Read Yimchungru Naga 2 Kiuthsü 6 Bible Online

2 Kiuthsü 6 - Yimchungru Naga bible

2 Kiuthsü 6

¹Judüki Solomonnü tha, “ATUNGPUHNÜ api amo amiting ching labah de thado.

²Inü nüsa kilim wüntre-müretah yam khülang, nüsa thsungkheak lünnü alapü dangpung thsüjihdo.”

³Jushu kiulongthsüpuhnü rholo tüsho Israel amukhungrü alala zhipde alachoki arü alala müngühjih.

⁴Tüsho apinü tha, “ATUNGPUH , Israel Thrünpuh shiang, shepü khah hode api münnü I buh David ki alokhikhi dünjishihde tha,

⁵‘Inü I mihtsürübo Ijip lomi chingnü bekhit nimungnü I mung lashihpü thsungkheak thüyam khülang thsüpü Israel trükbo lung küchingnü she kiuto mumokhit, yungsho I mihtsürü Israel kurungkheak yakzanshuhrü inü mumokhit;

⁶tüshe ju ching I mung lashihpü thsüde inü Jirusalem mokhit, tüsho I mihtsürü Israel kurungkheak inü David mokhit.’

⁷ATUNGPUH Israel Thrünpuh thsungkheaknü thüyam khülang thsüpü I buh David lümkhi ching lakheah.

⁸Tüshe ATUNGPUHNÜ I buh David ki tha, ‘I mung thsungkheak thüyam khülang thsüpü nünü tsüde lümakheahdo;

⁹judüalalashe nünü thüyam müthsü, tüshe nü kilim zübejihpü lakhi nü tsührünü I mung thsungkheak thüyam thsübah.’

¹⁰Kheakü apinü alokhikhi ATUNGPUHNÜ rhimokhamdo; tümüde inü I buh David müthri tüsho ATUNGPUHNÜ alokhikhi nangde, Israel kiulongthsü-binkiu kheak bin, tüsho ATUNGPUH Israel Thrünpuh mung thsungkheaknü thüyam khülang thsü.

¹¹Ju ching apinü Israel mihtsürü kheak tangzüngkhi lakhi ATUNGPUH sangdan zo.”

¹²Judüki Solomonnü ATUNGPUH kingaün sadam ki Israel amukhungrü alala miki zhip, tüsho api khahbo chungkhit.

¹³Solomonnü müwayinchi thsangyupung sadam ashanglim khahnap 5, atolim khahnap 5, tüsho achanglim khahnap 3nü thsü tüsho ju sadam kheak zo; tüsho ju kheak api zhip. Jushu apinü Israel amukhungrü athrünkhi miki amukhuknü khukning, tüsho api khahbo thüning lim chungkih.

¹⁴Apinü tha, “O ATUNGPUH , Israel Thrünpuh, yinmi yungsho alomi ching nü nangde Thrünpuh she müla, mulong alalanü nü miki tsahrü nü yamlarübo kheak düküngde muzhokhi ching tangzüng zochoh —

¹⁵nü yamlarü I buh David kheak nünü alokhikhi zo. Atsütsünü, nünü nü münnü alokhi tüsho khihni nü khahnü dünjishihdo.

¹⁶Jumonü, O ATUNGPUH , Israel Thrünpuh, nü yamlarü I buh David ki alokhikhi zoang, küpü nünü api ki alokhide tha, ‘Nü tsührübonü lang nünü I miki tsahkhi ruk I yakzan ching tsahde arünü kümkangde anisho I miki Israel kiulongthsü-binkiu kheak binpü nü müthri küyimkishe mülade müthsü.’

¹⁷Jumonü, O ATUNGPUH , Israel Thrünpuh, nünü nü yamlarü David ki alokhikhi yu dünjishang.

¹⁸“Tüshe atsütsü Thrünpuhnü mihtsürübo lung alomi kheak lapü? Yinmibo, achangbe yinmibonü she nü mazüh, inü athsükhi thüyam ha küdükhüh she ninila!

¹⁹Nü yamlarü tamkhüntamnü tüsho apinü mushukhi lümakheahjang, O ATUNGPUH I Thrünpuh, nü yamlarünü nü ki zhikhi tüsho tamkhüntamnükhi sojang.

²⁰Nünü nü mung zopü alokhikhi dangpung ching, animung tüsho are ha yam lim nü mükbo rhakang, tüsho nünü nü yamlarünü ha yam lim tamkhüntamnükhi sojang.

²¹Tüsho nü yamlarü le nü mihtsürü Israelnü ha dangpung lim tamkhüntamnüchoki arünü mushukhi nü lapung yinmi chingnü sojang; sojang tüsho neak bahjang.

²²“ Khürünü yamhingrü azhihde neak yihbeakbah thiyuchihchim lupü yihnüpü lasho tüsho ha yam ching nü kingaün sadam miki arübah thiyuchihchimsho,

²³nünü yinmi chingnü sojang, rhimoang tüsho nü yamlarübo mahkhapang, amülim larübo ki arü thülünkhinü thsümüchiang tüsho thiyuro larübo dükheang.

