Read Yimchungru Naga 2 Kiuthsü 34 Bible Online

2 Kiuthsü 34 - Yimchungru Naga bible

2 Kiuthsü 34

¹Josia kiulongthsüpü tankihchoki kam 8 azorü lakheah; apinü Jirusalem ching kam samrükheak khülang kiulongthsü.

²Apinü ATUNGPUH miki alungki rhimo, tüsho anihbuh jipürü David limrobo ching tsah; apinü tsülim yungsho huzulim manguh.

³Tümüde kam tizheahpü ching api kiulongthsüchoki, api azürü nunu lachoki, apinü anihbuh jipürü David Thrünpuh yimpü tankih, tüsho kam thürükheak mahnepü ching apinü Juda tüsho Jirusalem achang dangpungbo Ashera sangthsübo, tüsho asümkhi le azünkhi sangthsübo thsümünimpü tankih.

⁴Api mikinü arünü Baal kingaün sadambo lukkheam; apinü jurü mikheak yo rhümthüneabe kingaün sadambo thsümünim. Apinü Ashera sangthsübo tüsho asümkhi le azünkhi sangthsübo thsümünim; apinü jurü asungthulung kamshih tüsho arü kingaünrübo kiuyukbo kheak suka bah.

⁵Apinü amükeamrübo robo she arü kingaün sadam kheaknü tak, tüsho Juda le Jirusalem müsühkhit.

⁶Manase, Ephraim, tüsho Simeon kiutobo tüsho Naphtali khiungde, athsümünimkhibo alala mükamde,

⁷apinü kingaün sadambo lukkheam, Ashera sangthsübo adübün kamde kingnak, tüsho rhümthüneabe kingaün sadambo alala Israel lomi alala ching thsümünim. Jushu api Jirusalem lim alode yü.

⁸Api kiulongthsü kam thürükheak tizheahpü ching, küyimki apinü alo tüsho arüngyam müsühkhitkhea, apinü anihbuh Thrünpuh, ATUNGPUH yam thsülopü, Azalia tsührü Shaphan, kiuto kovünor Maaseia, tüsho Joahaz tsührü athrütyukbuh Joa yüshih.

⁹Arünü achangbe amükeambuh Hilkia kilim arü tüsho Levirü le ripit-limro neakrübonü Manase, Ephraim, tüsho aninga lakhi Israel, Juda, Benjamin tüsho Jirusalem ching larü alala kheaknü thremukhungbah Thrünpuh yam ching lude arükhi sho yihkhita lu.

¹⁰Arünü ju ATUNGPUH yam rhimo kheahrü kilim jih, tüsho ATUNGPUH yam rhimorübonü ju arüngyam asuhlopü tüsho athsülopü jih.

¹¹Arünü Juda kiulongthsürübonü athsümünimshihkhi thüyam thsungkheak azünkhi lung, akaplobe sangrhütkhibo, tüsho abinkiubo thuloshihpü sangrhimosorü tüsho athsürübo kilim jih.

¹²Mihtsürübonü thülünde rhimo thsü. Arü kurungkheak Merari tsührübo Levirü Jahath tüsho Obadia zojih, ju lung Kohath tsührübo Zekaria tüsho Meshullam. Püpürü Levirü, khün-khungbe ching yeanzamrü,

¹³hahmülang hanrü kurungkheak lakheah tüsho tankih rhimorhiyi alala ching rhimorübo ki khuhlanga jih; tüsho Levirü khürü a athrütrü, atorübo, tüsho ripit neakrübo lakheah.

¹⁴Küyimki arünü ATUNGPUH yam ching hande arükhi sho lude wukhiukkhea, Mosa hode ajihkhi ATUNGPUH yakzan amükeambuh Hilkianü ngü.

¹⁵Hilkianü athrütbuh Shaphan ki tha, “Inü ATUNGPUH yam ching yakzan hüm ngüdo;” tüsho Hilkianü hüm ju Shaphan kilim jih.

¹⁶Shaphannü hüm ju kiulongthsüpuh kilim lubah yü, tüsho kiulongthsüpuh ki tha, “Nü yamlarübo kilim thiyikhi alala arünü rhimochoh.

¹⁷Arünü ATUNGPUH yam ching yo sho ju lude wukhiuk tüsho akheahrübo le rhimorü khah ching jih.”

