Read Yimchungru Naga Ezra 3 Bible Online

Ezra 3 - Yimchungru Naga bible

Ezra 3

¹Küyimki khinu thüne khiungkhea, Israelrünü arü kiutobo ching laabah tüsho arü alala Jirusalem ching lümkhi khülang kamde mukhung.

²Jushu Jozadak tsührü Jeshua buhtsührü amükeamrübo, tüsho Shealtiel tsührü Zerubbabel, api keoniorübo de nungbah Thrünpuh mihtsürü Mosa yakzan hüm ching thrüta lakhi yande Israel Thrünpuh kilim taka kingaünpü arüngyam thsülo.

³Arünü ju lomi ching larü trea lalashe, püpüki thsüpungnü arüngpung thrünlo; tüsho arünü mutuklode ju kheak yapsu le are taka kingaün.

⁴Thrüta lakhi yande arünü thüyam arüngde nio; nimung abande yihnüpü lakhi kingaün jih.

⁵Ju dunglim arünü mutuklode taka kingaün tüsho khinu aso le akhukhita lakhi ATUNGPUH thünio kingaün, kheaküshe mihtsürü aban nihbenü amulongkhi kingaünbo ATUNGPUH kilim jih.

⁶Mihtsürübonü arüngyam thrünlopü mütankihyia lalashe, khinu thüne nimung atan ni ATUNGPUH ki taka kingaün jihmusu.

⁷Arünü lungzünrü tüsho yümzüyümdorü jihshihpü sho jihchung tüsho Tair le Sidon kiutobo ching cedar sangthulung Lebanon chingnü Joppa khiungde keto chingnü handarüde alakhi ching jihshihpü tsühyungpü, tüsho oliv müdangkebo jih. Harü alala Persia kiulongthsüpuh Sairus yu hode lang rhimo.

⁸Arü Thrünpuh yam lapung Jirusalem ching alungbah kam mahne kheak khinu mahnepü ching, Shealtiel tsührü Zerubbabel, Jozadak tsührü Jeshua tüsho aningkhi arü buhtsührü amükeamrübo, Levirübo tüsho ramtso chingnü Jirusalem lim alungrü alalanü rhimopü tankih tüsho Levirü kam muku kumung azorübo ATUNGPUH yam thsükhi kheahshihpü mokhit.

⁹Jeshua le atsührübo tüsho keoniorübo, Kadmiel le atsührübo ( Juda guk chingnü) arüngyam thsülopü ching rukhühnü limberü thsü, (arübo ju Levirü Henadad guknü she rung).

¹⁰Küyimki arüngyam thsüpü khimtan thrünmusukhea, amükeamrübonü shulünkhim phuyubah hulipungpung arü khah ching shuhbah wusu tüsho Asaph buhtsüh Levirünü larüp shuhbah kiulongthsüpuh Davidnü amülükhi yande ATUNGPUH mung shi.

¹¹Arünü aloachihde ATUNGPUH mung shikhi khün thsü: “ATUNGPUH tsülah, tüsho api mihmüthsüm Israel thsungkheaknü akheamarün müla.” Mihbüm abannü nihbe düsheak achangnü zhide ATUNGPUH mung shi, tümüde arüngyam khimtan ju tankih.

¹²Amükeamrübo, Levirü tüsho gukbo ching azothsürü sherünü adüso arüngyam ngükheanü arünü kheakü arüngyam aso thrünmusukhi ngübah achangnü zhide trip, tüshe ju lung khürü a asühachihde zhi.

¹³Jumonü asühkhi düsheak a shi atripkheanü mihtsürübonü mümütsan, tümüde limshu chingnü mihtsürübonü sode achangnü zhi.