Read Yimchungru Naga 2 Kiuthsü 9 Bible Online

2 Kiuthsü 9 - Yimchungru Naga bible

2 Kiuthsü 9

¹Küyimki Sheba kiulongthsübenü Solomon mungthukhi sokhea, alibenü api rük tsühpü akeokhikhi amüküpbo, boto ato tüsho arhümthünea hankhi kemelbo, suna ahihdo tüsho shotolungbo lubah Jirusalem ching arü. Küyimki alibe Solomon ki arükhea, anihbe lümkhi ching lakhi alala api ki asukachih.

²Alibenü akeokhikhi alala Solomonnü alokham; alibe ki müthakhukpü thsüde Solomon kheak tümü achak mülakheah.

³Küyimki Sheba kiulongthsübenü Solomon lümlung, apinü athsükhi yam,

⁴api dükhüm kheak tsühyungbe, api yo atorü rhimopungbo, tüsho api yamlarü botobo, arü khimmih, api pung-jihrü tüsho arü khimmih, tüsho ATUNGPUH yam ching jihkhi taka kingaünkhibo ngükhea, anihbe sheak dükipabah.

⁵Jumonü alibenü kiulongthsüpuh ki tha, “Nü kukzamkhi tüsho nü lümlung dünkheak inü I lomi chingnü asokhi yusheak dükdü ah,

⁶tüshe I arübah I müknü müngüyi khiungde thiyusheak ching inü mükin. Nü lümlung tokhi thripkhüh she I ki müthaa lah; inü asokhi yusheak kheak nünü zhihodo.

⁷Nü mihtsürübo asühpü! Nü ki mutuklode alarü tüsho nü lümlung sorü nü yamlarübo asühpü!

⁸ATUNGPUH nü Thrünpuh shiang, shepünü nü kheak asüh tüsho ATUNGPUH nü Thrünpuh thsungkheaknü api kiulongthsü-binkiu kheak kiulongthsürü thsüde binshih. Tümütüsho arü lünnü alashihpü nü Thrünpuhnü Israel muzho, apinü arü kurungkheak kiulongthsürü kamshih, junangde nünü mahkhappü tüsho thiyuro lungki rhimobah.”

⁹Judüki alibenü kiulongthsüpuh kilim suna khahngak 4080, arhümthüneabe ahihdo, tüsho shotolungbo jih: Sheba kiulongthsübe nü kiulongthsüpuh Solomon kilim jihkhi arhümthüneabe nangde püpü mülade alakheah.

¹⁰Kheaküshe Hiram yamlarübo tüsho Solomon yamlarübo sherünü Ophir chingnü suna hande arükheanü algum sang tüsho shotolungbo she hande arü.

¹¹Kiulongthsüpuhnü algum sangnü ATUNGPUH yam tüsho kiulongthsüpuh yam jing jungpung, bingkhung tüsho bingshangbo she khün thsürü thsungkheaknü thsü; müngühlim Juda lomi ching jurü nangde müngüakheah.

¹²Kiulongthsüpuh Solomonnü Sheba kiulongthsübenü akünkhi tüsho akheangkhi alala jih; anihbenü api kilim hande arükhi kheaknü alü thsüde alibe kilim jih. Jushu alibenü anihbe yamlarübo lung Sheba lomi lim alode yü.

¹³Kam khülang ching Solomon kilim arükhi suna ju khahngak 23,000 bande,

¹⁴yinzüyindorü tüsho shothsümolorünü hande arükhi lung yukrude; tüsho Arabia kiulongthsürübo tüsho lomi ching kovünorbonü handarü.

¹⁵Kiulongthsüpuh Solomonnü sunanü akingkhi tsung atoto 200 thsü; tsung atoto abande suna khahngak 7 khühnü thsü.

¹⁶Apinü sunanü akingkhi tsung 300 thsü; tsung abande suna khahngak 3 bande lu; tüsho kiulongthsüpuhnü jurübo Lebanon Murung Yam ching yuka zo.

¹⁷Kiulongthsüpuhnü kiulongthsü-binkiu ato khülang thsotorünü thsü tüsho ju kheak suna müthsün lüpkih.

¹⁸Kiulongthsübinkiu ju jingdükü 6 tüsho jing thrümlopung khülang de sunanü thsüa lakheah, jurübo kiulongthsübinkiu kheak zükihde bin angüpungbo lakheah tüsho bin angüpungbo yean kekhüzü 2 zhip,

¹⁹jingdükü 6 akheam abande 12 zhip. Ha ruk kiulongthsü küpü ching she küyimkishe müthsüakheah.

²⁰Kiulongthsüpuh Solomon pungbo alala suna lakheah, tüsho Lebanon Murung Yam pungphurubo suna müthsün lakheah; Solomon nimungbo ching shotoyinchi a tümü she mükheyuk.

²¹Tümüde kiulongthsüpuh yo sangkungbo Hiram yamlarübo lung Tarshish ching yü; kam mahsam ching khülang ki Tarshish sangkungbonü suna, shotoyinchi, thsotorü, shihngü, tüsho shuhyibo hanbah arü.

²²Hanangde kiulongthsüpuh Solomon ju lakhit tüsho lümlung ching lomi kiulongthsürübo alala kheaknü ahokhi lakheah.

²³Thrünpuhnü api lümkhi ching yukjihkhi lümlung anipü lomi kiulongthsürübo alalanü Solomon yimde arü.

²⁴Arü mihbüm abannü thsambah khülang, shotoyinchi tüsho suna, khimmih, thsühnukbo, arhümthüneabe, khorabo, khoranunu kam aban hihdakde hanbah arü.

²⁵Solomon a khorabo le khora-lolungbe thsungkheak thüyam 4000, tüsho khoraberü 12,000 lakheah, apinü ju khora-lolungbe kiutobo tüsho kiulongthsüpuh lung Jirusalem ching zo.

²⁶Apinü kiulongthsürü alala kurungkheak Euphra chingnü Filistia lomi, tüsho Ijip aredungyean khiungde kiulongthsü.

²⁷Kiulongthsüpuhnü Jirusalem ching shotoyinchi ju lungbo nangde bokhuh kamshih, tüsho cedar sang ju Shephela ching sangzhinasodung nangde bolode kamshih.

²⁸Khorabo ju Solomon thsungkheaknü Ijip tüsho lomi alala chingnü handarü.

²⁹Kheakü Solomon rhimo aningkhi, atankihnü akheam khiungde, wukihbuh Nathan yukhean, tüsho Shilonrü Ahija müchitkhi ching, tüsho wukihbuh Iddonü Nebat tsührü Jeroboam dünkheak michihkhi ching thrüta müla de?

³⁰Solomonnü Israel alala kurungkheak Jirusalem ching kam yirü kiulongthsü.

³¹Solomon api jipürü lung yap tüsho abuh David kiuto ching kiuyukabah; tüsho atsührü Rehoboamnü api müthri.