Read Yimchungru Naga 2 Kiuthsü 4 Bible Online

2 Kiuthsü 4 - Yimchungru Naga bible

2 Kiuthsü 4

¹Apinü müwayinchinü kingaün sadam 1 thsü, ashanglim khahnap 20, atolim khahnap 20, tüsho achanglim khahnap 10.

²Jushu apinü azünkhi kekung thsü; ju thulungde alakheah, atolim khahnap 10, tüsho achanglim khahnap 5, tüsho mükamde khahnap 30.

³Ju bukkhüp moshipung jak nangde, ju aban khahnap 10nü kekung mükamdo; moshipungbo ju khülang khülangnü ru mahne thsüde kekung lung zhipshih.

⁴Ju moshipung 12 kheak zhipshih, 3 dukulim abin, 3 aniyüzahlim abin, 3 düjinglim abin, tüsho 3 aniakhiuklim abin; kekung ju arü kheak zo. Tüsho arü shahmo ju alunglim abin.

⁵Kekung akheahlim yingduk 5; tüsho amünküp ju thrilung sangbün pungkhi, pung münküp ruk lakheah; ju ching pungdüchi 60,000 bande yüzah.

⁶Apinü müsühmüra-phuru thsü, tüsho tsülim peang 5 zo, tüsho huzulim peang 5 zo. Harü ching arünü taka kingaünbe müsüh. Kekung ju amükeamrübo thsungkheak müsühmürapung lakheah.

⁷Amülükhi yande apinü suna tsünpung dubopung 10 thsü tüsho arüngyam ching zo, abolim 5 tüsho akulim 5.

⁸Kheaküshe apinü dükhüm 10 thsü tüsho arüngyam ching zo, tsülim 5 tüsho huzulim 5. Tüsho apinü sunanü müsühmüra-phuru 100 thsü.

⁹Apinü amükeamrübo thsungkheak khikzhakpung, khikzhakpung ato, tüsho khikzhakpung khimdopübo thsü; apinü khimdopübo kheak müwayinchi lüpkih.

¹⁰Apinü kekung ju thüyam nuku yean abolim aniakhiuklim tsangde zo.

¹¹Tüsho Huramnü phühbo, thuwuhbeakbo, tüsho müsühmüraphurubo thsü. Hanangde Huramnü kiulongthsüpuh Solomon thsungkheak Thrünpuh yam kheak thsübebo rhimokham:

¹²dungjing 2, phurusükbo, dungjingbo kheak akudüdap 2; tüsho dungjingbo ku kheak akudüdap phurusük 2 lüpdopü keakruachihde arhimokhi 2;

¹³keakruachihde arhimokhi 2 thsungkheak tsarümkiu 400, dungjingbo ku kheak akudüdap phurusük 2 lüpdopü, keakruachihkhi abande tsarümkiu ru mahne.

¹⁴Apinü dubobo kheak müsühmüra-phurubo kihde thsü.

¹⁵Kekung 1 tüsho ju bukkhüp moshipung 12.

¹⁶Phühbo, thuwuhbeakbo, tsapdüthreangbo, tüsho kukruk alala ATUNGPUH yam ching lupü kiulongthsüpuh Solomon thsungkheak Huramnü müwayinchi pheshahshahkhinü thsü.

¹⁷Jordan dükhün ching jurübo kiulongthsüpuhnü Sukkoth tüsho Zereda dükeak dujung lonü thsü.

¹⁸Solomonnü harü alala hihdakde thsü, jumonü müwayinchi adünpü müyimkhitkhuk.

¹⁹Jumonü Solomonnü Thrünpuh yam ching lakhi kukruk alala thsü: suna kingaün sadam, Thrünpuh kilim jihpü yikhap zopung dükhümbo,

²⁰tsünpung dubopungbo tüsho amülükhi yande alunglim arüngakopung miki takpü suna müthsün tsünpungbo;

²¹sangbünbo, tsünpungbo, tüsho suna müthsün mokhihmüjipbe;

²²mo yünbebo, müsühmüraphurubo, phühlungbo, suna müthsün motakphühbo. Arüngyam limro thsungkheak Khide Amüsüh Dangpung lim alungbe khimdopübo tüsho arüngyam khiunglün-yam khimdopübo suna lüpkih-a lakheah.