Read Yimchungru Naga Abe 21 Bible Online

Abe 21 - Yimchungru Naga bible

Abe 21

¹“Kheakü nünü arübo miki zojihpü yuzüngbo ju harü labah:

²Nünü Ibrirü azhorü thulosho, apinü kam thuruk nü tankihbah; tüsho athünepü ching tümü müjihde zuzu thsüde api awukhiukbah.

³Api alangzü azah-a lasho, api langzü wukhiukbah; api yamkhün thsüa lasho, alibe ju api lung wukhiukbah.

⁴Api putungrünü aniube lujih-a lasho, tüsho api kilim tsührübo le tsührübebo zübejih-a lasho, aniube le atsührübo ju alibe putungrü yo thsübah, tüsho api langzü wukhiukbah.

⁵Tüshe azhobuhnü, ‘Inü I putungrü, I niube, tüsho I tsührübo muzholah; I zuzu kamde muwukhiuk’ de thasho,

⁶judüki api putungrünü mahkhaprübo ki anihbuh bedarübah. Apinü anihbuh ju khimdopü yungsho khimdopü dungjingbo ki bede ayübah, tüsho anihbuh putungrünü hühzonü api nuku phitjihbah; tüsho apinü anihbuh lünnü atankihbah.

⁷“Tüsho mihtsürü khülangnü api tsührübe azhoberü thsüde yinsho, alibe ju athrürü azhorü nangde muwukhiuk.

⁸Api niube thsüpü keoa lakhi alibenü nihbe putungrü mümürühsho, alibe ju arhokhitshihbah; apinü alibe khiungkerü ki yinpü alim müla, tümütüsho apinü anihbe ki mulungkide rhimodo.

⁹Apinü nihbuh tsührü thsungkheak alibe keojihsho, apinü anihbe ki nihbuh tsührübe nangde akheahbah.

¹⁰Apinü aniube püpü lusho, apinü anihbe ki tsühyungbe, khimmih yungsho yamkhün thsükhi alim mükeamkhi.

¹¹Apinü alibe thsungkheak harü mahsam mürhimosho, sho tümü mulujihde alibe wukhiukshihbah.

¹²“Shepünü mihtsürü khülang kinga sheshihbanü api asheshihbah.

¹³Tüshe apinü anihbuh aleangde mübinde Thrünpuhnü api khah ching keamshihsho, inü amokhitpü lakhi dangpung ching api tsode ayübah.

¹⁴Tüshe mihtsürü khülangnü lümkhi thsübah akhekhungnü khürü laksahsho, I kingaün sadam kheaknü bede tsoang tüsho laksahang.

¹⁵“Shepünü abuh yungsho abe shikbanü asheshihbah.

¹⁶“Shepünü mihtsürü ahüh-a lubah ayinba, yungsho api khah ching yimkhitsho api asheshihbah.

¹⁷“Shepünü abuh yungsho abe athrubanü asheshihbah.

¹⁸“ Mihtsürü rukachihbah khülang kheak lungnü kingsho yungsho khah zhimpungbah shangsho tüsho mihtsürü ju müshe tüshe yapkiu kheak yapsho,

¹⁹mihtsürü ju tso shuhbah asürü wungdo tsahsho, api lakbuh ju hahmülang müla; tütüshe api kim bahkhi dün jihlobah tüsho tsüde athsüngujihbeah.

²⁰“ Mihtsürü khülangnü anihbuh athrürü yungsho aliberü azhorü shitsonü laka ju kheak sheshihsho api athsümüchibah.

²¹Tüshe azhorü ju nimung khülang yungsho mahne rhangdung lasho, api müthsümüchi; tümüde azhorü ju api kukruk ah.

²²“ Mihtsürü shochihbah mihlaberü lakrhaka khungarü yurisho, tüshe alibe müyurisho, ayamkhünbuhnü akheangkhi yande api kheak mah thsübah; tüsho mahkhaprübonü zanzhakkhi nangde apinü ajihbah.

²³Tüshe khitode yurisho, nünü rhangdung müthri rhangdung jihbah,

²⁴mük müthri mük, hü müthri hü, khah müthri khah, jing müthri jing,

²⁵atakkhi müthri atakkhi, yurikhi müthri yurikhi, alakkhi müthri alakkhi.

²⁶“ Mihtsürü khülangnü anihbuh athrürü yungsho aliberü azhorü mük kheak laka thsümünimshihsho apinü mük dünkheak azhorü ju zuzu thsüde adükhebah.

²⁷Apinü ahü lakkhijihsho apinü azhorü ju hü dün zuzu thsüde adükhebah.

²⁸“ Moshipungnü mihtsürü khürü khusahsho, moshipung ju lungnü akingsahbah, tüsho ashih mütsüh; tüshe moshipung putungrü müthsümüchi.

²⁹Tüshe moshipung junü müngühlim khude labah aputungrü ki mükheahshihbah mürihdode khürü khusahsho, ju lungnü akingsahbah, tüsho aputungrü she asheshihbah.

³⁰Tütüshe api ki adün kheangsho, tümüpürü kheangbanü apinü jihbah anihbuh rhangdung rhokhitpü kuklah.

³¹Tsührü athrürü yungsho aliberü thsüthsü khusahsho, ha mahkhapkhi yande api ki rhimobah.

³²Moshipungnü athrürü yungsho aliberü azhorü khusahsho, ju putungrünü azhorü putungrü kilim shotoyinchi 30 jihbah, tüsho moshipung ju lungnü akingsahbah.

³³“ Mihtsürü khülangnü alokhün müyihdode zosho yungsho alo kiubah mülüpdode moshipung yungsho donki keamyuksho,

³⁴alokhün putungrünü kukshahkhi dün jihbah; apinü aputungrü kilim sho jihbah tüsho ashekhi shiwüh ju api yo thsübah.

³⁵“ Mihtsürü khürü moshipungnü püpürü yo yuria sheshihsho, arünü arhang lakhi moshipung yinbah adün ju achambah; tüsho ashekhi shiwüh she arü chambah.

³⁶Tüshe moshipung junü müngühlim khuchoh de mükheahbah mürihdoa lasho, apinü moshipung müthri moshipung jihbah, tüsho ashekhi shiwüh ju api yo thsübah.