Read Yimchungru Naga Nehemia 13 Bible Online

Nehemia 13 - Yimchungru Naga bible

Nehemia 13

¹Küyimki Mosa yakzan mihtsürübo ki achangnü akhekhea, Amonrü yungsho Moabrü ju küyimkishe Thrünpuh mihtsürü kheak munungkhuk de thrüta ngü.

²Ha amütsan Amonrü le Moabrünü Israelrü Ijip chingnü alungchoki mükipduh, tüshe arünü Balaam kheak buknima Israelrü athrushih, tütüshe Thrünpuhnü athruaji ju müngühmühi kamshih.

³Israelrünü küyimki ha yakzan sokhea, khiungkerü alala arü kheaknü chamkhishih.

⁴Arüngyam kukruk zopung khiungshakbo rhimo zhimbuh, Eliashib amükeambuh, kim ashang Tobia kheak trükrüde alakheah.

⁵Apinü Tobia ki thüyam khiungshak ato ahorishih, ju hi kingaün tüsho arhümthüneabe shoto kukruk lang azopung, arüngyam ching ahoribe kukrukbo, amükeamrübo thsungkheak jihchungkhibo, tüsho Levirü, arüngyam khün thsürü, tüsho arüngyam aheangrübo kilim jihpü hi, yukhu, tüsho oliv müdangkebo zopung lakheah.

⁶Harü dünjide alachoki, I Jirusalem ching müla tümüde Artazerzes Babilon kiulongthsü samrükheak mahnepü kam ching api ki thiyukheang

⁷tüsho I Jirusalem lim arü, tüsho Eliashibnü Tobia ki arüngyam khiungshak ahorishihkhi inü müyinsahde ngü.

⁸I bukakhiukde inü Tobia kukruk alala akhiungshak chingnü bahjih.

⁹Thüyam khiungshak tsüde müsühkhitang de inü thiyukhüm jih tüsho arüngyam phühlung, hi kingaün, tüsho rhümthüneabe kukrukbo hanlodarü zo.

¹⁰Kheaküshe inü angükhi ju mihtsürübonü shihcham dükde müjihkhi hode Levirü tüsho khün thsürü Jirusalem bahbah nihbuh lubo ching müzüt.

¹¹Jumonü arüngyam bahkhitkhi thsungkheak inü atorübo müdan tüsho Levirü le khün thsürü belodarü rhimoshih.

¹²Jushu Israelrü athrünkhinü hi, thürü shihcham, yukhu, tüsho oliv müdangke handarü zowupung khiungshak ching zopü tankih.

¹³Zowupung khiungshak ching kheahshihpü ju inü mihtsürü harü mokhit: Shelemia amükeambuh, Zadok athrütbuh; tüsho Levirü Pedaia. Mattania tsührü Zakkur tsührü Hanan arü rungshihpü mokhit. Rukhüh rhimorü ki thiyuronü tsühyungpü chamachihbah de harü kheak inü mulonglam; tüsho keoniorü ki rhimo chamachihpü ju arü rhimo lakheah.

¹⁴O I Thrünpuh I lümkhitang, nü arüngyam tüsho kingaün mukhung thsungkheak inü arhimokhi alala dübahjih.

¹⁵Judüki Juda ching mihtsürübo Amuni kurungaso chingnü ake nitkhitde inü ngü. Püpürübo hi, yukhu, kurungaso, khubaso tüsho püpü kukruk hah thsüa donkibo hanshihbah Jirusalem lim yüde ngü; Amuni tümü she düyin de arü ki inü müzündoabah.

¹⁶Tair chingnü khürü Jirusalem ching arü alakheah, tüsho arünü thüngüh tüsho kukruk mungjithürü Amunimung handarü mihtsürübo ki yin.

¹⁷Inü Jihudarü limberübo ki müdande tha, “Tümü thsükhi nüsanü Amunimung mükhemükimde amünean rhimocho le?

¹⁸Nüsa jipürünü ha rhimokhi hode Thrünpuhnü ha kiuto ching isa kheak amütsü hande arükhi yung de? Kheaküshe nüsanü Amunimung müneankhi hode Israel kheak bukakhiukkhi alü hande arüchoh.”

¹⁹Jumonü arelim kamde Amuni tankih aban, chipiripitbo rihpü, tüsho Amuni muhoyichokia mükhimshuhpü inü thiyukhüm jih. Tüsho inü I yamlarü khürü chipiripitbo ching binshih, junangde Amunimung tümü hah she mühanyuk.

²⁰Khülang ki yungsho mahne ki yinzüyindorünü Amuni müngüh tsüngre kiuto chipi aleanglim mungjithürü yin.

²¹Inü arü ki müzünde tha, “Tümü thsükhi nüsanü azhing ching chipi ki bincho? Hade thsülosho nüsa kheak inü khah chungbah.” Jushunü lang arünü Amuni marü.

²²Levirübo ki nihbuh zangrü müsühkhitpü tüsho Amuni müsühde azopü thsüde chipiripitbo aheangang de inü thiyukhüm jih. I lümkhitang, O I Thrünpuh, nü amüthsüm ato hode I kümang.

²³Judüki Jihudarü ahihdonü Ashdod, Amon tüsho Moabberübo yihlukhi inü yimkhit.

²⁴Arü tsührübo aphulungachihnü Ashdod yungsho püpürü yutha thakhuk tüshe Jihudarü yu müthakhuk.

²⁵Inü athruajide mihtsürübonü küyimkishe khiungkeberü ki müyihlushihpü Thrünpuh mung chingnü thiyuchihchim lushih.

²⁶Inü tha, “Hadürü khiungkeberü lukhi hode kiulongthsüpuh Solomonnü neak yihbeakkhi yung de? Api püpürü lomi kiulongthsürübo kheaknü atobe lakheah. Thrünpuh nü api muzho tüsho Israelrü kurungkheak kiulongthsüshih, tüshe apinü amünean ching ayokhi.

²⁷Dale tüsho nüsa kheahkhide isanü khiungkeberü lukhinü Thrünpuh miki neak yihbeakba de?”

²⁸Joiada ju Eliashib Achangbe Amükeambuh tsührü ah tüshe api tsührü bolung khülangnü Sanballat tsührü, Beth Horon kiuto ching lakhi yihlu, jumonü inü Joiada ju Jirusalem chingnü yana tsoshih.

²⁹O Thrünpuh, harü mihtsürübonü amükeamrübo rhimo yam müneankhi tüsho amükeamrübo le Levirü kheak nünü tangzüngkhi müneanjihkhi lümkhitjang.

³⁰Junangde arübo khiungkerü kheaknü müsühkhitjih; tüsho amükeamrübo le Levirübonü nihbuh rhimo mükheahshihpü thsüde inü yakzan thsüjih.

³¹Kim dükdü ching taka kingaünshihpü thsüde atakbe sang, tüsho mihtsürübo thsungkheak hi akhuh yimlukhi le sangaso akhuh asokhi, kingaünbo jihchungshihpü tsanglungjih. O Thrünpuh, ha rhimo atsü thsungkheak I lümkhitjang.