Read Yimchungru Naga Abe 2 Bible Online

Abe 2 - Yimchungru Naga bible

Abe 2

¹Kheakü Levi trük mihtsürü khülangnü Leviberü khülang lung yamkhün thsü.

²Tüsho alibenü api khilim tsührü athrürü khülang zübejih. Küyimki alibenü khungarü ju athrürü atsü ngükhea, anihbenü api khinu mahsam müyima zo.

³Küyimki alibenü api mümüyimkhukde akamkhea, anihbenü khiuktonü akeakkhi muluk khülang dükhühnü müjimdo, tüsho khungarü ju ching shuhyukbah kemungyean pheang rung ching zo.

⁴Khungarü kheak ju tümü dünjibanü de achinü limshu chingnü kheahde zhip.

⁵Judüki Pharao tsührü aliberü ayung ching kemüyihpü yüzah tüsho anihbe yamlaberübo kemungyean tsahde alakheah; alibenü pheang rung ching muluk ju ngü tüsho ju lubah arüpü anihbenü ayamlaberü khülang yüshih.

⁶Kiulongthsüpuh tsührübenü ju khimshuh tüsho khungarü athrürü khülang ngü. Khungarü junü trip, tüsho anihbenü api dünkheak amulong ching muzhode lümbah tha, “Ha Ibrirü tsührü bolung khülang ah.”

⁷Judüki achinü Pharao tsührübe ki keokhi, “Nü thsungkheaknü Ibriberü bolung chingnü khungarü mütrürü khülang inü jide arüba shi?”

⁸Alibenü alo, “ Jude thsang,” Jumonü alibenü yübah khungarü abe ju bedarüjih.

⁹Kiulongthsüpuh tsührübenü alibe ki tha, “Khungarü ha bede yüang tüsho I thsungkheaknü mütrüjang, tüsho inü nü kilim mihkhahmo jihbah.” Jumonü alibenü khungarü ju bede yü tüsho mütrü.

¹⁰Küyimki khungarü ju zode arükhea, alibenü api ju kiulongthsüpuh tsührübe kilim bebah arü tüsho api anihbe tsührü kam. Alibenü api mung Mosa de ji, tümütüsho alibenü tha, “Inü api ke chingnü thokhit.”

¹¹Nimung khülang, Mosa zode arüshu api mihtsürü kilim yü tüsho arü müküpde arhimokhi kheah. Apinü anihbuh mihtsürü Ibrirü khülang Ijiprü khülangnü kingde ngü.

¹²Jumonü apinü khülim khülim mürünga kheahbah she müngükhinü Ijipbuh ju laksah tüsho loyi ching ramabah.

¹³Apinü ashido she yü tüsho Ibrirü mahne rukachihkhi ngübah amülimbuh ki tha, “Tümü thsükhi nü müyamrü Ibrirü lakcho?”

¹⁴Mihtsürü junü alo, “Shepünü nü isa kurungkheak yakzanshuhrü tüsho mahkhaprü kamshihkhea? Nünü Ijipbuh laksahkhi ruk thsü I she alaksahpü lümcho de?” Judüki Mosanü tre tüsho lüm, “Inü arhimokhi mükheahabahdo.”

¹⁵Küyimki kiulongthsüpuhnü ha sokhea, apinü Mosa laksahpü yim tüsho Mosa ju Pharao kheaknü tsoabah, tüsho Midia lomi ching yübah apinü kekhip khülang ki bin.

¹⁶Midiarü amükeamrü khülang Jethro tsührü aliberü 7 lakheah, arünü arü abuh namfimihnubo thsungkheaknü sopungbo mide ke ju khip.

¹⁷Namfimihnu neakrü khürü arübah arü yanabah, tüshe Mosanü wusubah arübo rungde namfimihnu boto ke duh.

¹⁸Küyimki anünürübo ju arü abuh kilim arükhea, apinü arü ki keokhi, “Tümü thsükhi khihni a nüsa hade nahnah alungcho?”

¹⁹Arünü tha, “Ijiprü khülangnü isa namfimihnu neakrübo khah chingnü khümkhit. Apinü isa thsungkheak ke she khipjih tüsho namfimihnubo kilim ke duh.”

²⁰Apinü atsührü anünürübo ki keokhi, “Tüsho api küching la? Tümüde nüsanü api ju ching bahjihkhea? Api isa lung tsühyungshihpü thsüde jidarang.”

²¹Jumonü Mosanü ju ching lapü mulongde kam tüsho Jethronü atsührü Zippora Mosa kilim ayamkhünbe thsüpü jih.

²²Anihbenü api khilim tsührü athrürü 1 zübejih, tüsho Mosanü api mung Gershom de ji tümütüsho apinü tha, “Khiungkerü lomi ching I tsotsahrü thsüde lah.”

²³Kam ahihkhüh labah dunglim Ijip kiulongthsüpuh ju sheabah, tüshe Israelrübo küpkhuk alü kam, tüsho arünü azhorü kuhi chingnü ashede zhi, tüsho arünü azhikhi Thrünpuh khiung.

²⁴Jumonü Thrünpuhnü arü ashekhi so, tüsho Abraham, Isak tüsho Jakob ki apinü tangzüngkhi lümkhit.

²⁵Thrünpuhnü Israelrübo azhorü kuhi ching lakhi ngübah arü thsungkheak lümrhihjih.