Read Yimchungru Naga Abe 5 Bible Online

Abe 5 - Yimchungru Naga bible

Abe 5

¹Ju dunglim Mosa tüsho Aron Ijip kiulongthsüpuh kilim yübah tha, “Israel Thrünpuh, ATUNGPUHNÜ hade thachoh, ‘I mihtsürübo yüshang, junangde arünü sunglo ching I thsungkheaknü thünio thsübah.’”

²Pharaonü tha, “Inü api düsheak anide Israelrü yüshihpü thsüde ATUNGPUH ju she a? Inü ATUNGPUH mümükheah tüsho inü Israelrübo müyüshih.”

³Judüki anenü alo, “Ibrirü Thrünpuh isa miki akhiukdo; ATUNGPUH isa Thrünpuh ki kingaünpü thsüde sunglo ching nimung mahsam limtsah yüpü isa ki mülüjang, jude yungsho apinü isa tukthsü yungsho nukshangnü alaksahbah.”

⁴Ijip kiulongthsüpuhnü ane ki tha, “Tümü thsükhi nüsanü mihtsürübo ju arü rhimo chingnü bea lucho? Arü rhimo ching yüloshang!

⁵Kheahang nüsa mihtsürübo Ijiprü kheaknü ahihbe kamdo, tüsho kheakü nüsanü arü rhimokhi chingnü tukloshihchoh.”

⁶Ju ninü kiulongthsüpuhnü azhorü limberü tüsho atorübo ki thiyukhüm jih,

⁷“ Müngühlim ruk lotaklung thsüpü nüsanü müneang düjih, tüshe arü küdah thsüde müneang hanmukhungshang.

⁸Tüshe müngühlim arünü lotaklung küdükhüh thsükhitkheanü ju dükhüh thsükhitshihpü nüsanü arü ki thaang; ju kheaknü anükbe dükamshih, tümüde arü yomuhlah, jumonü ‘Isa Thrünpuh ki kingaünpü yüshang’ de arünü zhichoh.

⁹Harü mihtsürübo kilim rhimo achakbe jihang, tüsho makeangde rhimoshang, jude thsüsho akeangyu thakhibo ching anipü kim müngüde akambah.”

¹⁰Azhorü limberü tüsho atorübonü yübah Israelrübo ki tha, “Kiulongthsüpuhnü hade thachoh, Inü nüsa kilim müneang müjih.

¹¹Nüsanü yübah müneang tümü ching ngübanü nüsa küdah thsüde hande arang, tüshe püpüki kheaknü anükbe mükamshih.”

¹²Jumonü mihtsürübonü müneang yimdarüpü Ijip lomi alala ching hiumüzüt.

¹³Tüshe azhorü limberübonü arü ki müküpde tha, “ Müngühlim müneang jih-a nimung aban thsükhitkhi nangde nüsa rhimo banang.”

¹⁴Tüsho azhorü limberübonü mokhitkhi Israelrü torübo kheak lakde keokhi, “Tümü thsükhi nüsanü müngühlim nangde yini tüsho khihni lotaklung müthsükhit le?”

¹⁵Judüki Israelrü torübonü kiulongthsüpuh ki arübah tha, “Tümüde nünü nü yamlarübo kheak hade thsümüchicho?”

¹⁶Nü yamlarübo kilim müneang müjih, tüshe lotaklung thsüang de arünü isa ki thachoh. Nü yamlarübo kheak lakchoh, tüshe ha nü mihtsürübo kheak amülim lah.

¹⁷Tüshe apinü tha, “Nüsa yomuhyothsünlah, tüsho mürhimone jumonü nüsanü thachoh, ‘ATUNGPUH kingaünpü isa yüshang.’

¹⁸Kheakü yüang tüsho rhimoang; tümüde nüsa kilim müneang müjih, tüshe müngühlim thsükhitkhi dükhüh nüsanü lotaklung ju thsükhitang.”

¹⁹Müngühlim nimung aban lotaklung thsükhitkhi nangde thsükhitang de athakhinü, atorübonü arü küpkhuk ching lah de lümkhit.

²⁰Arübo kiulongthsüpuh kilimnü akhiukchoki arü aleangde alakhi Mosa tüsho Aron bünenü shoru.

²¹Tüsho arünü ane ki tha, “Nükenü Pharao tüsho api torübo khah ching nukshang zhimshihbah isa laksahshihpü thsüde arünü isa thraneanshihkhi hode ATUNGPUHNÜ nüke kheak kheahshang tüsho mahkhapshang.”

²²Judüki Mosanü ATUNGPUH kilim rholobah tha, “ATUNGPUH , tümü thsükhi nünü nü mihtsürübo kheak küpkhuk hande arükhea? Tümüde nünü I ha ching arüshihkhea?

²³Inü Pharao kilim nü mung chingnü athapü arükinü, apinü ha mihtsürübo kheahmüchihdo. Tüsho nünü nü mihtsürübo bekhitpü tümü mürhimo.”