Read Yimchungru Naga Abe 1 Bible Online

Abe 1 - Yimchungru Naga bible

Abe 1

¹Jakob tsührübo api lung nihbuh yamkhün bede ayükhi harü lakheah:

²Reuben, Simeon, Levi, Juda,

³Issakar, Zebulun, Benjamin,

⁴Dan, Naphtali, Gad tüsho Asher.

⁵Jakob tsührübo alalanü arü 70 lakheah; Josep a Ijip ching lajunga lakheah.

⁶Kheakü Josep tüsho api keoniorübo le ju lün alala sheabah.

⁷Tüshe Israelrü wüh bude hihdakde khide sühmüh lade arünü alomi mide kam.

⁸Ju kim ching Ijip lomi ching Josep mümükheahrü kiulongthsürü khülang asürü.

⁹Apinü nihbuh mihtsürü Ijiprübo ki tha, “Kheahang, Israelrübo isa kheaknü ahihbe tüsho sühmüh zahbe kamdo.

¹⁰Thirithsü akhiuksho arünü isa riri lung bebah isa kheak thirithsübah tüsho isa lomi bahjihbah atsobah. Jumonü arü wüh bukhi zhipdopü isanü limro khürü yimbeah.”

¹¹Jumonü Ijiprübonü Israelrü kurungkheak aputungrü zojihbah thsümüchide rhimo rhimoshih. Tüsho Israelrübonü kiulongthsüpuh yo ahiuharapung kiutobo Pithom tüsho Rameses thsüjih.

¹²Tüshe arü küdükhüh thsümüchikhea judükhüh alü wüh bude kam, jumonü Ijiprübonü Israelrübo ju trede kam.

¹³Tüsho Ijiprübonü Israelrübo kheak amuzho mülade thsümüchipü tankih.

¹⁴Arünü dujunglo le lotaklung tüsho thulu ching rhimo mungji alala müküpde rhimoshihkhinü arü rhangdung thsünüshih. Arünü rhimo alala ching arü thsümüchide rhimoshih.

¹⁵Judüki Ijip kiulongthsüpuhnü Ibrirü zübe-mütrürü Shipra tüsho Pua ane ki tha,

¹⁶“Küyimki nükenü Ibrirü khungarü zübechoki mütrübanü khungarü ju athrürü a sho laksahang tüshe aliberü a sho arhang lashang.”

¹⁷Tüshe anenü Thrünpuh trekhinü kiulongthsüpuhnü athakhi ju manide khungarü athrürü zübekhibo ju rhangdung lashih.

¹⁸Jumonü kiulongthsüpuhnü zübe-mütrürübo ju jibah tha, “Tümüde nükenü tsührü athrürübo rhangdung lashihcho?”

¹⁹Zübe-mütrürübonü alo, “Ibri liberübo ju Ijiprü liberübo ruk yung; arünü khide thülihde zübechoh, tüsho zübe-mütrürü khiungchokia zübea lala düchoh.”

²⁰Junangde Thrünpuhnü zübe-mütrürü kheak rhimo tüsho mihtsürübo ju alü wüh bude tüsho khide sühmüh lade kam.

²¹Zübe-mütrürübonü Thrünpuh trekhinü, apinü arü kilim nihbe yamkhünrübo jih.

²²Jumonü kiulongthsüpuhnü api mihtsürübo alala ki thiyukhüm jihde tha, “Ibrirü tsührü aso zübekhi athrürü alala Nile ayung ching shuhyuka bahang, tüshe aliberübo a arhang lashang.”