Read Yimchungru Naga Abe 29 Bible Online

Abe 29 - Yimchungru Naga bible

Abe 29

¹“Arünü amükeamrübo thsüde I tankihpü nünü ha ruk arü müsühkhitang: moshipung nunu 1 tüsho namfimihnupung 2 lapha mükihkhi luang.

²Tüsho wheat yo atsüdak ayikangkangnü phaüm muyukde, yikhap le yikhapkheambo müdangke bede thsang.

³Jurübo muluk khülang ching yukbah moshipung le namfimihnupung 2 lungnü jihang.

⁴Tüsho Aron le atsührübo ashorupung khimyam limro ki bede arang tüsho kemüyihjang.

⁵Khimmihbo luang tüsho Aron kheak pangkhümpü, shulünkhim, amükeamrü khim, tüsho treangkhümbe khümyukjang. Yak khode akeakkhi chimrümbenü amükeamrü khim ju rümkihjang.

⁶Aku kheak kuhingbe tüsho kuhingbe kheak amüsüh kuthran yihkihjang.

⁷Amujube müdangke luang tüsho aku kheak yihkihde mujude-müsühkhitang.

⁸Api tsührübo bede arang tüsho arü kheak pangkhümpü khümyukjang,

⁹tüsho arü ku kheak kuthran thranjang. Aron le atsührübo kheak chimrümbe rümjang. Amükeamrü thsüpü ju lünnü arü yo thsüpü thiyuzüng labah.

¹⁰“ Moshipung ju ashorupung khimyam mikhuh lude arang, tüsho Aron le atsührübonü arü khah aku kheak nimbah.

¹¹Ashorupung khimyam ching yüzahpung kheak ATUNGPUH mikinü ju laksahang.

¹²Moshipung thiyih khürü nü yingkhing kheaknü lubah kingaün sadam juhbo kheak yihkihang, tüsho thiyih alala kingaün sadam jing kheak dunga bahang.

¹³Alunglim bukning muhiukhi müdang alala, amüsan atsübe, tüsho amügüe mahne amüdang bede luang tüsho I kilim kingaünde kingaün sadam kheak takang.

¹⁴Tüshe moshipung shihtsü, aküp, tüsho arhubo alala binpung aleanglimnü takang. Ha neak kingaün labah.

¹⁵“Nünü namfimihnupung 1 luang, tüsho Aron le atsührübo khah aku kheak nimkihbah.

¹⁶Ju laksahang tüsho athiyih lubah kingaün sadam alala mükamde rhakkihang.

¹⁷Namfimihnupung ju adütre kamde khapthünakang tüsho bukningbo le ajingbo müsühbah aku tüsho akhapthünakkhibo lung yukruang.

¹⁸Jushu namfimihnupung abümnü kingaün sadam kheak takang. Haju ATUNGPUH kilim arhümthüneade monü taka kingaünkhi ah.

¹⁹“Namfimihnupung püpü luang, tüsho Aron le atsührübonü arü khah aku kheak nimkihbah.

²⁰Ju laksahbah athiyih khürü luang tüsho Aron le atsührübo nuku müzhean kheak, tsülim khahkutopübo kheak, tüsho tsülim jingkutopübo kheak yihkihjang. Tüsho kingaün sadam alala mükamde athiyih rhakkihang.

²¹Tüsho kingaün sadam kheaknü athiyih khürü tüsho amujube müdangke luang tüsho Aron le atsührübo khimmihbo kheak rhakkihang. Jushu api le atsührübo tüsho arü khimmihbo müsühkhitbah.

²²“Ha namfimihnupung kheaknü amüdang, amokungro müdang, atrün, amüsan atsübe, amüdang bede amügüe mahne chido tüsho tsülim pho luang. (Ha amüsühkhitbe namfimihnupung ah.)

²³Phaüm muyukkhi yikhap muluk ATUNGPUH miki lakhi chingnü yikhap takkhi khülang, amüdang bede anungkhi yikhap khülang tüsho yikhapkheam khülang de luang.

²⁴Harü alala Aron le atsührübo khah ching yukjang tüsho ATUNGPUH miki müleamde kingaünkhi jihang.