²⁴“ Küyimki nü mihtsürü Israelnü nü azhihde neak yihbeakbah arü ririnü akukba tüshe nü kilim rholode, nü mung ching alokhisho, ha yam ching nü ki tamkhüntamnüsho tüsho mushusho,

²⁵nünü yinmi chingnü sojang, tüsho nü mihtsürü Israel neak bahjang, tüsho nünü arü le arü jipürü kilim jihkhi lo ching arübo belode arang.

²⁶“Arünü nü azhihde neak yihbeakmonü küyimki thüning khimdoba tüsho tsüng marüba, tüsho nü mung ching alokhide arünü ha dangpung lim tamkhüntamnüba, tüsho arü neak chingnü rholoba, tümütüsho nünü arü thsümüchi,

²⁷nünü yinmi chingnü sojang, nünü arü ki arünü atsahpung limro atsü thsangyuchoki nü yamlarübo, nü mihtsürü Israel neak bahjang, tüsho nünü nü mihtsürübo ki yamrüplurüp jihkhi lo ching tsüng akishang.

²⁸“Mürangkhüh lomi ching khümzung, arüm, khipzükhipdo, mokri, tangkho, yungsho lungbün lasho; arü lapung lo khürü ching arü ririnü yansho; küdürü thsünü, küdürü tukthsüdukram labanü;

²⁹bümzangrü yungsho nü mihtsürü Israel alalanü tümüpürü tamkhüntamnü, tümüpürü mushuba, arü nihbuh thsünükhi tüsho mulong tukthsükhi mükheahde ha yam lim arü khahbo chungkihsho;

³⁰nünü nü lapung yinmi chingnü sojang, neak bahjang, tüsho nünü mükheahde alakhi mulong arü limro ayannü alala ki jihang, tümüde nünü lang mihtsürü mulong mükheahlah.

³¹Hanangde nünü isa jipürübo ki jihkhi lo ching arü lakhi nimungbo alala ching arünü nü trebah tüsho nü limrobo ching tsahbah.

³²“Junangde küyimki nü mihtsürü Israel yungde khiungkerübo nü mung ato, nü khah achang, tüsho nü khah chunghuhkhi dünkheaknü arüba, küyimki arünü arübah ha yam lim tamkhüntamnüba,

³³nünü nü lapung yinmi chingnü sojang, tüsho khiungkerübonü tümüpürü nü ki keokhichonü rhimojang, junangde lomi ching mihtsürü alalanü nü mihtsürü Israelnü arhimokhi nangde nü mung ato mükheahbah tüsho nü trebah, tüsho inü athsükhi ha yam kheak nü mung jia lah de arünü amükheahbah.

³⁴“Nü mihtsürübonü arü riri bede thirithsüpü wukhiuksho, nünü tümü limro ching arü yüshihbanü, tüsho nünü amokhitkhi ha kiuto tüsho nü mung thsungkheak inü athsükhi yam lim arünü tamkhüntamnüsho,

³⁵judüki arü tamkhüntamnükhi tüsho arü mushukhi yinmi chingnü sojang, tüsho arü thsungkheak rhimojang.

³⁶“Arünü nü azhihde neak yihbeaksho — tümüde neak müyihbeakrü she müla — tüsho nünü arü kheak bukakhiuksho tüsho arü riri kilim jihsho, junangde arü limshu yungsho aphüni lomi ching aramrü thsüde hande yüsho;

³⁷judüki arü ramde ayükhi lomi ching arü lümrhangsho, tüsho mulong müthrisho, tüsho arü ramde ayükhi lomi ching nü ki, ‘Isanü neak yihbeakdo, tüsho amülim rhimodo; isanü mütsüde rhimodo’ de mushude thasho;

³⁸arünü arü mulong tüsho me alalanü arü ramde ayükhi lomi ching mulong müthrisho, tüsho nünü arü jipürübo kilim jihkhi lomi, nünü amokhitkhi kiuto tüsho nü mung thsungkheak inü athsükhi yam lim tamkhüntamnüsho,

³⁹judüki nü lapung yinmi chingnü arü tamkhüntamnü tüsho arü mushukhi sojang, arü thsungkheak rhimojang tüsho nü azhihde neak yihbeakrü nü mihtsürübo neak bahjang.

⁴⁰Kheakü, O I Thrünpuh, ha dangpung chingnü tamkhüntamnükhi lim nü mükbo khimshuhang tüsho nü nükhünbo anguhang.

⁴¹‘ Kheakü asürang, O ATUNGPUH Thrünpuh tüsho nü sühakhimpung lim yüang, nü tüsho nü Wuto sangdan, nü yo amükeamrübo, O ATUNGPUH Thrünpuh, akhümkhit khim yihang, tüsho nü yo amüsührübo nü tsükhi ching asühachihshang.

⁴²O ATUNGPUH Thrünpuh, nünü mujude-mokhitkhi dübahyuk. Nü yamlarü David thsungkheak nünü muzhokhi lümkhitang.’ ”