Read Yimchungru Naga 2 Kiuthsü 5 Bible Online

2 Kiuthsü 5 - Yimchungru Naga bible

2 Kiuthsü 5

¹Hanangde Solomonnü ATUNGPUH yam thsungkheak rhimobo ban. Abuh Davidnü müsühkhitkhi kukrukbo Solomonnü hande yüzah tüsho shotoyinchi, suna, tüsho pungphuru alala ATUNGPUH rahpung-yam ching zo.

²Judüki Solomonnü Zion de ajikhi David kiuto chingnü ATUNGPUH tangzüng sangdan lude atupü, Israel azothsürübo tüsho trükbo ching akubo, Israelrü jipürü yamkhünbo ching limberübo Jirusalem ching bemukhung.

³Tüsho Israelrü alala khinu thünepü thünio ching kiulongthsüpuh miki mukhung.

⁴Jumonü Israel azothsürü alala arü, tüsho Levirünü sangdan shuh.

⁵Junangde arünü sangdan, ashorupung khimyam, tüsho khimyam ching lakhi amüsüh pungphurubo alala hande atu; amükeamrü tüsho Levirünü jurü hande atu.

⁶Kiulongthsüpuh Solomon tüsho api miki mukhunga larü Israel boto alala arünü müthrütbinkhi yungsho mükhebinkhi namfimihnu tüsho moshipungbo laksah-a kingaünde sangdan miki lakheah.

⁷Jushu amükeamrübonü ATUNGPUH tangzüng sangdan ju azopung thüyam ching alungbe arüngakopung, Khide Amüsüh Dangpung, cherubim ghidükeangbo khüp lude yüzah.

⁸Tümüde cherubim ghidükeangbonü sangdan zopung kumung chutreak, junangde cherubimnü sangdan tüsho akhrihbe sangbo alamdo.

⁹Akhrihbe sangbo khide ashangmonü amünkheambo ju alungbe arüngakopung mikhuh amüsüh dangpung chingnü ngü; tüshe wungdo chingnü jurü müngü; jurübo khihni khiungde lah.

¹⁰Israel mihtsürü Ijip chingnü akhiukshu ATUNGPUHNÜ arü ki tangzüngpung Horeb ching Mosanü ayukkhi lungbeak mahne kheak hode sangdan ching tümü mülade alakheah.

¹¹Kheakü küyimki amükeamrübo amüsüh dangpung chingnü akhiukkhea (tümüde amükeamrübo ju ching larü alalanü arü chamnakkhi mülümde müsühkhit,

¹²tüsho khün thsürü Levirü alala, Asaph, Heman, tüsho Jeduthun, arü tsührübo tüsho buhtsührübo khimthünak atsüdak yihbah, hulipungpung mütrü amükeamrü 120 lung larüpbo, bingshangbo, bingkhungbo shuhbah kingaün sadam aniakhiuklim zhip).

¹³ATUNGPUH kilim rüpde mungshipü tüsho makshe jihpü ju hulipungpung mütrü tüsho khün thsürü rhimo lakheah, tüsho küyimki hulipungpung, larüp tüsho püpü kingzükingdobe shuhbah ATUNGPUH shide khün thsükhea, “Tümüde api tsülah, tümüde apinü düküngde muzhokhi lünnü lah,” ATUNGPUH yam ju amonü miabah,

¹⁴junangde amo lamonü amükeamrübonü tankihpü müzhipkhuk; tümüde ATUNGPUH müretahkhinü Thrünpuh yam mi.