¹⁸Athrütbuh Shaphannü kiulongthsüpuh ki tha, “Amükeambuh Hilkianü hüm khülang I kilim jihdo.” Jushu Shaphannü kiulongthsüpuh ki achangnü khe.

¹⁹Küyimki kiulongthsüpuhnü yakzan yubo sokhea, apinü anihbuh khim thorüp.

²⁰Judüki kiulongthsüpuhnü Hilkia, Shaphan tsührü Ahikam, Mika tsührü Abdon, athrütbuh Shaphan, tüsho kiulongthsüpuh yamlarü Asaia ki thiyukhüm jih:

²¹“Yüang, hüm yubo ngükhi dünkheak, I tüsho Israel le Juda ching aninga larü thsungkheak ATUNGPUH ki keoang; tümüde ATUNGPUH bukakhiukkhi isa kheak dungkihkhi ju ato ah, tümütüsho isa jipürübonü ha hüm ching thrütkhi yande arhimopü, ATUNGPUH yu mania lah.”

²²Jumonü Hilkia tüsho kiulongthsüpuhnü athiyirübonü Hasra tsührü Tokhath tsührü, arüngyam shungliu neakbuh (api Jirusalem ching mahnepü yam ching lakheah) Shallum niube wukihbe Hulda ki yü tüsho ju dünjikhi anihbe ki asuk.

²³Alibenü arü ki tha, “Ha ATUNGPUH Israel Thrünpuhnü thachoh: I kilim thiyibuh mihtsürü ki thaang,

²⁴ATUNGPUHNÜ ha thachoh: Juda kiulongthsüpuh miki khekhi hüm ching thrütkhi muthrumünean alala inü ha dangpung tüsho ju ching larü kheak thsümütsü hande arübah.

²⁵Tümütüsho arünü I bahyuk tüsho püpürü thrünpuhbo kilim rhümthüneabe taka jih, junangde arü khahnü arhimokhi alala hode I bukakhiukshih, I bukakhiukkhi ha dangpung kheak dungkihbah tüsho müyihmüt.

²⁶Tüshe ATUNGPUH ki keokhishihpü nüsa thiyibuh, Juda kiulongthsüpuh ki nüsanü ha thaang: Ha ATUNGPUH , Israel Thrünpuhnü thachoh: Nünü asokhi yubo dünkheak,

²⁷tümütüsho nünü ha dangpung tüsho ha ching larü azhihde api yubo sochoki nü mulong müthri tüsho Thrünpuh miki azhihayihde kam, tüsho nü khim thorüpde I miki trip, inü she nü ki sojihdo, ATUNGPUHNÜ thachoh.

²⁸Inü nü nüsa jipürü lung bede ayübah tüsho nü nü kiuyuk ching mungtsü chingnü yüzahbah; inü ha dangpung tüsho ha ching larü kheak hande arükhi thsümütsü alala nü müknü müngü.” Arünü thiyusheak lubah kiulongthsüpuh kilim yülo.

²⁹Judüki kiulongthsüpuhnü thiyu yüshih tüsho Juda le Jirusalem azothsürü alala bemukhung.

³⁰Kiulongthsüpuhnü Juda mihtsürü, Jirusalem ching larü, amükeamrü tüsho Levirü, mihtsürü alala ato tüsho anini chido bebah ATUNGPUH yam ching wutu; ATUNGPUH yam chingnü angükhi tangzüng hüm yubo alala arünü sode apinü khe.

³¹Kiulongthsüpuhnü anihbuh dangpung ching zhip tüsho ATUNGPUH yanpü, api yukhümbo, yakzanbo, yakzan thsükhibo api mulong athrünkhinü, api me athrünkhinü ayanpü ha hüm ching thrütkhi tangzüng yubo rhimopü ATUNGPUH miki tangzüng khülang thsü.

³²Jushu apinü Jirusalem tüsho Benjamin ching larü alala ki ju kheak thiyuchihchim lushih. Tüsho Jirusalem ching larünü arü jipürü Thrünpuh yo tangzüng yande rhimo.

³³Josianü Israel mihtsürübo yo lomi alala chingnü athraneanbebo lude tso, tüsho Israel ching larü alala ki ATUNGPUH arü Thrünpuh kingaünshih. Api nimungbo alala ching ATUNGPUH arü jipürü Thrünpuh yankhi chingnü rholode mutso.