Read Yimchungru Naga Ester 3 Bible Online

Ester 3 - Yimchungru Naga bible

Ester 3

¹Ju dunglim, Zerzesnü Agag kheaknü atrükkhitkhi Hammedatha tsührü Haman ju api kiuthsü bukkhüp alala kurungkheak achangbe ching shuhkihjih.

²Kiulongthsüpuhnü Haman ki khukningde akin jihang de abukkhüp rhimorü ripit ki binrübo ki thiyukhüm jih. Arü alalanü ani tüshe Mordekainü lang mani,

³kiulongthsüpuh bukkhüp rhimorü püpürünü tümü thsükhi kiulongthsüpuh yukhüm manile de Mordekai ki keokhi;

⁴nimung aban arünü api ki thalele tha, tüshe apinü mani. Apinü alo, “I a Jihudarü ah, jumonü inü Haman ki mukhukning.” Harü ha arümkhukchode de arünü Haman ki tha.

⁵Mordekainü amiki mukhukningkhi dünkheak Haman abukakhiuk,

⁶tüsho küyimki Mordekai ju Jihudarü ah de mütsankhea api lang yungde Persia kiulongthsü ching Jihudarü alala laksahpü lümkhi thsakham.

⁷Zerzes kiulongthsü thürükheak mahnepü kam, Nisan de ajikhi akhuhbe khinu ching Hamannü rük yimpü nimung akhukhitpü thsungkheak azan thsüpü thiyukhüm jih. Khinu thürükheak mahne, Adar khinu de ajikhi thürükheak mahsampü nimung mokhit.

⁸Hamannü kiulongthsüpuh ki tha, “Nü kiulongthsü bukkhüp trük khülang lah. Arünü püpürü kheaknü büthsüde yakzan ahorichoh. Ju lang yung, arünü nü yakzan mani, jumonü judürü mihtsürü kheak amümürang thsübe yung.

⁹Kiulongthsüpuhnü mülüsho, arü sheshihpü thiyukhüm jihang, nünü ha rhimosho, nü kiulongthsü zokihpü thsüde inü shoto kukruk khahngak 340,000 zopü alokhibah.”

¹⁰Jumonü yüma ahiuhshihpü thsüde, kiulongthsüpuhnü yingkhüm yihkhita Agagrü Hammedatha tsührü Haman, Jihudarü riribuh kilim jih.

¹¹Apinü Haman ki tha, “Mihtsürü tüsho arü shobo nü yo ah; arü kheak nünü amulongkhi rhimoang.”

¹²Jushu akhuhbe khinu, thürükheak mahsam nipü Hamannü kiulongthsüpuh yo athrütrübo jibah thiyusheak ahiuhpü kiulongthsübo ching thiyutha abannü angüshihpü thsüde khede thrütshihbah atorübo tüsho kovünorbo kilim jihpü thsakham. Ju Zerzes mung chingnü yingkhümnü yümbah yüshih.

¹³Yunithsürünü thiyusheak alala ching hanbah yü. Athrütkhi ching ju, ha Adar khinu thürükheak mahsam nipü, Jihudarü alala — athunu tüsho azorü, aliberü tüsho azürü alala laksahkhambah de zahbah alakheah. Arübo ju amuzho mülade alaksahbah tüsho kukrukbo she alujihbah de thrütyuk.

¹⁴Mütsan-hüm thrütkhi ju mihbüm abannü ju nimung thsakhambah aleangshihpü thsüde kiuthsübo ching mihtsürü alala kilim khiungshihpü thsakham.

¹⁵Kiulongthsüpuh yukhüm hode thiyuzüng ju boto miki Susa kiuying ching thari, tüsho yunithsürünü ju yusheak lomibo ching hande yü. Susa kiuying lümshangmangnü mide alachoki kiulongthsüpuh le Haman ane a yukhu yungde bin.