Read Yimchungru Naga Abe 10 Bible Online

Abe 10 - Yimchungru Naga bible

Abe 10

¹Kheakü ATUNGPUHNÜ Mosa ki tha, “Pharao kilim yüang; tümüde inü api tüsho ayamlarübo mulong müküpshihdo, junangde inü api miki harü amütsanbo huhbah,

²tüsho nü tsührü le nü tsührütsührünü sode inü Ijip ching arü bolung amütsanbo ato rhimokhi thaang, junangde I ATUNGPUH de nüsanü amükheahbah.”

³Jumonü Mosa tüsho Aronnü Pharao ki yübah tha, “I ATUNGPUH Ibrirü Thrünpuhnü ha thachoh: ‘Nünü I miki azhihayihpü külokhüh thsungloba? I mihtsürübo tsoshang, junangde arünü I tankihbah.

⁴Nünü I mihtsürübo mütsoshihsho, kheahang, inü shido nü lomi ching tangkhobo hande arübah.

⁵Tüsho arünü alo mithülambah, junangde shenü she alo müngükhukde alabah; tüsho arünü arulungnü aningshihkhi le thulu ching mukhuhkhi sangdungbo tsühabahbah.

⁶Tüsho arünü nü yambo le nü yamlarübo tüsho Ijiprü yam alala mibah; ha nü buh yungsho nü pü pürünü arü alomi ching arübah khihni khiungde müngüakheahkhi labah.’” Jushu apinü rholo tüsho Pharao kinü wukhiuk.

⁷Judüki Pharao yamlarübonü api ki tha, “Külokhüh ha mihtsürü isa ki qimürip laba? Mihtsürübo tsoshang, junangde arünü ATUNGPUH arü Thrünpuh tankihbah. Ijip thsümünima lah de nünü mümükheah de?”

⁸Jumonü Mosa le Aron ane Pharao ki bedarü tüsho tha, “Yüang, ATUNGPUH nüsa Thrünpuh tankihang. Tüshe awulungrübo ju sherü a?”

⁹Tüsho Mosanü alo, “Isa azürü tüsho azorü alala tsobah; isa tsührübo le tsührübebo, mihnu le moshi boto bebah atsobah, tümütüsho isanü ATUNGPUH kilim thüniopü lah.”

¹⁰Apinü anihbuh ki tha, “Inü nü tüsho nü khungarübo yüshih-a lasho ATUNGPUH nüsa lung lashang! Kümkangang, tümüde nüsa lüm ching amütsü lah.

¹¹Jude yung! Kheakü nüsa athrürübo lang yüang tüsho ATUNGPUH tankihang, tümüde ha nüsanü akünkhi ah.” Tüsho ane ju Pharao mikinü yankhitabah.

¹²Judüki ATUNGPUHNÜ Mosa ki tha, “Tangkhobo thsungkheak Ijip lomi kumung nü khah chungkihang, junangde arü Ijip lomi ching arübah arulungnü aningshihkhi alala tsühbah.”

¹³Jumonü Mosanü Ijip lomi kumung api tso chungkih, tüsho ATUNGPUHNÜ ju ni tüsho ju tsüngre amuyung aniakhiuklim pung khülang lomi ching arüshih. Tüsho küyimki ayinkhikhea, aniakhiuklim pungnü tangkhobo yünde arüa lakheah.

¹⁴Tangkhobo Ijip lomi alala ching arü. Arübo abo thsübah alakheah; adüso arü müngüh ha ruk tangkho mülaakheah, yungsho arü dunglim mülalo.

¹⁵Tümütüsho arünü alomi abümnü mitingdo akampü thsüde lüpdoabah; tüsho arünü arulungnü aningshihkhi sangrung tüsho sangasobo tsühabah. Jumonü Ijip lomi alala ching sangdungbo yungsho sangrungbo kheak aphüyak mülakheah.

¹⁶Judüki Pharaonü niokheamde Mosa tüsho Aron jibah tha, “Inü ATUNGPUH nüsa Thrünpuh tüsho nüsa azhihde neak yihbeakdo.

¹⁷Jumonü kheakü, muzhobah khülang ki I neak bahjang, tüsho ATUNGPUH nüsa Thrünpuh ki tamkhüntamnüang, junangde apinü ha ashebe I kheaknü lude atsobah.”

¹⁸Jumonü apinü Pharao kinü wukhiuk tüsho ATUNGPUH ki tamkhüntamnü.

¹⁹Tüsho ATUNGPUHNÜ aniyüzahlim pung amüküp müthri, junü tangkhobo ju yüna lubah Amürüm Keto ching yüzah. Ijip lomi alala ching tangkho khülang she aninga mülakheah.

²⁰Tüshe ATUNGPUHNÜ Pharao mulong müküploshih, tüsho Israelrübo mütsoshih.

²¹Judüki ATUNGPUHNÜ Mosa ki tha, “Nü khah thüning lim chungkihang, junangde Ijip lomi zhingdopü thsüde amiting akheah arübah.”

²²Jumonü Mosanü thüning lim akhah chungkih, tüsho Ijip lomi alala ching nimung mahsam amiting akheah lakheah.

²³Arü khülangnü khülang müngüachih; yungsho sheshe nihbuh dangpung chingnü nimung mahsam matrüt. Tüshe Israelrü alala arü lapungbo ching ayin lakheah.

²⁴Judüki Pharaonü Mosa jibah tha, “Yüang, ATUNGPUH tankihang; nü mihnu tüsho moshi boto lang zojihbah aliberü le azürübo she nü lung yüshang.”

²⁵Tüshe Mosanü tha, “Nünü isa kilim laksah-a kingaünbe tüsho taka kingaünbebo she ajihbeah, junangde isanü ATUNGPUH isa Thrünpuh kilim kingaünbah.

²⁶Isa akam-shiwühbo khülang she maningshihde isa lung yübah. Tümütüsho khürüa ATUNGPUH isa Thrünpuh kingaünpü lubah, tüsho küdürünü ATUNGPUH kingaünbeanü ju ching mukhiungyikia isanü mümükheah.”

²⁷Tüshe ATUNGPUHNÜ Pharao mulong müküpde kamshih, tüsho arü mütsoshih.

²⁸Judüki Pharaonü api ki tha, “I kinü tsoang! Nünü I miro müngülopü mütsanang! Tümütüsho nünü I miro ngü nimung nü ashebah!”

²⁹Tüsho Mosanü alo, “Nünü dükde thado. Inü küyimkishe nü miro müngülo.”