Read Yimchungru Naga Abe 11 Bible Online

Abe 11 - Yimchungru Naga bible

Abe 11

¹Tüsho ATUNGPUHNÜ Mosa ki tha, “Kheaküshe inü Pharao tüsho Ijip kheak arüm khülang hande arübah. Jushu apinü nüsa ha chingnü atsoshihbah. Küyimki apinü nüsa tsoshihbanü, tsükjide apinü nüsa athrünkhi yankhitbah.

²Kheakü mihtsürübonü sode asukang, tüsho shotoyinchi le suna kukrukbo thsungkheak athrürü tüsho aliberü abannü nihbuh yamhingrü ki keokhishang.”

³ATUNGPUHNÜ Israelrü kheak Ijiprünü wüntre jihshihde kam. Kheaküshe Mosa ju Ijip lomi ching Pharao yamlarübo tüsho mihtsürübo miki khide wüntre ato lakheah.

⁴Judüki Mosanü tha, “ATUNGPUHNÜ ha thachoh: Tsüngphulung ching I Ijip alala ching yübah.

⁵Pharao tsührü adüjibuh api kiulongthsübinkiu kheak binkhinü rhebah, yamlaberü tsührü adüjirü hi chupung lakhi, tüsho akhuh anukhi shiwüh alala Ijip lomi ching shebah.

⁶Judüki Ijip lomi alala ching tripachih ato labah, ha nangde müngühlim müla yungsho küyimkishe mülalo.

⁷Tüshe Israel mihtsürü yungsho shiwüh azhihde khihnunü she müchi, junangde Ijiprü tüsho Israel dükeak ATUNGPUHNÜ büthsülah de nüsanü amükheahbah.

⁸Tüsho nü yamlarübo alalanü I ki arübah athabah, ‘Nü tüsho nü lung yürü alala wukhiukang!’ Jushu I wukhiukbah.” Tüsho Pharao mikinü apinü khide bukakhiukde wukhiuk.

⁹Tüshe ATUNGPUHNÜ Mosa ki tha, “Pharaonü nü ki mani, junangde I yo khinthiyinbebo Ijip lomi ching alü kamshihbah.”

¹⁰Jumonü Mosa le Aron bünenü harü khinthiyinbebo alala Pharao miki rhimo; tüshe ATUNGPUHNÜ Pharao mulong müküpde kamshih, tüsho Israelrü api lomi chingnü mütsoshih.