Read Yimchungru Naga Abe 27 Bible Online

Abe 27 - Yimchungru Naga bible

Abe 27

¹“Akasia sangnü kingaün sadam achanglim khahnap 3nü thsang; ayunglim khahnap 5 tüsho atolim khahnap 5 shahrihkhühnü thsang.

²Amühit phüyi kheak ajuh phüyi thsang; ajuhbo le kingaün sadam ju khülang labah, tüsho müwayinchinü yihdoang.

³Awah wupü keangkihphüh tüsho mokhih müjipbe, müsühmüra-phuru, tsapdüthreang tüsho mophühbo thsang; phühlung alala müwayinchinü thsang.

⁴Müwayinchinü ayikeang khülang thsang tüsho amükbo kheak müwayinchi phuhpho phüyi thsang.

⁵Ayikeang ju kingaün sadam aphulung khiungde wutupü thsüde adamkhi khüp yukang.

⁶Kingaün sadam thsungkheak akasia sangnü akhrihbebo thsang, tüsho jurü kheak müwayinchi yihkihang.

⁷Akhrihbebo ju phuhphobo ching yukang, tüsho akhrihbebo ju kingaün sadam hanpü thsüde thrip mahne ching yukang.

⁸Inü nüsa ki müzüng kheak lümkhi huhkhi yande kingaün sadam ju sangbeakbonü akukde thsang.

⁹“Nüsanü arüngkhimyam thsükihang. Düjinglim ju ayunglim khahnap 100 tüsho zhindokhim atsüdak khimthünak luang.

¹⁰Dungjing muku tüsho athranyukbe muku müwayinchinü thsang. Dungjingbo wuklobe tüsho yinchi-khrihbo shotoyinchi luang.

¹¹Dukulim thrip she ayunglim khahnap 100 tüsho zhindokhimbo dungjing muku tüsho müwayinchi müchinbebo muku, tüsho dungjingbo kheak shotoyinchi wuklobebo le yinchi-khrihbo labah.

¹²Aniyüzahlim thrip atolim khahnap 50 tüsho zhindokhimbo, dungjing thürü tüsho athranyukbe thürü labah.

¹³Aniakhiuklim thrip atolim khahnap 50 labah.

¹⁴Ripit khülang kheak zhindokhim ayunglim khahnap 15, dungjing mahsam tüsho athranyukbe mahsam labah,

¹⁵tüsho püpü thrip zhindokhim ayunglim khahnap 15, dungjing mahsam tüsho athranyukbe mahsam labah.

¹⁶Ripit thsungkheak zhindokhim ayunglim khahnap 20, biyi le mürümmuchu tüsho aneakrüm hing khim-keakrünü atsüdak khimthünaknü akeakkhi labah. Ju ching dungjing phüyi tüsho athranyukbe phüyi labah.

¹⁷Limkhuh mükamde alala shotoyinchi khrihbebo labah; awuklobe ju shotoyinchi tüsho athranyukbe ju müwayinchi labah.

¹⁸Limkhuh ju ayunglim khahnap 100 tüsho atolim khahnap 50, ju lung tsüde akeakkhi zhindokhim achanglim khahnap 5, tüsho müwayinchi thranyukbebo labah.

¹⁹Arüngkhimyam ching mukhungmüdan kukrukbo, achingsang alala müwayinchi labah.

²⁰“Tsün thsungkheak oliv chingnü anitkhitkhi atsangkhit moke nü kilim lude arüpü Israelrü ki thiyukhüm jihang, junangde tsünpung ju müdüchingde trude alabah.

²¹Ashorupung khimyam, zhindokhim wungdo lim tangzüng sangdan miki, Aron tüsho api tsührübonü arenü yapsu khiungde ATUNGPUH miki tsünpung takanua zobah. Ha Israelrü thsung thsüde arü lünkhe amuyung yakzan thsükhi labah.