Read Yimchungru Naga 2 Kiuthsü 7 Bible Online

2 Kiuthsü 7 - Yimchungru Naga bible

2 Kiuthsü 7

¹Küyimki Solomonnü tamkhüntamnü kheamkhea, thüning chingnü mo aki tüsho taka kingaünkhi le laksah-a kingaünkhibo aniuabah; tüsho ATUNGPUH müretahkhinü arüngyam mi.

²Amükeamrübonü ATUNGPUH yam ching müyüzahkhuk, tümütüsho ATUNGPUH müretahkhi ATUNGPUH yam mide kam.

³Küyimki mo tüsho ATUNGPUH müretah akikhi Israel mihtsürü alalanü angükhea, arünü jing tsahpung kheak arü miro alo lim mükhümde kingaün tüsho ATUNGPUH ki makshe jihde tha, “Tümütüsho api tsülah, tümütüsho api muzho lünnü lah.”

⁴Judüki kiulongthsüpuh tüsho mihtsürü alalanü ATUNGPUH miki laksah-a kingaün.

⁵Kiulongthsüpuh Solomonnü moshipung 22,000 tüsho namfimihnu 120,000 laksah-a kingaün. Jumonü kiulongthsüpuh tüsho mihtsürü alalanü Thrünpuh yam müsükhit.

⁶Amükeamrübonü nihbuh dangpung kheak zhip. Levirübonü she ATUNGPUH mungshi jihpü kiulongthsüpuh Davidnü athsükhi khün-khungbe shuhbah tha, “Tümüde apinü muzhokhi lünnü lah.” Arü mikhuh ching amükeamrübonü hulipungpungbo khung; tüsho Israel alala zhip.

⁷ATUNGPUH yam müngüh lakhi khikzhakpung aphulungbe Solomonnü müsühkhit; tümüde ju kheak apinü taka kingaünkhi tüsho mungtsü kingaünkhi amüdang jih, tümütüsho Solomonnü athsükhi müwayinchi kingaün sadamnü taka kingaünkhi, hi kingaün tüsho müdangmurubo mazüh.

⁸Ju kim ching Solomonnü nimung thüne thünio mung, tüsho api lung Israel alala, Lebo-hamath chingnü Ijip ayung khiungde hihdakde mukhung.

⁹Atizheah nipü arünü arüngako mukhung khülang la; tümüde arünü kingaün sadam müsükhitpü nimung thüne tüsho thünio nimung thüne mung.

¹⁰Khinu thüne nimung mukukheak mahsam nipü, ATUNGPUHNÜ David tüsho Solomon le api mihtsürü Israel kheak atsü huhkhi hode apinü mihtsürübo asühachihde tüsho me atsü chingnü arü khimyam lim yüshih.

¹¹Hanangde Solomonnü ATUNGPUH yam tüsho kiulongthsüpuh yam thsükham; ATUNGPUH yam tüsho anihbuh yam ching thsüpübo Solomon lümkhi alala akuk ngüde thsükham.

¹²Judüki azhing ching ATUNGPUHNÜ Solomon ki akhiuka huh tüsho api ki tha: “Inü nü tamkhüntamnü sodo, tüsho ha dangpung ha I thsungkheak shuhmülanga jihpung yam de mokhitdo.

¹³Küyimki inü thüning rihdobah tsüng marüba, yungsho lomi tsühabahshihpü tangkhobo ki thiyukhüm jihba, yungsho I mihtsürü bolung tukthsü yüshihba,

¹⁴I mung chingnü ajikhi I mihtsürübonü azhihayihsho, tamkhüntamnüsho, I miro yimsho, tüsho arü limrobo amütsü chingnü rholosho, inü yinmi chingnü sojihbah arü neak bahjihbah tüsho arü lomi thsüngujihbah.

¹⁵Kheakü ha dangpung ching tamkhüntamnükhi lim I mükbo khimshuhbah tüsho I nükhünbo anguhbah.

¹⁶Tümüde kheakü ha yam inü mokhitdo tüsho müsühkhitdo, junangde ju ching I mung lünnü alabah; I mükbo tüsho I mulong ju ching kim alala thsungkheak labah.

¹⁷Nü thsungkheak a, nünü nü buh Davidnü atsahkhi nangde inü nü ki thiyukhüm jihkhi alala rhimode tüsho I yakzan thsükhibo tüsho I yuzüngbo anide I miki tsahsho,

¹⁸inü nü buh David ki tangzüngkhi, ‘Israel kurungkheak yakzan shuhpü nü müthrirü mülade müthsü,’ dükhi nangde inü nü kiulongthsü-binkiu thsakhamjihbah.

¹⁹“Tüshe nünü anguhde I yakzanbo tüsho inü nü miki zojihkhi thiyukhümbo bahyuksho, tüsho tsobah püpürü thrünpuhbo tankihde arü kingaünsho,

²⁰jushu a inü nü kilim jihkhi lomi chingnü nü rukkhita bahbah; I mung thsungkheaknü inü amüsühkhitkhi ha yam I mikinü inü abahyukbah, tüsho ha mihtsürü alala bolung müchitmudu tüsho münedung khülang kamshihbah.

²¹Tüsho kheakü mungshide alakhi ha yam dünkheak mihtsürü aban hode alarünü müyinsahbah tüsho athabah, ‘ Tümüde ATUNGPUHNÜ ha lomi tüsho ha yam kheak hadürü rhimokhea?’

²²Judüki arünü athabah, ‘ Tümütüsho arünü A TUN GPU H arü jipürü Thrünpuh arü Ijip lomi chingnü bekhitbuh bahyukdo, tüsho arünü püpürü thrünpuhbo kilim rholobah arü kingaün tüsho tankih; jumonü apinü ha thsümüchi alala arü kheak hande arüa lah.’ ”