Read Yimchungru Naga Abe 35 Bible Online

Abe 35 - Yimchungru Naga bible

Abe 35

¹Judüki Mosanü Israel boto alala bemukhungbah arü ki tha, “Nüsanü arhimopü ATUNGPUHNÜ thiyukhüm jihkhi harü ah:

²Nimung thuruk rhimo rhimobah, tüshe thüne nipü ju nüsa amüsüh nimung, ATUNGPUH kilim sühakhim Amuni labah. Shepünü ha nimung rhimo rhimobanü asheshihbah.

³Amuni nüsa lapungbo ching mo she düthsü.”

⁴Mosanü Israel boto alala ki tha, “ATUNGPUHNÜ thiyukhüm jihkhi ju ha:

⁵ATUNGPUH kilim kingaün khülang thsakhamang. Mulong salade alarünü ATUNGPUH kilim kingaün khülang hande arüshang: suna, shotoyinchi, tüsho müwayinchi;

⁶biyi, mürümmuchu tüsho aneakrüm hing, atsüdak khimthünak tüsho mihnu nam;

⁷namfimihnupung küp rung khiungkihkhi; atsüdak shihküp; akasia sang;

⁸tsünpung thsungkheak moke; müdangke mujupü thüneathürabe tüsho jinjinlak;

⁹lungmütribo, tüsho amükeamrü khim le treangkhümbe kheak yihkihpü lungbo.

¹⁰“Nüsa bolung athsüsorü alala arübah tüsho ATUNGPUHNÜ thiyukhüm jihkhi alala thsübah:

¹¹arüngkhimyam, ju muhiudobe, aleanglim muhiudobe, sangbeakbo, akhrihbebo, dungjingbo tüsho athranyukbebo;

¹²tangzüng sangdan, ju khrihbe, akhidobe, zhindokhim,

¹³dükhüm, ju khrihbebo, tüsho kukruk alala; Thrünpuh kilim jihkhi yikhap;

¹⁴ayinpü thsungkheak tsünpung dubopung tüsho kukrukbo; moke zahkhi tsünpungbo;

¹⁵jinjinlak takpung kingaün sadam tüsho akhrihbebo; amujube müdangke; arhümthüneabe; khimyam ching yüzahpung zhindokhim;

¹⁶müwayinchi aphidung bede taka kingaünpung sadambo, akhrihbebo tüsho kukruk alala; adubopung bede müwayinchi müsühmüra-phuru;

¹⁷khikzakpung zhindokhimbo, dungjingbo, athranyukbebo, khikzhakpung limro zhindokhim;

¹⁸arüngkhimyam le khikzhakpung chingsangbo tüsho liubo;

¹⁹amüsüh dangpung tankihpü khimmihbo — amükeambuh Aron tüsho api tsührübo amükeamrü thsüde tankihpü amüsüh khimmihbo.”

²⁰Judüki Israel boto alala Mosa mikinü müzüt.

²¹Tüsho mulongde alarünü arüngkhimyam rhimo mukhungmüdan, tüsho amüsüh khimmihbo thsungkheak ATUNGPUH kilim kingaün handarü.

²²Mulongde alarü athrürü tüsho aliberü ahihdonü nüpübo, nupung-nüpübo khahrihbo, lakbo, suna kukrukbo alala, jurü ju mihtsürübonü suna kingaün ATUNGPUH kilim jihkhi lubah arü.

²³Mihbüm abannü alathürün biyi tüsho mürümmuchu le aneakrüm hing, khimthünak atsüdak, mihnu nam, namfimihnu küp rung khiungkhi tüsho shihküp atsüdak handarü.

²⁴Shotoyinchi yungsho müwayinchi jihrübonü ATUNGPUH kilim kingaün handarü tüsho mihbüm abannü rhimo mungji khürü thsungkheak akasia sang handarü.

²⁵Athsüso liberübonü athünak hing, biyi hing, mürümmuchu, alamlam-khim mürüm arünü chiyimkhitkhi ludarü.

²⁶Aliberü amulongrü alalanü mihnu namnü she chiyim.

²⁷Yakzanshuhrübonü amükeamrü khim tüsho treangkhümbe kheak yihkihpü lungmütri le mürelungbo handarü.

²⁸Arünü tsün le amujube müdangke tüsho jinjinlak thsungkheak thüneathürabe tüsho oliv müdangke ludarü.

²⁹Israelrü athrürü tüsho aliberübonü arünü arhimobe Mosa hode thiyukhüm jihkhi thsungkheak amulongrü alalanü mulongkhi kingaün ATUNGPUH kilim ludarü.

³⁰Judüki Mosanü Israelrü ki tha, “Kheahang, Juda trük Hur tsührü, Uri tsührü Bezalel ATUNGPUHNÜ mokhitdo,

³¹tüsho api thsüsonungnü keaklah rhimo alala ching athsükhukpü tüsho mükheahmudu bede ATUNGPUH menü mia lah —

³²suna, shotoyinchi tüsho müwayinchi rhimopü ching athsüso,

³³mürelungbo lama yihkihpü, sang sümzüsümdopü; tüsho thsüsonungnü rhimo mungji püpü rhimopü lah.

³⁴Tüsho apinü anihbuh le Dan trük Ahisamak tsührü Aholiab kheak püpürü thsangyukhukpü jih.

³⁵Apinü arü kilim kizükidorü aphuaphu keakkhitrü, khimthünakkeakrü, biyi, mürümmuchu, alamlamkhim mürüm, tüsho püpü khimmih rhimobe mungji alala thsüsopü jih. Arünü rhimo mungji alala tüsho yak khozükhodopü kuklah.