²⁵Jushu arü khah chingnü jurübo luang tüsho ATUNGPUH kilim monü arhümthüneade taka kingaünkhi lung kingaün sadam kheak takang.

²⁶Jushu nünü Aron müsühkhitpü thsungkheak namfimihnupung khüh ju lubah ATUNGPUH miki müleamde kingaünang, tüsho ju nü shihcham labah.

²⁷Atsangkhitpü-rhimo namfimihnupung Aron tüsho atsührübo yo müsühkhitang: müleamde kingaünkhi akhüh tüsho handarü ajihkhi apho.

²⁸Ha kamruhroro Aron le atsührübo thsungkheak Israelrü kilimnü mutukzhak shihcham labah. Ha Israelrünü arü mungtsü kingaün chingnü ATUNGPUH kilim arung jihkhi labah.

²⁹“Aron khimmih amüsüh ju api dunglim arü amüsüh tsangkhitchoki yihpü thsüde api tsühsoniusobo yo thsübah.

³⁰Tsührü shepünü api müthri amükeamrü thsüba tüsho amüsüh dangpung ching tankihpü ashorupung khimyam ching arübanü ju nimung thüne yihbah.

³¹“Amüsüh-tsangkhit thsungkheak namfimihnupung 1 luang tüsho shih ju amüsüh dangpung chingnü khiungang.

³²Ashorupung khimyam yüzah limro kheak Aron tüsho api tsührübonü namfimihnupung shih le muluk ching lakhi yikhap tsühbah.

³³Arü amüsüh-tsangkhitpü dünthsükhi harü jihchungkhibo arünü atsühbah. Tüshe püpürünü a jurü mütsüh, tümütüsho jurü amüsüh ah.

³⁴Tüsho amüsüh-tsangkhitbe namfimihnupung shih yungsho yikhap khürü yapsu khiungde aninga lasho takabahang. Ju mütsühbeah, tümütüsho ha amüsüh ah.

³⁵“Inü nü ki thiyukhüm jihkhi lüpdükhi ayannü nimung thüne lude Aron tüsho api tsührübo amüsühtsangkhit rhimoang.

³⁶Nimung aban dünthsükhipü moshipung 1 neak kingaün jihang. Dünthsükhide kingaün sadam ju tsangkhitang, tüsho müdangke mujude ju müsühkhitang.

³⁷Kingaün sadam thsungkheak nimung thüne dünthsükhiang tüsho ju müsühkhitang. Jushu kingaün sadam ju khide amüsüh labah, tüsho tümüpürü ju qiubanü amüsüh kambah.

³⁸“Nünü nimung aban kam khülang bankhi namfimihnunu 2 kingaün sadam kheak mutukzhakde jihang.

³⁹Khülang yapsu jihang tüsho püpü ju shuhyini ching jihang.

⁴⁰Namfimihnunu akhuhbe lung wheat yikangkang atsüdak khahngak 1 ching oliv müdangke pungdüchi 1 yukbah jihang. Yukhu pungdüchi 1 kingaünde dunga bahang.

⁴¹Mahnepü namfimihnunu ju shuhyini ching laksah-a kingaünang, tüsho yapsu jihkhi ayikangkang, oliv müdangke tüsho yukhu lungnü ATUNGPUH kilim arhümthüneade taka kingaünang.

⁴²Ha taka kingaünkhi ju lünnü ashorupung khimyam yüzah limro kheak ATUNGPUH miki mutukzhakde jihde alabah. Ju ching inü nü shorubah tüsho nü ki asukbah;

⁴³ju ching inü Israelrü she ashorubah, tüsho ju dangpung I müretahkhinü atsangkhitbah.

⁴⁴Jumonü inü ashorupung khimyam le kingaün sadam müsühkhitbah tüsho Aron le api tsührübo I tankihpü amükeamrübo thsüpü müsühkhitbah.

⁴⁵Judüki I Israelrü lung labah, tüsho arü Thrünpuh thsübah.

⁴⁶Arünü I ju Ijip chingnü arü bekhitkhi ATUNGPUH arü Thrünpuh ah de amükheahbah, junangde I arü bolung labah. I ATUNGPUH arü Thrünpuh ah.