Read Yimchungru Naga Abe 33 Bible Online

Abe 33 - Yimchungru Naga bible

Abe 33

¹ATUNGPUHNÜ Mosa ki tha, “Nü tüsho nünü Ijip lomi chingnü bekhitkhi mihtsürübo ha dangpung chingnü chamachihang, tüsho inü Abraham, Isak, Jakob tüsho arü tsühsoniusobo jihpü alokhikhi lomi ching yüang.

²Inü yunirü khülang nüsa müngüh yüshihbah tüsho Kananrü, Amorrü, Hitrü, Perizrü, Hivrü tüsho Jebusrü yankhitshihbah.

³Niuhke tüsho mukhuke bukkhi lomi ching wutuang; tüshe I a nüsa bolung matu, jude yungsho inü nüsa limro ching dükheakshihbah tümüde nüsa anihnih mihtsürü ah.”

⁴Küyimki mihtsürübonü ha lümthsünü yubo sokhea, arünü atüzhopü tankih tüsho shenü she zülu müyih.

⁵Tümüde ATUNGPUHNÜ Mosa ki tha, Israelrü ki thaang, “Nüsa anihnih mihtsürü ah. I nüsa lung anükhüh kheak lang she yükhülaa, inü nüsa shahde adükheakshihbah. Kheakü nüsa zülubo yihkhitang, tüsho nüsa kheak tümü rhimobanü inü apungkhibah.”

⁶Jumonü Israelrünü Horeb müzüng kheak arü zülu alala khukkhi.

⁷Kheakü Mosanü khimyam khülang lu tüsho binkheampung aleanglim anükhüh yübah thsü, ju ki “ashorupung khimyam” de ji. Khürünü ATUNGPUH ki keokhikeorapü lasho binkheampung aleanglim khimyam ching yüde alakheah.

⁸Tüsho küyimki Mosa khimyam lim wukhiukbanü mihtsürü alala wusurü tüsho khimyam ching Mosa müyüzahyi khiungde arü khimyam ching yüzahpung kheak kheahde zhip.

⁹Küyimki Mosa khimyam ching yüzahbanü, amo dungto akibah khimyam ripit ki zhip tüsho ATUNGPUHNÜ Mosa ki asukachih.

¹⁰Küyimki mihtsürübonü amo dungto khimyam ripit ki zhipde angübanü, arü alala nihbuh khimyam ripit ki wusurü tüsho kingaün.

¹¹Mihtsürünü müyamrü ki asukachihkhi nangde ATUNGPUHNÜ Mosa ki miro le miro asukachihde alakheah. Jushu Mosanü binkheampung lim alode yü, tüshe api rungbuh Nun tsührü athrününgtsüng Jihusua a khimyam chingnü makhin.

¹²Mosanü ATUNGPUH ki tha, “Harü mihtsürü bepü nünü I ki thade la, tüshe I lung shepü yübanü nünü I ki mümükheahshih. Inü nü mungnü mükheahlah tüsho I miki mihmüthsüm ngüdo de nünü tha.

¹³Jumonü inü tamkhüntamnüchoh, I nü miki mihmüthsüm lasho, kheakü I ki nü limro huhang, junangde inü nü mükheahbah tüsho nü miki I mihmüthsüm ngübah. Tüsho ha trükshih nü mihtsürü ah de lümang.”

¹⁴Tüsho apinü tha, “I nü lung yübah tüsho inü nü sühakhim jihbah.”

¹⁵Judüki Mosanü api ki tha, “Nü isa lung müyüsho, ha chingnü isa bede duwutu.

¹⁶Nü isa lung müyüsho, nü mihtsürü tüsho I nü miki mihmüthsüm ngüdo de küde thsah amükheahpü? Nü mihtsürü tüsho I, alomi ching lakhi mihtsürü alala kheaknü büthsükhi labah.”

¹⁷Judüki ATUNGPUHNÜ Mosa ki tha, “Nünü athakhi inü arhimobah; tümüde nü I miki mihmüthsüm ngüdo, tüsho inü nü mungnü mükheahlah.”

¹⁸Tüsho apinü tha, “ Muzhobah nü müretahkhi I ki huhang.”

¹⁹Tüsho apinü alo, “Inü nüsa müngüh I müretahkhi hoshihbah, tüsho inü nüsa müngüh ATUNGPUH mung zhiyukbah. Inü sherü kheak mihmüthsüm labanü mihmüthsüm labah, tüsho sherü kheak mihmuzho labanü mihmuzho labah.”

²⁰Tüshe apinü tha, “Nüsanü I miro müngükhuk; tümüde mihtsürü sheshe I ngübah rhangdung lapü yung.”

²¹Tüsho ATUNGPUHNÜ tha, “Ha kheak dangpung khülang I ki lah, tüsho lungto kheak nü zhipbah.

²²Küyimki I müretahkhi hobanü, inü nü lungkhün ching yüzahshihbah, tüsho I muhoyi khiungde I khahnü ahümdobah.

²³Jushu inü I khah luakhinbah, tüsho nünü I thründuk ngübah; tüshe I miro müngü.”