Read Yimchungru Naga Abe 24 Bible Online

Abe 24 - Yimchungru Naga bible

Abe 24

¹ATUNGPUHNÜ Mosa ki tha, “Nü le Aron, Nadab le Abihu, tüsho Israel azothsürü 70 I kilim atuang tüsho limshu chingnü kingaünang.

²Tüsho Mosa lang ATUNGPUH thüninde arübah, tüshe arübo a thüninde marü; yungsho api lung mihtsürübo muwutu.”

³Jumonü Mosanü akibah mihtsürübo ki ATUNGPUH yubo tüsho yakzanbo alala tha. Mihtsürü alalanü düsheak khülangnü alo tüsho tha, “ATUNGPUHNÜ athakhi yubo alala isanü arhimobah.”

⁴Mosanü ATUNGPUH yu alala thrüt. Tüsho apinü yapsu mükikde asürübah müzüng jing kheak kingaün sadam khülang thsü, tüsho Israel trük thürükheak mahne ayannü dungjing thürükheak mahne khim.

⁵Judüki apinü Israel athunu mihtsürü yüshih, tüsho arünü taka kingaünkhi tüsho moshipungbo laksah-a ATUNGPUH kilim mungtsü kingaün jih.

⁶Mosanü athiyih chamkhüh lubah müsühmüra-phuru ching yuk, tüsho chamkhüh lubah kingaün sadam kheak rhaka bah.

⁷Judüki apinü tangzüng hüm lu tüsho mihtsürübonü sode khe. Tüsho arünü tha, “ATUNGPUHNÜ athakhi alala isanü arhimobah tüsho anibah.”

⁸Tüsho Mosanü athiyih lubah mihtsürübo kheak rhakkih tüsho tha, “Ha ATUNGPUHNÜ nüsa kheak harü yubo alala yande tangzüngkhi thiyih ah.”

⁹Judüki Mosa, Aron, Nadab, Abihu, tüsho Israel azothsürü 70 wutu,

¹⁰tüsho arünü Israel Thrünpuh ngü. Tüsho api jing khüp ju shotolung-bluknü athsükhi limro thüning nangde müsühkhabündo alakheah.

¹¹Tüshe Israel limberübo kheak apinü akhah müjipkih. Junangde arünü Thrünpuh ngü, tüsho arünü tsühyung.

¹²ATUNGPUHNÜ Mosa ki tha, “I kilim müzüng kheak atuang tüsho ju ching aleangang; tüsho inü nü kilim inü athrütkhi lungbeakbo, yakzan tüsho thiyukhümbo nünü arü ki thsangyushihpü jihbah.”

¹³Jumonü Mosanü api rungbuh Jihusua bebah tsahmusu tüsho ATUNGPUH müzüng kheak wutu.

¹⁴Tüsho apinü azothsürübo ki tha, “Ike nüsa kilim alode marüyi khiungde ha ching aleangang. Aron tüsho Hur nüsa lung lah. Mihtsürü khürü küpkhuk ngüsho ane kilim yüshang.”

¹⁵Judüki Mosanü müzüng ching wutu, tüsho amonü müzüng ju liudo.

¹⁶Kheakü ATUNGPUH müretahkhi Sinai Müzüng kheak aki, tüsho amonü ju nimung thuruk liudo, tüsho athüne nipü apinü amo phulungnü Mosa ji.

¹⁷Israelrü mük ki müzüng müjuk kheak ATUNGPUH müretahkhi ju aniuabahbe motru nangde alakheah.

¹⁸Jumonü Mosanü amo phulung ju yüzah tüsho müzüng kheak wutu. Tüsho Mosa ju nimung yirü tüsho tsüngre yirü müzüng kheak lakheah.