Read Yimchungru Naga Abe 13 Bible Online

Abe 13 - Yimchungru Naga bible

Abe 13

¹Judüki ATUNGPUHNÜ Mosa ki tha,

²“Israelrü lung akhuhde azübekhi athrürü tüsho akhuhde anukhi shiwüh I kilim müsühkhitang; ju I yo ah.”

³Mosanü mihtsürübo ki tha: “Nüsa Ijip azhorü yamkhün chingnü awukhiukkhi ha nimung lümkhitang; tümüde ATUNGPUH khah sühmühnü ha dangpung chingnü nüsa bekhit. Phaüm yukkhi yikhap mütsüh.

⁴Abib khinu, ha nimung nüsa wukhiukchoh.

⁵Küyimki ATUNGPUHNÜ nüsa jihpü nüsa jipürü ki alokhikhi Kananrü, Hitrü, Amorrü, Hivrü tüsho Jebusrü niuhke tüsho mukhuke bukkhi lo ching bede yüzahbanü nüsanü ha khinu ching amukhung laang.

⁶Nimung thüne nüsanü phaüm muyukkhi yikhap tsühbah, tüsho athüne nipü ATUNGPUH kilim thünio labah.

⁷Phaüm Muyukkhi yikhap ju nimung thüne tsühbah. Tüsho nüsa lomi alala ching phaüm yukkhi yikhap yungsho phaüm müngüshihbeah.

⁸Tüsho ju nimung nünü nü tsührü ki thabah, ‘I Ijip chingnü akhiukchoki ATUNGPUHNÜ I thsungkheak rhimokhi dünkheak ha rhimochoh.’

⁹Ha nü kilim nü khah kheak amütsan khülang tüsho nü kingkang kheak amümihbe nangde alabah, junangde ATUNGPUH yakzan nü mün ching labah; tümüde ATUNGPUH khah adüküngnü nüsa Ijip chingnü bekhit.

¹⁰Jumonü nüsanü ha arüngako kam aban akheahmünchi ching laang.

¹¹“Küyimki ATUNGPUHNÜ nüsa le nüsa jipürü ki alokhikhi Kananrü lo ching nüsa bede yüzahbanü tüsho nüsa jihbanü,

¹²akhuhde anukhi pung ATUNGPUH kilim jihang. Nüsa shiwüh akhuh anukhi pung ATUNGPUH yo ah.

¹³Tüshe donki akhuh anukhi aban namfimihnunu khülangnü nünü rhokhitang; nünü ju mürhokhitsho, nünü ahung yihshakbah. Tüsho nü tsührü bolung adüjirü athrürü nünü arhokhitbah.

¹⁴Jumonü nü tsührünü arübe kim ching nü ki, ‘Ha tümü a?’ de keokhisho, nünü api ki thabah, ‘ATUNGPUH khah adüküngnü isa Ijip azhorü yamkhün chingnü bekhitkheah.

¹⁵Küyimki Pharaonü isa tsoshihpü nihnihkheanü, ATUNGPUHNÜ Ijip lomi ching akhuh zübekhi mihtsürü tüsho shiwüh laksah. Jumonü shiwüh akhuh anukhi pungbo ATUNGPUH kilim jihchoh, tüshe akhuh zübekhi I tsührübo a inü rhokhitchoh.’

¹⁶Ha nü khah kheak amütsan khülang tüsho nü kingkang kheak amümihbe khülang labah, tümüde ATUNGPUH khah adüküngnü isa Ijip chingnü bekhit.”

¹⁷Küyimki Pharaonü mihtsürübo tsoshihkheanü, Thrünpuhnü aphünibe thsüa lalashe arübo Filistia lomi limronü mübe, tümüde Thrünpuhnü tha, “Arünü thirithsü ngüsho mihtsürübonü lümkhi müthribah tüsho Ijip lim rholode ayübah.”

¹⁸Jumonü Thrünpuhnü Amürüm Keto sunglo mükamde mihtsürübo be. Israelrünü thirithsüpü züt thsübah Ijip chingnü wukhiuk.

¹⁹Tüsho Mosanü Josep robo api lung lubah yü, tümüde apinü Israelrü ki thiyuchihchimde thaa zo, “Tsükjide Thrünpuhnü nüsa rhua kheahbah, tüsho nüsanü I robo ha chingnü nüsa lung hande awutubah.”

²⁰Jumonü arünü Sukkoth chingnü tsahmusu tüsho sunglo yean Etham ching binkheam.

²¹Tüsho ATUNGPUHNÜ arü müngüh animung amo dungtonü limro bepü tüsho azhing ching mo dungtonü arü kilim ayin jihpü yü, junangde animung tüsho are tsahpü lakheah.

²²Apinü mihtsürü müngühnü animung amo dungto yungsho azhih ching mo dungto lude mutso.