Read Yimchungru Naga Nehemia 4 Bible Online

Nehemia 4 - Yimchungru Naga bible

Nehemia 4

¹Küyimki Sanballatnü isa chipi thsülochoh de asokhea, abukakhiukde Jihudarü ki bahyukde münejih.

²Amüyamrü tüsho Samariarü bonungrü mikinü apinü tha, “Harü süküp mülarü Jihudarübo tümü thsücho? Arünü kiuto thsülokhukba de? Arünü rhangdung shuhmülanga jihba de? Arünü nimungkhühnü rhimo banba de? Atakkheamkhi lungbonü arünü thüyam thsülokhukba shi?”

³Amonrü Tobianü she arheang ki zhipbah tha, “Arünü tümü thsüchonü — rimre khülang künde yükihsho arü lung-chipi keamabahbah.”

⁴Inü tamkhüntamnü, “Arünü isa keangrümünekhi sojang, O Thrünpuh! Arünü münejihkhi arü kheak rheakloshang. Arü kukruk alala jangkhide khiungkerü lo ching ramtsorü kamshang.

⁵Arü neak düyihdojih yungsho arü neak nü mikinü nana dübahjih, tümüde arünü chipi thsürü miki mükhemükimdo.”

⁶Junangde isanü chipi ju achanglim aphulungachih khiungde nahde zünkih, tümüde mihtsürübonü mulong jihde rhimo.

⁷Küyimki Sanballat, Tobia, tüsho Amonrü tüsho Ashdodrünü Jirusalem chipi thsüchoh tüsho akhünbitbo lakdokhamchoh de asokheanü arünü khide bukakhiuk.

⁸Jumonü arünü mulomülapde Jirusalem yanpü arü tüsho ju ching neamneamjih,

⁹tüshe isanü Thrünpuh ki tamkhüntamnü tüsho animung le are jurü aheangshihpü mihtsürübo mokhita zo.

¹⁰Juda mihtsürübonü tha: “Rhimorübo sühmüh yiuhyiuhabahchoh, lungjinim ahihdo wua bahpü lah; isanü chipi müthsükhuk.”

¹¹Tüsho isa riribonü hade lüm, “Isanü arü bolung yübah laksahde rhimo müyandoyi khiungde arünü isa mümükheah yungsho müngü.”

¹²Tüshe thiriri lung larü Jihudarübonü isa ki thürü ki tha, “Nüsa kürü ching yübanü, arünü isa yanbah.”

¹³Jumonü inü guk aban chingnü nuk, thsüh tüsho sanglüh shuhbah wungdo ching chipi abolim mubuhbah jimde binshih.

¹⁴Mihtsürübonü mulong sansankhi ngübah inü arübo limberü tüsho atorübo ki tha, “Isa riri dütre. ATUNGPUH lümkhitang. Api küdükhüh ato tüsho atrebe, tüsho apinü nüsa mihtsürü, nüsa tsührübo, nüsa niuberü tüsho nüsa yambo thsungkheak keochihjihchoh.”

¹⁵Küyimki isa riribonü mulomülapkhi isanü mükheahdo de arünü asokhea, tüsho Thrünpuhnü arü lümkhi akeangkeang kamshihkhea, isa alala nihbuh rhimo ching yülo.

¹⁶Jumonü ju ninü rünbah, I yamlarü chamkhühnü rhimo tüsho chamkhühnü thsüh, tsung, sanglüh shuh tüsho thirithsü zülu yihbah aheangshih; tüsho limberübo ju Juda guk alala dunglim zhip.

¹⁷Chipi thsülorü tüsho sanglüh shuhrübonü she khah thripkhühnü rhimo tüsho thripkhühnü thsühnuk shuh.

¹⁸Chipi thsürü abannü thsühnuk chim ching rümkihbah mung. Tüsho hulipungpung khungbuh I ki zhip.

¹⁹Inü mihtsürübo tüsho arü torü tüsho limberübo ki tha, “Rhimo tolah tüsho shanglah tüsho chipi ching isa dükeak mükahlah.

²⁰Jumonü küching hulipungpung düsheak nüsanü asobanü, isa mühide ju ching mukhungang. Isa Thrünpuhnü isa thsung thsüde keochihbah.”

²¹Junangde nimung aban, yapsunü are chining akhiuk khiungde isa chamkhühnü chipi thsü, tüsho aningkhinü thsühnuk shuhbah aheangde zhip.

²²Judüki inü mihtsürübo ki tha, “Mihtsürü tüsho api yamlarü abannü Jirusalem ching azhing ching neakshang, junangde arünü isa azhing tüsho ayin ching rhimochoki aheangbah.”

²³I, I jingyanrü, I yamlarü tüsho I aheangrü shenü she kemüyihchoki düna azhing ching she khimmih müyihkhit.