Read Yimchungru Naga Abe 15 Bible Online

Abe 15 - Yimchungru Naga bible

Abe 15

¹Judüki Mosa tüsho Israelrünü ha khün thsü, “Inü ATUNGPUH ki khün thsübah tümüde apinü müretahde akuk ngüdo; khora tüsho api kheak binrü keto ching jipa yüzahshih.

²ATUNGPUH ju I sühmüh tüsho I khün, tüsho api I khümkhitbuh kamdo; ha I Thrünpuh, tüsho inü api shibah, I buh pürü Thrünpuh, inü api shuhkihbah.

³ATUNGPUH a athrungrü mihtsürü ah; ATUNGPUH ju api mung ah. @SPACE =

⁴“Pharao khora-lolungbebo tüsho api bonungrü apinü keto ching jipyuk; tüsho amokhitkhi api torübo Amürüm Keto ching thüraksah.

⁵Kekingnü arü zündo; lung khülang nangde arübo asükbo ching yüzah.

⁶O ATUNGPUH , wu ching müretahkhi nü khah tsülimnü, O ATUNGPUH , nü khah tsülimnü thiriri adütre kamde yihthünak.

⁷Nü wüntre-müretah ato ching nünü nü azhihrübo lahyuka bah; nü bukakhiukkhi yüshihbah müneang nangde arü aniuabah.

⁸Nünü keto kheak müt tüsho ke rhungkih; ha rhü khülang nangde lah-a mudung; keto kero phulung ju khunungabah.

⁹Thiririnü tha, ‘Inü amüshambah, inü ayanphuhbah, inü arü lakhit chambah tüsho I künkhi alala lubah; inü I nukshang dukkhitbah tüsho arü lakhi alala lubah.’

¹⁰Nü sheaknü müta arübo ketonü zhidoabah; yinchi mülang nangde arübo ke ato ching keamyuk. @SPACE =

¹¹“O ATUNGPUH , thrünpuhbo lung nü ruk she la? Amüsüh ching wüntre-müretah, mungshi ching atrebe, khinthiyinbe rhimokhi ching nü ruk she la?

¹²Nünü nü khah tsülim chungkih, alonü arü muyuabah. @SPACE =

¹³“Nünü amuzhodakkhi ching nünü arhokhitkhi mihtsürü nünü be, nünü nü sühmühnü nü lapung amüsüh lim arü limbe.

¹⁴Mihtsürübonü sodo, arünü ajan; Filistia ching larü trede kam.

¹⁵Kheakü Edom limberübo treabahdo; Moab wuto mihtsürübo ajanchoh; Kanan mihtsürübo arü mulong niuabahdo.

¹⁶Mihtrebe tüsho atrebe arü kheak keamkih; nü khah tokhi hode arübo lung nangde mülüplüp, O ATUNGPUH , nünü athulokhi nü mihtsürü muhoyi khiungde.

¹⁷Nünü arü bede yüzahbah nü wung kheak khimbah, O ATUNGPUH , nünü nü lapung thsükhi dangpung, O ATUNGPUH , nü khahnü athsükhi arüngakopung.

¹⁸ATUNGPUHNÜ lünnü lün kiulongthsübah.”

¹⁹Tümüde Pharao khorabo api khora-lolungbebo tüsho khoraberübo lung keto ching yüzah, tüsho ATUNGPUHNÜ arü kheak keto kebo belodarü. Tüshe Israelrü kero phulung ching alo akung kheaknü yü.

²⁰Judüki Aron achi amükeambe Mariamnü akhah ching züpzüppü lu; tüsho aliberü alalanü züpzüppü shuhbah tsünde anihbe dunglim wukhiuk.

²¹Tüsho Mariamnü arü ki khün thsü: “ATUNGPUH ki khün thsang, tümüde apinü müretahde kukdo; khora tüsho aberü apinü keto ching jipyuk.”

²²Jushu Mosanü Israel Amürüm Keto chingnü mikhuhlim bede yü, tüsho arünü Shur sunglo limpeang yü; arünü sunglo ching nimung mahsam yü tüsho ke müngüde alakheah.

²³Küyimki arü Mara ching arükhea, arünü Mara ke muyungkhuk, tümüde ju akhüh lakheah; jumonü ju ki Mara de ji.

²⁴Tüsho mihtsürübonü dapdapneangneangde Mosa ki tha, “Isa tümü yungba?”

²⁵Tüsho apinü ATUNGPUH ki zhi; ATUNGPUHNÜ api ki sang khülang huh, tüsho apinü ju ke ching jipyukshe, ke ju aniung kam. Ju ching apinü arü thsungkheak yakzan tüsho thiyuzüngbo thsakham. Tüsho apinü ju ching arü rükakheah,

²⁶tüsho tha, “Nüsanü ATUNGPUH nüsa Thrünpuh yu anide api miki alungki rhimode api yukhümbo anide tüsho api yakzan alala zosho, inü Ijiprü kheak hande arükhi tukthsübo tümü she nüsa kheak müyükihshih. Tümüde I nüsa thsüngurü ATUNGPUH ah.”

²⁷Jushu arübo kekhip 12 tüsho ashidung 70 lapung Elim ching arü; junangde arübo keyean binkheam.