kheak kiuyukabah; tüsho Juda le Jirusalem ching larü alalanü api shechoki wüntre jih. Api tsührü Manasenü anihbuh müthri.