Read Yimchungru Naga Abe 34 Bible Online

Abe 34 - Yimchungru Naga bible

Abe 34

¹Tüsho ATUNGPUHNÜ Mosa ki tha, “Akhuhlim nangde lungbeak mahne phukang, tüsho nünü ayihrüpkhi akhuhlim lungbeakbo kheak kihkhi yubo inü ha lungbeakbo kheak thrütbah.

²Jumonü yapsu thsakhamang tüsho Sinai Müzüng mujuk kheak nü I kilim atung.

³Sheshe nü lung marü yungsho müzüng kheak küching she müngübeah; müzüng mikhuh ki mihnu tüsho moshibo she düyimtsühshih.”

⁴Jumonü Mosanü akhuhlim nangde lungbeak mahne phuka lu tüsho ATUNGPUHNÜ api ki thiyukhüm jihkhi nangde yapsu mükikde akhah ching lungbeak mahne shuhbah Sinai Müzüng ching wutu.

⁵Judüki amo ching ATUNGPUH aki tüsho ju ching api ki zhipbah ATUNGPUH mung mükheahshih.

⁶Tüsho apinü Mosa miki tsahhode zhiyuk, “ATUNGPUH , ATUNGPUH , mihmuzho tüsho mihmüthsüm Thrünpuh, arünnü bukakhiukchoh, amuzho tüsho thiyuro ching suhdahlah,

⁷chithürü ki amuzho lachoh, tüsho mihbukmuyuk, azhihkhi tüsho neak bahjihchoh. Tütüshe apinü mülimkhi müthsümüchidüa müdükhe; apinü arü bebuhrü neak dünkheak arü tsührü tüsho tsührü-tsührü lün mahsam tüsho phüyi khiungde thsümüchichoh.”

⁸Mosanü khülang ki alo kheak khukning tüsho kingaün.

⁹Apinü tha, “O ATUNGPUH , I nü miki mihmüthsüm ngüa lasho, isa anihnih mihtsürü thsüa lalashe ATUNGPUH isa lung yüang de inü tamkhüntamnüchoh; isanü alakmihkhi tüsho isa neak bahjang tüsho nü yamrüplurüp nangde isa luang.”

¹⁰Tüsho ATUNGPUHNÜ tha, “Kheahang, inü tangzüng khülang thsüchoh. Alomi alala ching yungsho trükshih bolung mürhimoakheahkhi nüsa mihtsürü alala miki inü mihmüyinsahbebo rhimobah; nüsa rukhüh lakhi mihtsürübonü I ATUNGPUHNÜ nüsa thsungkheak atrebe rhimokhi ngübah.

¹¹Khihni inü nüsa ki thiyukhüm jihkhi mihyuaniang. Kheahang, inü nüsa müngühnü Amorrü, Kananrü, Hitrü, Perizrü, Hivrü tüsho Jebusrü yankhita bahchoh.

¹²Nüsa yüpü lakhi lomi ching larü kheak binthrüm müthsüpü kümkangang, jude yungsho nüsa bolung arübo ju qimürip labah.

¹³Arü kingaün sadam lukkheamjang, amüsüh dungjing kingkheamang, tüsho sangthsübo kiukheamang.

¹⁴Püpürü thrünpuh tümü dükingaün, tümüde ATUNGPUH shepü mung mükthsü lanü, mükthsü Thrünpuh ah.

¹⁵Ju lomi ching larü kheak binthrüm müthsüpü kümkangang; tümüde küyimki arünü arü thrünpuhbo kheak müzammüramde laksah-a kingaünba, arünü nüsa jiyukbah tüsho nüsanü arü kingaünbo tsühbah.

¹⁶Tüsho küyimki nüsa tsührü niuberü thsüpü arü tsührübebo lujihbanü arü thrünpuhbo kheak müzammüramkhinü nüsa tsührübo junangde arhimoshihbah.

¹⁷“Nüsanü azünkhi thrünpuhbo düthsü.

¹⁸“Phaüm muyukkhi yikhap thünio mungang. Inü nüsa ki thiyukhüm jihkhi nangde phaüm muyukkhi yikhap nimung thüne akhukhitkhi kim Abib khinu ching tsühang; tümüde ju kim ching nüsa Ijip lomi chingnü akhiukkheah.

¹⁹Athrürü adüjirü tüsho shiwüh pung adüji moshi yungsho mihnu thsüthsü I yo ah.

²⁰Akhuh anukhi donki a nünü namfimihnunu khülangnü rhokhitang, tüshe nünü mürhokhitsho ahung yihshakang. Nü tsührü athrürü adüji alala nünü arhokhitbah. Tüsho sheshe I miki khahkeang darü.

²¹“Nüsanü nimung thuruk rhimobah, tüshe thüne nipü sühakhimbah; thulu mülappü tüsho yimlu kim ching nüsanü sühakhimbah.

²²Nüsanü wheat hi akhuh yimluchoki Yimlu Thünio mungang tüsho mumükin ching Hanmukhungkhi Thünio mungang.

²³Kam ching mahsam ki nüsa athrürü alala ATUNGPUH , Wuto Israel Thrünpuh miki arübah.

²⁴Tümüde inü nüsa müngüh trükshihbo yankhitbah tüsho nüsa lomi mülihshihbah; tüsho kam aban nüsa ATUNGPUH nüsa Thrünpuh miki wutuchoki shenü she nüsa lo lupü mülüm.

²⁵“I kilim shiwüh laksah-a kingaünkhi thiyih ju phaüm yukkhi yikhap bede düjih, tüsho phunghothünio laksah-a kingaünkhi tümü she yapsu khiungde daningshih.

²⁶Nüsa lo chingnü akhiukkhi akhuh asokhi sangaso atsüdakbe ATUNGPUH nüsa Thrünpuh yam ching hande arang. Mihnu nunu abe niuhke ching dükhiung.”

²⁷ATUNGPUHNÜ Mosa ki tha, “Harü yubo thrütang, tümüde harü yubo yande inü nü tüsho Israel kheak tangzüng khülang thsüdo.”

²⁸Ju ching Mosa nimung yirü tüsho tsüngre yirü yikhap mütsüh yungsho ke muyungde alakheah. Tüsho apinü lungbeakbo kheak tangzüng yubo, Thiyuzüng Thürü thrüt.

²⁹Küyimki Mosa Sinai Müzüng kheaknü khah ching thiyuzüng lungbeak mahne shuhbah akikhea, api miro zhingzhingkhi anihbuhnü mümükheah, tümütüsho apinü ATUNGPUH lung asukachih.

³⁰Küyimki Aron tüsho Israelrü alalanü Mosa ngükheanü api miro zhingzhingde alakheah, tüsho arünü api thüninde arüpü tre.

³¹Tüshe Mosanü arü ki ji; jumonü Aron tüsho boto limberü alala api kilim alode arü, tüsho apinü arü ki asukachih.

³²Ju dunglim Israelrü alala api thüninde arü, tüsho apinü arü kilim ATUNGPUHNÜ Sinai Müzüng kheak api kilim jihkhi thiyuzüngbo jih.

³³Küyimki Mosanü arü ki asukachihkhamkhea, apinü kudukiubenü amiro yihdo.

³⁴Tüshe küyimki api ATUNGPUH ki asukachihpü yüzahbanü, api makhiukyi khiungde kudukiube ju lokhi; tüsho anihbuh ki thiyukhüm jihkhi apinü Israelrü ki thade la.

³⁵Tüsho Israelrünü Mosa kheahchoki api jak zhingzhingde la; tüsho Mosanü api ki asukachihpü müyüzahyi khiungde kudukiube ajak kheak yihkihlo.