Read Yimchungru Naga Abe 3 Bible Online

Abe 3 - Yimchungru Naga bible

Abe 3

¹Kheakü Mosanü Midiarü amükeamrü akü Jethro yo namfimihnubo neakde alakheah. Apinü namfimihnubo ju loshelo hode bede yübah Thrünpuh wung Horeb ching arü.

²Tüsho sangrung phulung motru khülang ching ATUNGPUH yunirü api ki akhiuk. Sangrung kheak mo trude lalashe sangrung ju mütak.

³Mosanü lüm, “Ha khide amüyinsahbe ah, tümü thsükhi sangrung mütakchonü inü thüninde yübah kheahanü.”

⁴Mosa thüninde arükhi küyimki ATUNGPUHNÜ angükhea, sangrung phulung chingnü ATUNGPUHNÜ Mosa jide tha, “ Mosa! Mosa!” Apinü alo, “I ha kheak lah.”

⁵Thrünpuhnü tha, “Ha dangpung thüninde darü; nü jingkhümpü yihkhitang, tümütüsho nü zhipkhi dangpung ju amüsüh lo ah.”

⁶Kheaküshe apinü tha, “I nü pü Abraham, Isak tüsho Jakob Thrünpuh ah.” Judüki Thrünpuh kheak kheahpü trekhinü Mosanü amiro khuramabah.

⁷Tüsho ATUNGPUHNÜ tha, “Inü atsütsü I mihtsürübo Ijip lomi ching dukmüsüpkhi ngüdo; arü azhorü kuhi chingnü khümkhitpü zhikhi inü sodo; arü thsünü alala inü mükheahlah.

⁸Ijiprü khah chingnü arü khümkhitpü tüsho ju lomi chingnü bekhitbah alomi atsü tüsho niuhke le mukhuke bukkhi Kananrü, Hitrü, Amorrü, Perizrü, Hivrü tüsho Jebusrü lapung bede ayüpü I akikheah.

⁹Kheakü Israelrübonü azhikhi inü sodo, tüsho Ijiprübonü arü thsümüchikhi inü ngüdo.

¹⁰Jumonü kheakü Ijip lomi chingnü I mihtsürübo bekhitpü inü nü Pharao kilim yüshihchoh.”

¹¹Tüshe Mosanü Thrünpuh ki tha, “Pharao kilim I yüpü tüsho Ijip chingnü Israelrübo bekhitpü I she a?”

¹²Thrünpuhnü alo, “I nü lung labah, tüsho küyimki nünü I mihtsürübo Ijip chingnü bebah akhiukbanü nüsanü ha wung kheak I kingaünbah tüsho junü inü nü yüshihkheah de amütsan thsübah.”

¹³Mosanü Thrünpuh ki tha, “Küyimki I Israelrübo kilim yübah, ‘Nüsa bebuhrü Thrünpuhnü I arüshihkheah’ de athaba tüsho arünü I ki, ‘Api mung she a?’ de keokhisho inü arü ki tümü thaba?”

¹⁴Thrünpuhnü Mosa ki tha, “I JU I AH . Nünü arü ki hade thaang, ‘I AH de athabuhnü I nüsa kilim arüshihkheah.’ ”

¹⁵Kheaküshe Thrünpuhnü Mosa ki tha, “Israelrübo ki ha thaang: ATUNGPUH nüsa jipürü Abraham, Isak tüsho Jakob Thrünpuhnü I nüsa kilim arüshihkheah. Ha kamruhroro thsungkheak I mung ah, tüsho arübe lün alala thsungkheak ha I mung labah.

¹⁶Yüang tüsho Israel azothsürübo bemukhungbah thaang, ATUNGPUH nüsa jipürü Abraham, Isak tüsho Jakob Thrünpuh I ki akhiukbah tha, I nüsa kilim arükheah tüsho Ijiprübonü nüsa kheak rhimokhi alala ngüdo.

¹⁷Inü nüsa Ijiprü azhorü kuhi chingnü bekhitbah Kananrü, Hitrü, Amorrü, Perizrü, Hivrü tüsho Jebusrü lomi niuhke tüsho mukhuke bukkhi lomi ching bebah ayüpü alokhido.

¹⁸Nünü athakhi I mihtsürübonü anibah, judüki nü tüsho azothsürübo alala Ijip kiulongthsüpuh ki yübah thaang, ‘ATUNGPUH Ibrirü Thrünpuh isa ki akhiuka huhdo. Jumonü isanü ATUNGPUH isa Thrünpuh ki kingaünpü sunglo ching nimung mahsam hantsah yüshang de mushuchoh.’

¹⁹Wuto khahnü api ki münimkihsho, Ijip kiulongthsüpuhnü nüsa müyüshih de inü mükheahlah.

²⁰Tüshe inü I khah chungde Ijip kheak lakbah, junangde khinthiyinbebo rhimobah. Jushu apinü nüsa yüshihbah.

²¹Inü Ijiprübo ki nüsa muzhoshihbah tüsho küyimki nüsa yübanü khahkeang mutso.

²²Aliberü abannü nihbe yamhingrü Ijipberübo ki tüsho Ijipberü khürü anihbe yam ching larü lasho arübo ki khimmih, suna, shotoyinchi tüsho shotolungbo kheanga lubah tüsho Israelrübonü jurübo arü tsührü athrürü le aliberü kheak phungyukjihbah; junangde nüsanü Ijiprü lakhit hanbah ayübah.”