Read Yimchungru Naga Abe 6 Bible Online

Abe 6 - Yimchungru Naga bible

Abe 6

¹ATUNGPUHNÜ Mosa ki tha, “Kheakü inü Pharao kheak tümü rhimobanü nünü angübah. I mihtsürübo tsoshihpü inü api kheak ningkihbah. Atsütsü, api lomi chingnü apinü arübo yankhita bahshihpü inü api kheak ningkihbah.”

²Thrünpuhnü Mosa ki tha, “I ATUNGPUH ah.”

³Inü Abraham, Isak tüsho Jakob ki Wuto Thrünpuh ah de akhiuka huh, tüshe inü arü ki I mung ATUNGPUH de mümükheahshihde alakheah.

⁴Arü hanrü thsüde alakhi Kanan lomi ju inü arü kilim jihpü tangzüng thsü.

⁵Kheaküshe Ijiprünü azhorü kuhi ching zojihkhi Israelrü ashekhi inü so, tüsho inü tangzüngkhi lümkhit.

⁶Jumonü Israelrü ki thaang: “I ATUNGPUH ah; inü nüsa Ijiprü thsümüchi tüsho azhorü kuhi chingnü bekhitbah, tüsho inü khah chungkihde tüsho mahkhap atonü nüsa khümkhitbah,

⁷tüsho inü I mihtsürü thsüpü nüsa lubah, tüsho I ju nüsa Thrünpuh thsübah; I ju Ijip azhorü kuhi chingnü nüsa bekhitbuh ATUNGPUH nüsa Thrünpuh ah de nüsanü amükheahbah.

⁸Tüsho inü Abraham, Isak tüsho Jakob kilim jihpü thiyuchihchimkhi lo ching inü nüsa bede yüzahbah; inü ju nüsa yamrüplurüp thsüde ajihbah: I ATUNGPUH ah.”

⁹Jumonü Mosanü Israelrü ki ha tha; tüshe arü mulong masühkhi tüsho thsümüchi azhorü kuhi lakhinü arünü Mosa ki mani.

¹⁰ATUNGPUHNÜ Mosa ki tha,

¹¹“Yüzahang, Israel mihtsürü api lomi chingnü awukhiukshihpü Pharao kiulongthsüpuh ki thaang.”

¹²Tüshe Mosanü ATUNGPUH ki tha, “Kheahang, Israel mihtsürünü I ki mani; dale I thiyu müthasorü mihtsürü khülang ki Pharaonü küde anipü?”

¹³Tüshe ATUNGPUHNÜ Mosa tüsho Aron ki asuk, tüsho Israel limbepü tüsho Ijip kiulongthsüpuh Pharaonü Ijip lomi chingnü Israel mihtsürü bekhitshihpü thiyukhüm jih.

¹⁴Harü ha arü bebuhrü yamkhün ching akubo: Jakob tsührü adüjibuh Reuben tsührübo ju Hanok, Pallu, Hezron, tüsho Karmi; harü ha Reuben buhtsührü ah.

¹⁵Simeon tsührübo: Jemuel, Jamin, Ohad, Jakin, Zohar, tüsho Kananberü tsührü Shaul; harü ha Simeon buhtsührü ah.

¹⁶Harü ha arü tsühkhin yande Levi tsührübo: Gershon, Kohath, tüsho Merari. Levi ju kam 137 lakheah.

¹⁷Gershon tsührübo: Arü yamkhün ayannü Libni tüsho Shimei lakheah.

¹⁸Tüsho Kohath tsührübo: Amram, Izhar, Hebron, tüsho Uzziel. Kohath kam 133 lakheah.

¹⁹Merari tsührübo: Mahli tüsho Mushi. Ha arü tsühkhinbo yande Levirü buhtsührü lakheah.

²⁰Amramnü abuh niurü Jokebed aniube thsüpü lu; tüsho alibenü api kilim Aron le Mosa zübejih. Amram kutsüp kam 137 lakheah.

²¹Izhar tsührübo: Kora, Nepheg, tüsho Zikri.

²²Tüsho Uzziel tsührübo: Mishael, Elzaphan, tüsho Sithri.

²³Aronnü Amminadab tsührü tüsho Nashon niurü Elisheba aniube thsüpü lu; tüsho alibenü api kilim Nadab, Abihu, Eleazar tüsho Ithmar zübejih.

²⁴Kora tsührübo: Assir, Elkana, tüsho Abiasaph; harü ha Kora buhtsührübo lakheah.

²⁵Aron tsührü Eleazarnü Putiel tsührü bolungnü khülang lu; tüsho alibenü api kilim Phinehas zübejih. Harü ha Levi trük gukbo tüsho buhtsühbo ching akubo lakheah.

²⁶ATUNGPUHNÜ Aron tüsho Mosa ki tha: “Israel mihtsürü arü chamnak ayannü Ijip chingnü bekhitang.”

²⁷Mosa tüsho Aron anenü Israel mihtsürü Ijip chingnü bekhitpü dünkheak Ijip kiulongthsüpuh Pharao ki thakheah.

²⁸Ijip lo ching ATUNGPUHNÜ Mosa ki asuk nimung,

²⁹ATUNGPUHNÜ Mosa ki tha, “I ATUNGPUH ah; inü nü ki thakhi alala Ijip kiulongthsüpuh Pharao ki thaang.”

³⁰Tüshe Mosanü ATUNGPUH ki tha, “Kheahang, inü thiyu müthaso, küde thsah Pharaonü I ki anipü?”