Read Yimchungru Naga Abe 39 Bible Online

Abe 39 - Yimchungru Naga bible

Abe 39

¹Arünü biyi le mürümmuchu tüsho aneakrüm hingnü arü amüsüh dangpung ching tankihpü atsüdak khimmihbo keak; arünü ATUNGPUHNÜ Mosa ki thiyukhüm jihkhi yande Aron thsungkheak amüsüh khimmih thsüjih.

²Tüsho apinü amükeamrü khim suna, mürümmuchu, aneakrüm hing, tüsho atsüdak khimthünaknü thsü.

³Tüsho arünü biyi, mürümmuchu, aneakrüm hing tüsho atsüdak khimthünak ching yak khode akeakpü suna ju abeak kamde kingnakbah hing thsüde tsütnak.

⁴Arünü amükeamrü khim thsungkheak dubuhrümbe ju akheam mahne kheak yihkihpü thsü.

⁵Tüsho amükeamrü khim kheak yihkihpü chimrümbe ju ATUNGPUHNÜ Mosa ki thiyukhüm jihkhi nangde suna, biyi, mürümmuchu, aneakrüm hing, tüsho tsüdakde akeakkhi khimthünak lakheah.

⁶Arünü lungmütribo ju sunanü zündoa thsü; jurü ju Jakob tsührübo mung kheanyukde thsü.

⁷Jushu arünü ATUNGPUHNÜ Mosa ki thiyukhüm jihkhi nangde jurü ju Jakob tsührübo lümkhitpü amükeamrü khim yo dubuhrümbe kheak rhükkih.

⁸Arünü amükeamrü khim nangde treangkhümbe ju suna, biyi, mürümmuchu, aneakrüm hing, tüsho tsüde akeakkhi khimthünaknü thsü.

⁹Ju shahrihkhühnü dapbah ayunglim kipkhüh, tüsho atolim kipkhühnü thsü.

¹⁰Tüsho ju kheak shotolung ru phüyinü yihkih. Akhuhbe ru ching shoto mürümlung, kelülülung tüsho lungmüzhak yuk;

¹¹mahnepü ru ching lungphüyak, shotolung-bluk, tüsho shotolung-müküp;

¹²asampü ru ching athuyung-lung, mürelungmüküp tüsho mürelung-bluk;

¹³aphüyipü ru ching phüyakmuchulung, lungmütri tüsho asherühü. Jurübo sunanü mükhipkih.

¹⁴Tüsho lung thürükheak mahne kheak ju Israel trük abande Jakob tsührübo mung thrütkih.

¹⁵Treangkhümbe ju suna müthsünnü liu nangde wuhrünliu chitde thsü.

¹⁶Arünü suna phuhpho mahne thsü tüsho treangkhümbe akulim akheam mahne kheak rhükkih.

¹⁷Arünü suna liu mahne ju phuhpho mahne kheak rhükkih;

¹⁸tüsho wuhrünliu mahne chitkhi ju züt thsükhi mahne kheak rhükkih, junangde dubuhrümbe amükeamrü khim mikhuhlim yihkih.

¹⁹Arünü suna phuhpho mahne thsü tüsho amükeamrü khim alunglim treangkhümbe mahne akheam kheak yihkih.

²⁰Jushu she arünü suna phuhpho püpü mahne thsü tüsho dubuhrümbe mahne kheak amükeamrü khim mikhuh yak khode akeakkhi chimrümbe kumung athüredung kheak yihkih.

²¹ATUNGPUHNÜ Mosa ki thiyukhüm jihkhi nangde, arünü treangkhümbe phuhpho mahne ju chimrümbe kheak chingkihde biyi liunü amükeamrü khim kheak rhükkih, junangde treangkhümbe ju khim kheaknü müheankhit.

²²Arünü amükeamrü shulünkhim alala biyinü thsü.

²³Ku chungkhitshihpü aphulung ching yeahshung; mürukrüpshihpü amung yeande kümlo.

²⁴Arünü shulünkhim münkheam kheak biyi, mürümmuchu, aneakrüm tüsho atsüdak khimthünak hingnü tsarümkiu thsü.

²⁵Tüsho arünü suna müthsünnü trüngtrüngpübo thsü, tüsho shulünkhim münkheam alala mükamde tsarümkiubo dükeak yuk;

²⁶ATUNGPUHNÜ Mosa ki thiyukhüm jihkhi nangde, trüngtrüngpü tüsho tsarümkiubo shulünkhim mung yeande lakkhimuloachihde yuk.

²⁷Arünü Aron le api tsührübo thsungkheak khimthünaknü düshihde akeakkhinü pangkhümpü thsüjih,

²⁸tüsho kuhingbe, kuthranbo, khimthünak akhihkhihbo,

²⁹tüsho khimthünak, biyi, mürümmuchu, aneakrüm hingnü ATUNGPUHNÜ Mosa ki thiyukhüm jihkhi nangde chimrümbe thsüjih.

³⁰Arünü suna müthsünnü kutsünpü khülang thsü tüsho mütsanyüm kheak nangde ju kheak ha thrütkih: ATUNGPUH KILI M A MÜSÜH.

³¹Tüsho arünü ATUNGPUHNÜ Mosa ki thiyukhüm jihkhi nangde akulim kuhingbe kheak rhükkihpü biyi liu kheak müchekih.

³²Junangde ashorupung arüngkhimyam rhimo alala akhik thsü. Tüsho ATUNGPUHNÜ Mosa ki thiyukhüm jihkhi alala yande Israelrünü rhimo.

³³Judüki arünü Mosa kilim arüngkhimyam ludarü: khimmüküp, amuhiudobe, awuhlobebo, sangbeakbo, akhrihbebo, dungjingbo tüsho athranyukbebo;

³⁴amuhiudobe rungkhiungkhi namfimihnu küp amürüm, shihküp atsüdak, tüsho zhindokhim;

³⁵tangzüng sangdan akhrihbebo bede tüsho mihmüthsüm binkiu;

³⁶dükhüm, kukruk alala, tüsho Thrünpuh kilim jihkhi yikhap;

³⁷suna müthsün tsünpung dubopung, tsünpungbo, kukruk alala, tüsho tsünpungbo thsungkheak moke;

³⁸jinjinlak takpung kingaün sadam tüsho akhrihbebo, amujube müdangke, jinjinlak, khimyam ching yüzahpung zhindokhim;

³⁹müwayinchi aphidung bede taka kingaünpung sadambo, akhrihbebo tüsho kukruk alala; adubopung bede müwayinchi müsühmüra-phuru;

⁴⁰khikzhakpung zhindokhimbo, dungjingbo le athranyukbebo, khikzhakpung limro zhindokhim, liubo tüsho achingsangbo; ashorupung khimyam ching mukhungmüdan thsungkheak pungphurubo alala;

⁴¹amüsüh dangpung ching tankihpü amükeambuh Aron tüsho api tsührübo amükeamrü thsüde tankihpü thsungkheak amüsüh khimmihbo.

⁴²ATUNGPUHNÜ Mosa ki thiyukhüm jihkhi nangde Israelrünü rhimo alala ban.

⁴³ATUNGPUHNÜ thiyukhüm jihkhi nangde arü rhimobo Mosanü kheahkham, jumonü Mosanü arü müngühjih.