Read Yimchungru Naga Ezra 8 Bible Online

Ezra 8 - Yimchungru Naga bible

Ezra 8

¹Artazerzes kiulongthsüchoki Israelrü trükbo ching aku thsürübo sherü Babilon ramtso ching hande yünü alakhea tüsho arü kheaknü atrükkhitrü Ezra lung alode Jirusalem lim arükheanü harü ah:

²Phinehas kheaknü atrükkhitkhi, Gershom; Ithamar kheaknü Daniel trükkhit; David kheaknü,

³Shekania tsührü Hattush trükkhit; Parosh kheaknü Zekaria trükkhit, api lung athrürü 150 kheyuk;

⁴Pahath-moab kheaknü Zerabia tsührü Eliehoenai trükkhit, tüsho api lung athrürü 200;

⁵Zattu kheaknü Jahaziel tsührü Shekania trükkhit, tüsho api lung athrürü 300;

⁶Adin kheaknü Jonathan tsührü Ebed trükkhit, tüsho api lung athrürü 50;

⁷Elam kheaknü Athalia tsührü Jeshaia trükkhit, tüsho api lung athrürü 70;

⁸Shephatia kheaknü Maikel tsührü Zebadia trükkhit, tüsho api lung athrürü 80;

⁹Joab kheaknü Jehiel tsührü Obadia trükkhit, tüsho api lung athrürü 218;

¹⁰Bani kheaknü Josiphia tsührü Shelomith trükkhit, tüsho api lung athrürü 160;

¹¹Bebai kheaknü Bebai tsührü Zekaria trükkhit, tüsho api lung athrürü 28;

¹²Azgad kheaknü Hakatan tsührü Johanan trükkhit, tüsho api lung athrürü 110;

¹³Adonikam kheaknü atrükkhitkhi ashude arürübo ju, Eliphelet, Jeuel tüsho Shemaia, tüsho arü lung athrürü 60;

¹⁴Bigvai kheaknü atrükkhitkhi Uthai tüsho Zakkur, ane lung mihtsürü 70.

¹⁵Ahava kiuto lim bukde ayükhi ayung ki inü arü bemukhung, tüsho ju ching isa nimung mahsam mung. Boto ching inü amükeamrübo ngü, tüshe Levirü tsührübo sheshe müngü.

¹⁶Inü limberü harü thiyi: Eliezer, Ariel, Shemaia, Elnathan, Jarib, Elnathan, Nathan, Zekaria tüsho Meshullam, tüsho huhzühuhdoshihpü, Joiarib tüsho Elnathan.

¹⁷Inü arü Kasiphia ching, Iddo akuthsübuh kilim api tüsho api lung arüngyam ching rhimorü mihtsürü thiyia arüshihbah arüngyam ching Thrünpuh tankihjang de thiyi.

¹⁸Thrünpuh mihmüthsüm hode Israelrü Levi tsührü Mahli yamkhün chingnü khiukchim mihtsürü Sherebia arüshih, api lung atsührü athrürü 18 tüsho keoniorübo she arü.

¹⁹Arünü Hashabia le Jeshaia büne she Merari yamkhün chingnü, betsührü tüsho tsührübo 20 bebah arüshih.

²⁰Ju lung David kiulongthsüpuh tüsho akiulongthsü ching atorübonü Levirü rungde arüngyam ching tankihshihpü mihtsürü 220 mokhita larübo ju arü mungnü thrüta lakheah.

²¹Judüki isa tsührübo, kukrukbo tüsho isa thsungkheaknü limro mukhiungarihdo yimkhita lupü thsüde, Thrünpuh ki isa küdah thsüde azhihayihde khümkeak thsüpü Ahava ayung kinü inü zhiyuk.

²²Limro ching isa riribo aheangshihpü bonungrübo tüsho khoraberübo kiulongthsüpuh ki kheangpü inü achih; tümüde Thrünpuhnü api kheak kinrü aban müngühjihchoh, tüshe api kheaknü chamkhide atsorü a apinü masüh tüsho thsümüchichoh de inü kiulongthsüpuh ki thakheah.

²³Jumonü isanü Thrünpuh ki isa kümshihpü khümkeak thsü tüsho tamkhüntamnü, tüsho apinü isa tamkhüntamnübo alojih.

²⁴Tüsho inü amükeamrü thürükheak mahne mokhit; Sherebia, Hashabia tüsho arü lung keoniorü 10.

²⁵Jushu, kiulongthsüpuh, api ki lümlung-jihrü, atorübo tüsho Israelrünü shotoyinchi, suna tüsho phühlungbo arüngyam ching ahorishihpü jihkhi adüna amükeamrübo kilim jih.

²⁶Arü kilim inü harü jihdo: Shotoyinchi khahngak 19,000, yinchi phühlung 100 — khahngak 55, suna khahngak 2800,

²⁷suna phurusük 20 — khahngak 8 kheak thripkhüh, tüsho suna kiphahkhi müwayinchi phurusük 2.

²⁸Inü arü ki tha, “Nüsa tüsho harü kukrukbo ATUNGPUH miki amüsüh ah, junangde shotoyinchi le suna pungphurubo she nüsa jipürü Thrünpuh ATUNGPUH kilim kingaün jihchoh.

²⁹Arüngyam khiungchoki jurü tsüde kümang, ATUNGPUH yam khiungshak chingnü adünang tüsho achangbe amükeamrü le Levirü tüsho Jirusalem ching Israel limberübo khah ching yukjang.”

³⁰Junangde amükeamrü tüsho Levirünü shotoyinchi, suna tüsho phühlung mütsanmükhia Jirusalem arüngyam ching hande yü.

³¹Akhuhbe khinu nimung thürükheak mahne nipü isa Ahava yung chingnü Jirusalem lim arü. Limtsahchoki isa Thrünpuh isa lung lade thiriri khah chingnü isa bekhit.

³²Küyimki isa Jirusalem khiungkhea, isa nimung mahsam sühakhim.

³³Tüsho nimung aphüyi ni arüngyam ching shotoyinchi, suna tüsho phühlung adünbah, Uria tsührü Meremoth amükeambuh khah ching jih. Api lung Phinehas tsührü Eleazar tüsho Levirü mahne, Jeshua tsührü Jozabad tüsho Binnui tsührü Noadia de alakheah.

³⁴Amungjithürü khebah adün, tüsho judüchokinü tsüde thrütyuka zo.

³⁵Ramtso chingnü alungrü alalanü Israel Thrünpuh kilim taka kingaünpü shihchambo hanbah arü. Arünü Israelrü alala thsungkheak moshi 12 jih, namfimihnupung 96, namfimihnunu 77; tüsho arü münean chingnü atsangkhitshihpü mihnupung 12 jih. Shiwüh harü alala ATUNGPUH ki taka kingaün.

³⁶Arünü kiulongthsüpuhnü ajihkhi mütsanhüm she lubah Aniyüzahlim Euphrarü kovünor tüsho atorübo kilim jih, tüsho arünü alode mihtsürü tüsho arüngyam thsungkheak arung jih.