Read Yimchungru Naga Abe 22 Bible Online

Abe 22 - Yimchungru Naga bible

Abe 22

¹“ Mihtsürü khülangnü moshipung yungsho namfimihnu ahühbah laksahsho yungsho yinsho, apinü moshipung 1 dün moshipung 5 tüsho namfimihnu 1 dün namfimihnu 4 jihlobah.

²Ahührü khülang chakashungde azahkhi ngübah kinga sheshihsho, api thiyih bukkhi dünkheak amülim tümü müla.

³Tüshe ha ani akhiuk dunglim dünjisho thiyih bukkhi api mülimkhi labah. Ahührünü dükde ashaklobah, tüshe api tümü mülasho anihbuhnü ahühkhi dün api azhorü thsüde ayinbeah.

⁴Ahührü khah ching moshipung yungsho donki yungsho namfimihnu arhangnü ngükhitsho, apinü mahne kinü alü thsüde ajihlobah.

⁵“ Mihtsürü khülangnü thulu yungsho kurungasolu ching anihbuh akam-shiwüh yimkipsho tüsho dükhea yünü püpürü lu ching yimtsühsho, apinü nihbuh lu yungsho kurungasolu ching yo atsübenü ashaklobah.

⁶“ Mo takmusubah ayangrung chingnü hode yünü hi rhipa zokhi, azhipkhi hi, yungsho thulu aniuabahsho, atakbuhnü alala shaklobah.

⁷“ Mihtsürü khülangnü api yamhingrü khah ching sho yungsho kukruk zojihbah ayam chingnü ahühsho, tüsho ahührü ju ngükhitsho apinü mahne kinü alü shaklobah.

⁸Ahührü ju müngükhitsho, thüyam putungrü ju apinü ayamhingrü kukruk ching akhah chunga la shi yungnü akheahpü mahkhaprü ki bedarübah.

⁹“ Jangachihara thsungkheak, moshipung, donki, namfimihnu yungsho khimmih, yungsho tümükhüh dükheakkhi khürünü api yo ah de thasho, ane chido mahkhaprü ki bedarübah; tüsho mahkhaprünü amülim jihbuhnü ayamhingrü ki mahne kinü alü shaklobah.

¹⁰Mihtsürü khülangnü nihbuh yamhingrü ki donki, moshipung, namfimihnu yungsho shiwüh khürü zojihbah shesho, yurisho yungsho kita bede tsobah, shenü müngüsho,

¹¹judüki yamhingrü kukruk kheak apinü khah muchung de ane dükeak ATUNGPUH miki thiyuchihchim thsübah; aputungrünü ju leangkhibah, tüsho ashaklopü yihnüpü müla.

¹²Tüshe shiwüh ju ahüh-a lasho apinü aputungrü ki shaklobah.

¹³Ju ari-shiwühnü adütre kamde chakthünaka lasho, apinü amütsan thsüde hande arübah, tüsho ashaklopü yihnüpü müla.

¹⁴“ Mihtsürü khülangnü api yamhingrü kheaknü shiwüh müshih-a lubah aputungrü mübede yurisho yungsho shesho, apinü ashaklobah.

¹⁵Tüshe aputungrü ju shiwüh lung bea lasho amüshihrünü müshaklo. Shiwüh ju muloa lasho, amulokhi dün sho jihkhi junü adükheakkhi khaabahchoh.

¹⁶“ Mihtsürü khülangnü anihbuhnü thiyu zoa mülade atsangkhit anünürü thsümünimsho, tüsho alibe lung yapsho apinü alibe kilim aniube thsüpü dünkheak jihbah.

¹⁷Alibe abuhnü api kilim jihpü zhikde lang thsunglosho, apinü alibe abuh kilim atsangkhit anünürü rhangchoki dünkheak jihkhi yande sho jihbah.

¹⁸“Wurük-huhrü sheshe rhangdung dülashih.

¹⁹“Shepünü shiwüh lung müzammürambanü tsükjide asheshihbah.

²⁰“ATUNGPUH kheak hode shepünü püpü thrünpuh ki laksah-a kingaünbanü shahde adükheakshihbah.

²¹“Nüsanü hanrü dükheahmüchih yungsho api düjuno, tümüde Ijip lomi ching nüsa hanrü lakheah.

²²Nüsanü khimoberü yungsho mürerü dükheahmüchih.

²³Nüsanü arü kheahmüchihsho, tüsho arünü I ki zhisho, tsükjide inü arü zhikhi sobah;

²⁴tüsho I bukakhiukkhi takde akambah, tüsho inü nüsa nukshangnü alaksahbah; nüsa niuberü ju khimoberü tüsho nüsa tsührübo mürerü kambah.

²⁵“Nüsanü nüsa lung lakhi zhochihrü I mihtsürü ki sho nipshihsho, nüsanü api ki shonip-jihrü nangde müthsübeah; nüsanü api ki sholü dülu.

²⁶Nünü thiyuchihchimde nü yamhingrü khimmih lusho, ani müyüzahyide api kilim jihloang.

²⁷Tümüde ju lang api lamlambe khimmih ah. Api tümü ching yappü? Tüsho küyimki apinü I ki zhibanü, inü asobah, tümüde I a mihmuzhorü ah.

²⁸“Nünü Thrünpuh düluhmüne, yungsho nüsa mihtsürü yakzanshuhrü dathru.

²⁹“Nünü akhuh yimlukhi tüsho sangaso-kebo kingaün jihpü dashu. Nü tsührü adüjibuh I kilim jihang.

³⁰Nünü nü moshipungbo tüsho namfimihnubo she ju ruk thsang. Abe lung nimung thüne labah; atizheah nipü nünü I kilim jihang.

³¹“Tüsho nü I mihtsürü amüsüh labah: nünü thulu ching arishiwühnü anguhsahkhi shih tümü dütsüh; nünü ju khihnu kilim jipa bahang.