Read Yimchungru Naga Nehemia 1 Bible Online

Nehemia 1 - Yimchungru Naga bible

Nehemia 1

¹Ha Hakalia tsührü Nehemianü arhimokhi yukhean. Kislev khinu ching Artazerzes wuto kiulongthsükhi kam muku bankhitchoki, I Nehemia Susa kiuying ching lakheah.

²Keoniorü bolung chingnü Hanani lung mihtsürü khürü, Juda chingnü arü, tüsho Jirusalem le Jihudarü Babilon ramtso chingnü aninga alunglorübo dünkheak inü arü ki keokhi.

³Tüsho arünü I ki tha, “Lomi ching rhangdung larü ramtso chingnü alunglorübo thsümütsü ato ching lah tümüde arü hingrü khiungkerünü arü junode lah; Jirusalem chipi she kheakü khiungde keama yaplah, tüsho chipimurungbo she monü takabahdo.”

⁴Küyimki ha yu sokheanü inü zuhyuka binbah trip, tüsho nimung khünikhüh tüzhode yinmi Thrünpuh ki khümkeak thsüde tamkhüntamnüpü tankih.

⁵Inü tha, “O ATUNGPUH yinmi Thrünpuh! Nü ato tüsho atrebe Thrünpuh; nü muzhorü tüsho nü yuzüng yanrübo kheak tangzüngkhi nünü zochoh.

⁶ATUNGPUH , I kilim kheahang, tüsho tsüngre nimung aban nü yamlarübo Israelrü thsungkheak I tamkhüntamnü sojang. Isa Israelrünü neak yihbeakdo de inü alokhichoh. Am isa jipürü tüsho inü neak yihbeakdo.

⁷Isanü nü azhihde khide mütsüde rhimodo tüsho nünü nü yamlarü Mosa hode ajihkhi yukhüm, yuzüng tüsho yakzan yande mürhimo.

⁸Nünü Mosa ki thakhi lümkhitjang: ‘Nüsa Israelrünü I kheak thiyuro mülasho, inü nüsa püpürü trükshih bolung hiumüzütshihbah.

⁹Tüshe nüsanü I kilim alode arübah inü athakhi rhimosho nüsa lomi akheam khiungde müzützüt she kükheak I mung zoshihpü inü mokhitdünü ju kheak belode arübah.’

¹⁰“ATUNGPUH , harü ha nü wu ato tüsho nü khah sühmüh hode akhümkhitkhi nü yamlarübo nü mihtsürübo ah.

¹¹O ATUNGPUH kheakü I tamkhüntamnü tüsho nü yamlarü püpürü sherünü nü ki wüntre jihnelanü arü tamkhüntamnü sojang. Khihni I kilim kukzam jihang, tüsho wuto kiulongthsüpuhnü I ki mihmüthsüm huhshang.” Tümüde I wuto kiulongthsüpuh pung adünararü lakheah.