Read Yimchungru Naga Nehemia 5 Bible Online

Nehemia 5 - Yimchungru Naga bible

Nehemia 5

¹Kim anükhüh dunglim mihtsürü ahihkhüh tüsho arü niuberübonü keoniorü Jihudarü azhihde arhunganim.

²Khürünü tha, “Isa yambuk tolah, jumonü isa tsühde rhangdung lapü thsungkheaknü hi yihnüpü lah.”

³Püpürünü tha, “ Khümzung lachoki tsühpü isa lubo, kurungasolu tüsho thüyambo hi dün mührü ki nipabahdo.”

⁴Tüsho khürünü tha, “Isa lubo tüsho kurungasolu dünkheak kiulongthsüpuh ki ruk shakpü sho nipdo.

⁵Keoniorü Jihudarü nangde isa tüsho isa tsührübo she arü ruk lang ah; tüshe isa tsührübo reangkih-a azhorü kuhi kamshih. Isa tsührü aliberü khürü a azhorü kuhi kamde yinabahdo, tüshe arhokhitlopü thsüde isa kheak süküp müla, tümüde isa lubo tüsho kurungasolubo mührü yo kamabahdo.”

⁶Küyimki arü arhunganimkhi inü asokhea, I khide bukakhiuk.

⁷Tsüde lümakheahbah inü limberü tüsho atorübo thürühde tha, “Nüsanü nüsa keoniorü sholü tsühchoh!” Jumonü arü azhihde inü boto jimukhung.

⁸Tüsho arü ki tha, “Isanü akukthülün keoniorü Jihudarü khiungkerü ki yinkhi rhokhitlodo, nüsa dokhühnü she nihbe keoniorü yinba de? Yungsho arü ju isa ki yinba de?” Limberübo ju jikshe müthsüdebah tüsho athapü tümü müyimkhit.

⁹Tüsho inü tha, “Nüsanü arhimokhi ju amülim ah! Nüsanü Thrünpuh ki mihyu anibeah tüsho alungki rhimobeah. Jude athsükhinü isa riri khiungkerü ki isa luhmünepü thsüde nüsanü amütsan tümü müjihde alabah.

¹⁰I tüsho I borünü mihtsürübo ki sho tüsho hi nipjihchoh. Muzhobah isanü sholü tsühkhi tukloanü!

¹¹Arü lubo, kurungasolu, oliv dungbo, thüyambo, tüsho nüsanü athrekhi sho chi shihcham, hi, yukhu aso tüsho oliv müdangke khihninü jihloang,”

¹²Limberünü alo, “Nünü athakhi yande isanü rhimoanü. Yamrüplurüp kukrukbo jihlobah tüsho arü kheaknü tümü mulu.” Inü amükeamrübo jiyuk tüsho limberünü alokhikhi dükde arhimoshihpü arü miki thiyuchihchim lushih.

¹³Tüsho I chim rümkhi shulünkhim dütründe inü tha, “Alokhikhi yande mürhimorü Thrünpuhnü ha ruk dütrünbah. Thrünpuhnü nüsa yambo tüsho nüsa kukruk tümü she maningshihde luakhinbah.” Mukhunga larü mihbüm abannü “Amen!” thsü tüsho ATUNGPUH mung shi. Tüsho limberübonü alokhikhi yande rhimo.

¹⁴I Juda lomi kurungkheak yakzanshuhrü thsükhi amuyung, Artazerzes kiulongthsü kam muku chingnü kam samrükheak mahne khiungde, I tüsho I keoniorü shenü she yakzanshuhrünü atsühbe tsühyungbe mütsüh.

¹⁵I müngüh kovünorübonü a mihtsürübo ki jim tüsho yukhu thsungkheak nimung aban shotoyinchi 40 lude hahmülang jih. Arü yamlarübonü she mihtsürübo juno. Tüshe inü a büthsüde rhimodo, tümüde inü Thrünpuh ki wüntre jihchoh.

¹⁶I sühmüh alala chipi thsülopü ching lang bahdo tüsho yamrüplurüp tümü mulu. I yamlarübo alala rhimo thsungkheak mukhungdo.

¹⁷Mutukzhakde I dükhüm kheak Jihudarü 150 tüsho limberübo, ju lung mühirü lomi chingnü arürü yimkip.

¹⁸Nimung aban moshipung 1, mihnu atsüdak 6, tüsho thunu ahihdo tüsho nimung thürü thürüpü ching yukhu atsangphüyakkhi thsakhama jihde alakheah. Tüshe mihtsürübo hahmülangpü lakhi ngübah, inü I kovünor ngüpü thülünkhi she tümü mükheang.

¹⁹O Thrünpuh, harü mihtsürübo thsungkheak inü atsü rhimokhi lümkhitjang de nü ki tamkhüntamnüchoh.