Read Yimchungru Naga Ezra 1 Bible Online

Ezra 1 - Yimchungru Naga bible

Ezra 1

¹Sairusnü Persia kiulongthsükhi akhuhbe kam ching, Jeremia mün hode ATUNGPUH yu dünjishihpü thsüde, ATUNGPUHNÜ Persia kiulongthsüpuh Sairus me tuthsukmusu tüsho api kiulongthsü bukkhüp lomi alala ching thrüta zhiyukshihpü tha:

²“Ha Persia kiulongthsüpuh Sairus yukhüm ah: ATUNGPUH , yinmi Thrünpuhnü I kilim kiulongthsü alala jihdo, tüsho apinü Juda ching lakhi Jirusalem ching api thsungkheak arüngyam thsüpü I kilim mülüjih.

³Nüsa bolung shepü api mihtsürüanü — api lung Thrünpuh lashang. Tüsho api Juda ching lakhi Jirusalem ching wutubah ATUNGPUH , Israel Thrünpuh, shepü Jirusalem ching lanü api arüngyam thsüshang.

⁴Tüsho sherübo kürü ching tsode yünü lanü Jirusalem ching lakhi Thrünpuh arüngyam thsüpü thsungkheak nihbuh lapung mihtsürübonü api kilim shotoyinchi, suna, kukrukbo tüsho shiwühbo, tüsho arung kingaünbo jihshang.”

⁵Junangde Juda tüsho Benjamin trük chingnü gukbo aban ching azothsürübo, amükeamrübo, Levirübo tüsho sherü Thrünpuh nü ayüpü mulong athsungkheanü arübo Jirusalem ching arüngyam thsülopü tsahmusu.

⁶Arü phünirü alalanü kukruk harü jihde rung: Shoto phühlung, shotolung, tsühyungbebo, püpü shoto kukruk tüsho ju lung arung kingaün hanmukhungkhi she jih.

⁷Kiulongthsüpuh Nebukednezarnü Jirusalem arüngyam ching yo pungphuru lude yünü api thrünpuh arüngyam ching zokhibo she Sairusnü yihkhit.

⁸Persia kiulongthsüpuh Sairusnü harü rahpung mütsanmükhibuh Mithredath khah chingnü hande arübah Juda kovünor Sheshbazzar, ki mütsanmükhide jih.

⁹Kukruk mungjibo ju hadükhüh lakheah: suna phuru 30; shotoyinchi phuru 1000; nukjip 29;

¹⁰suna phurusük 30; shotoyinchi phurusük 410; püpü phühlung 1000;

¹¹küyimki Sheshbazzar tüsho ramtsorübo Babilon chingnü Jirusalem ching wulungkhea, shoto phühlung tüsho püpü kukrukbo alalanü 5400 lakheah.