Read Yimchungru Naga Abe 17 Bible Online

Abe 17 - Yimchungru Naga bible

Abe 17

¹ATUNGPUH yukhüm yande Israel boto alala Zin sunglo chingnü tsahmusude yü tüsho Rephidim ching binkheam; tüshe ju ching mihtsürübo thsungkheak ayungpü ke mülakheah.

²Jumonü mihtsürübonü Mosa bede müneah tüsho tha, “Isa yungpü ke jihang.” Tüsho Mosanü arü ki alo, “Tümüde nüsanü I müneahcho? Tümüde nüsanü ATUNGPUH rükakicho?”

³Ju ching mihtsürübo kethüri tüsho Mosa azhihde dapdapneangneangde tha, “Tümüde isa le isa tsührübo tüsho akam-shiwühbo kethürinü asheshihpü Ijip chingnü abekhitkhea?”

⁴Jumonü Mosanü ATUNGPUH ki zhide tha, “Inü ha mihtsürü kheak küde athsüba? Arünü I lungnü arupü thsüchoh!”

⁵Tüsho ATUNGPUHNÜ Mosa ki alo, “Nü lung Israel azothsürü khürü bebah mihtsürü müngüh yüang; tüsho nünü Nile rhapkhi tso nü khah ching luang tüsho yüang.

⁶Kheahang, I nü müngüh Horeb kheak zhipbah; nünü lungto kheak rhapbah tüsho ke akhiukbah, junangde mihtsürübonü ayungbah.” Tüsho Israel azothsürübo mikinü Mosanü jude rhimo.

⁷Jumonü apinü ju dangpung ki Massa tüsho Meriba de ji, tümütüsho Israelrünü rukachih tüsho ATUNGPUH rükakide tha, “ATUNGPUH isa lung la shi müla?”

⁸Kheakü Amalekrü arü tüsho Rephidim ching Israel bede keochih.

⁹Tüsho Mosanü Jihusua ki tha, “ Mihtsürü khürü mokhitang tüsho wukhiukbah Amalekrü bede keochihang. Shido Thrünpuh tso I khah ching shuhbah awung mujuk kheak zhipbah.”

¹⁰Jumonü Mosanü athakhi nangde Jihusuanü rhimo. Mosa le Aron tüsho Hur arünü awung mujuk kheak yükih.

¹¹Junangde Mosanü akhah chungkih-a lachoki Israelrünü kuk; tüsho akhah keamkhichoki Amalekrünü kuk.

¹²Tüshe Mosa khahbo keahkhiabah; jumonü arünü lung khülang lubah api ju kheak binshih. Aron le Hur bünenü khülangnü thripkhüh khah tüsho khülangnü püpü thrip de thsungkihjih; tüsho ani yüzah khiungde api khahbo düküngde alakheah.

¹³Jumonü Jihusuanü Amalekrü nukshangnü kuk.

¹⁴ATUNGPUHNÜ Mosa ki tha, “Ha mümihpü thsüde hüm ching thrütang tüsho Jihusuanü sode kheang, junangde Amalekrü lümkhitpü yinmi bukkhüpnü shahde nankhita bahbah.”

¹⁵Tüsho Mosanü kingaün sadam khülang thsübah amung ji, ATUNGPUH ju I yo riphin.

¹⁶Apinü tha, “Tümütüsho khahbo ju ATUNGPUH kiulongthsü-binkiu lim shuhkih. ATUNGPUHNÜ Amalekrü azhihde lünnü lün thirithsübah.”