Read Yimchungru Naga Abe 28 Bible Online

Abe 28 - Yimchungru Naga bible

Abe 28

¹“Kheakü nü khiung Aron tüsho api tsührübo Nadab, Abihu, Eleazar tüsho Ithamar I ki amükeamrü thsüde tankihpü Israelrü bolungnü bede arang.

²Nü khiung Aron thsungkheak api müretahpü tüsho akheahakhampü amükeamrü khimmihbo thsüjang.

³Inü lümlung jihkhi athsüso mihtsürübo ki api tsangkhitde Aron khimmihbo thsüjihpü thaang, junangde apinü I ki amükeamrü thsüde tankihbah.

⁴Arünü athsüpü khimmihbo ju harü labah: treangkhümbe, amükeamrü khim, shulünkhim, tsüde akeakkhi pangkhümpü, kuhingbe, tüsho chimrümbe. Junangde arünü nü khiung Aron tüsho api tsührübo thsungkheak amüsüh khimmihbo thsübah, junangde apinü amükeamrü thsüde I tankihbah.

⁵“Arünü suna, biyi, mürümmuchu, aneakrüm hing, tüsho khimthünak atsüdak lubah,

⁶tüsho arünü suna amükeamrü khim ju biyi, mürümmuchu, aneakrüm hing tüsho khimthünak atsüdak, thsüsonungnürünü akeakkhinü athsübah.

⁷Dubuhrümbe ju arhüklopü thsüde akheam kheak yihkihbah.

⁸Junangde chimrümbe ju suna, biyi, mürümmuchu, aneakrüm hing, tüsho tsüdakde akeakkhi khimthünak labah.

⁹Jushu nünü lungmütri mahne luang tüsho jurü kheak Israel tsührübo mung kheande dokihang:

¹⁰lung khülang kheak arü thuruk mung, tüsho püpü lung kheak thuruk mung, arü zübekhi yande alabah.

¹¹Mütsanyüm kheak dokihkhi nangde lung kheak dokihbenü Israel tsührübo mung lung mahne kheak kheande dokihang. Nünü jurübo sunanü züt thsüjang,

¹²tüsho ju dubuhrümbe kheak Israel tsührübo mümihpü rhükkihang. Aronnü api dubuh kheak ATUNGPUH miki mümihpü mungbo hanbah.

¹³Sunanü züt thsang

¹⁴tüsho nünü suna müthsün mahne wuhrünliu chitang, tüsho wuhrünliu chitkhi ju züt thsükhi kheak rhükkihang.

¹⁵“Adüngakhi mütsanjihpü treangkhümbe rhimosorünü arhimokhi amükeamrü khim nangde thsang: suna, biyi, mürümmuchu, aneakrüm hing, tüsho tsüde yakkhokhi khimthünak.

¹⁶Ha shahrihkhühnü mahne thsüde adapbah: ayunglim kipkhüh, atolim kipkhüh.

¹⁷Tüsho ju kheak shotolung ru phüyinü yihkihang. Akhuhbe ru ching shoto mürümlung, kelülülung tüsho lungmüzhak yukbah;

¹⁸mahnepü ru ching lungphüyak, shotolung bluk, tüsho shotolungmüküp;

¹⁹asampü ru ching athüyinlung, mürelung-müküp tüsho mürelung-bluk;

²⁰tüsho aphüyipü ru ching phüyakmuchu lung, lungmütri, tüsho asherühü. Jurübo sunanü amükhipkihbah.

²¹Tüsho lung thürükheak mahne kheak ju Israel trük abande Jakob tsührübo mung kheande dokihang.

²²Treangkhümbe ju suna müthsünnü liu nangde wuhrünliu chitde thsang.

²³Suna phuhpho mahne thsang tüsho treangkhümbe akulim akheam mahne kheak rhükkihang.

²⁴Tüsho suna liu mahne ju treangkhümbe münkheam kheak phuhpho mahne ching rhükkihang;

²⁵tüsho wuhrünliu mahne chitkhi ju züt thsükhi mahne kheak rhükkihang, tüsho dubuhrümbe amükeamrü khim mikhuhlim yihkihang.

²⁶Suna phuhpho mahne thsang tüsho amükeamrü khim alunglim treangkhümbe mahne akheam kheak yihkihang.

²⁷Suna phuhpho püpü mahne thsang tüsho dubuhrümbe mahne kheak amükeamrü khim mikhuh, yak khode akeakkhi chimrümbe kumung athüredung kheak yihkihang.

²⁸Treangkhümbe phuhpho mahne ju chimrümbe kheak chingkihde biyi liunü amükeamrü khim kheak rhükkihang, junangde trangkhümbe ju khim kheaknü müheankhit.

²⁹Junangde Aronnü ATUNGPUH miki amüsüh dangpung ching yüchoki mutuklode mümihpü atreang kheak mahkhap treangkhümbe Jakob tsührübo mung hanbah.

³⁰Tüsho mahkhap treangkhümbe kheak ju Urim tüsho Thummim yihkihang, tüsho Aron ATUNGPUH miki yüchoki jurü akhüh kheak labah. Junangde Israelrü mahkhappü Aron khüh kheak ATUNGPUH miki mutuklode ahanbah.

³¹“Amükeamrü shulünkhim alala biyinü thsang.

³²Aku chungkhitshihpü aphulung ching yeahshungang; mürukrüpshihpü amung yeande kümloang.

³³Amung yean alala mükamde biyi, mürümmuchu tüsho aneakrüm hingnü tsarümkiu thsang, tüsho alala mükamde arü dükeak suna trüngtrüngpü thsang:

³⁴Suna trüngtrüngpü tüsho tsarümkiubo shulünkhim mung yeande lakkhimuloachihde yukang.

³⁵Aronnü tankihchoki ha khümbah. Api ATUNGPUH miki amüsüh dangpung ching yüzahchoki tüsho akhiukchoki trüngtrüngpü düsheak sobah, junangde api müshe.

³⁶“Suna müthsünnü kutsünpü khülang thsang tüsho mütsanyüm kheak nangde ju kheak ha thrütkihang: ATUNGPUH KILI M A MÜSÜH .

³⁷Kuhingbe kheak yihkihpü thsüde ju kheak biyi liu rhükkihang; ju kuhingbe mikhuhlim labah.

³⁸Ha Aron kingkang kheak labah, tüsho Israelrünü müsühkhitde ajihkhi amüsüh thsambahbo ching mülimkhi apinü ahanbah. Ju Aron kingkang kheak mutuklode alabah, junangde arübo ju ATUNGPUH ki aleangkhikhukbe labah.

³⁹“Khimthünak atsübonü Aron pangkhümpü le kuhingbe tüsho yak khode chimrümbe keakang.

⁴⁰“Aron tsührübo mung thupü tüsho akhamshihpü pangkhümpübo, chimrümbebo tüsho kuthranbo thsüjang.

⁴¹Junangde harü nünü nü khiung Aron tüsho atsührübo kheak khümjang. I ki amükeamrübo thsüde I tankihpü nünü arü mujude tsangkhitang.

⁴²Chim kheaknü pho khiungde phü yihdopü alunglim yihbe khimthünak thsüjang.

⁴³Aron le api tsührübonü arü ashorupung khimyam ching yüzahchoki yungsho amüsüh dangpung ching tankihpü kingaün sadam ki yüchoki jurü yihbah, junangde arünü amülim müthsü tüsho müshe. Ha lünnü Aron tüsho api tsühsoniuso thsungkheak thiyuzüng labah.